Read Iu Mien Singx Nzung 140 Bible Online

Singx Nzung 140 - Iu Mien bible

Singx Nzung 140

¹Singx Nzung 140 Jiu bun dorh nzung nyei mienh. Ndaawitv zoc nyei singx nzung. O ZIOUV aac, tov njoux yie biaux ndutv orqv mienh. Tov beu jienv yie, maiv bun mienh doqc mienh hoic.

²Ninh mbuo yiem hnyouv daav cuotv waaic nyei za'eix, yaac zanc-zanc coqv-huv mborqv jaax.

³Ninh mbuo bun ninh mbuo nyei mbietc laic hnangv naang nyei mbietc laic nor. Ninh mbuo nyei nzuih meix maaih naang-jieqv nyei ndie-doqc. Selaa

⁴O ZIOUV aac, tov njoux yie biaux ndutv orqv mienh nyei buoz-ndiev, beu yie maiv zuqc doqc nyei mienh hoic, ninh mbuo daav za'eix bun yie nyei zaux ndiqv zuqc ndorpc.

⁵Zoux maux nyei mienh bingx jienv zaeng koux zorqv yie, ninh mbuo longc hlaang corng mungz, yiem jauv-hlen zaeng koux hlopv yie. Selaa

⁶Yie gorngv mbuox ZIOUV, “Meih zoux yie nyei Tin-Hungh. O ZIOUV aac, tov baeng m'normh muangx yie jouh nyei sing-qiex.

⁷O ZIOUV, yie nyei Ziouv, dongh maaih qaqv henv njoux yie wuov dauh aac, mborqv domh jaax nyei hnoi-nyieqc meih torngv jienv yie nyei m'nqorngv.

⁸O ZIOUV aac, tov maiv dungx ei jienv orqv mienh nyei eix zoux, maiv dungx bun ninh mbuo orqv nyei za'eix cuotv, nziex ninh mbuo haih ceng-hlo. Selaa

⁹Tov maiv dungx bun weih jienv yie wuov deix mienh hingh jiex.[370] Tov bun ninh mbuo nyei nzuih gorngv nyei waac nzuonx daaih hoic ninh mbuo ganh.

¹⁰Tov bun zieqc jienv douz nyei taanx ndortv njiec ninh mbuo. Tov bun ninh mbuo zuqc zoi njiec ndo nyei kuotv, yietc liuz maiv haih cuotv.

¹¹Tov maiv dungx bun gorngv waac-huv nyei mienh liepc nguaaz-gorn yiem deic-bung. Tov bun orqv nyei sic siepv-siepv zorqv jienv zoux doqc nyei mienh.

¹²Yie hiuv duqv ZIOUV baav jienv ndortv naanc nyei mienh, yaac baengh fim nyei dunx weic mienh jomc mienh.

¹³Kuv mienh zungv oix ceng[371] meih nyei mengh, hnyouv zingx nyei mienh yaac oix yiem meih nyei nza'hmien.