Read Iu Mien Singx Nzung 147 Bible Online

Singx Nzung 147 - Iu Mien bible

Singx Nzung 147

¹Singx Nzung 147 Oix zuqc ceng ZIOUV. [385] Baaux nzung ceng yie mbuo nyei Tin-Hungh se za'gengh longx haic. Ceng ninh se za'gengh horpc[386] yaac puix haic.

²ZIOUV ceix Ye^lu^saa^lem jiez daaih. Ninh siou zunv zuqc guaatv mingh nzaanx nzengc nyei I^saa^laa^en Mienh.

³Zuqc hnyouv mun kouv nyei mienh ninh zorc longx yaac beu jienv ninh mbuo zuqc mun nyei dorngx.

⁴Ninh dingc ziangx hleix nyei soux mouc, tengx norm-norm hleix cuotv mbuox.

⁵Yie mbuo nyei Ziouv za'gengh hlo haic, maaih domh qaqv. Ninh nyei cong-mengh jiex ndaangc haih ndorqc duqv taux.

⁶ZIOUV bouh zuqc zeix nyei mienh faaux, zorqv orqv mienh zoi njiec ndau.

⁷Oix zuqc dor-ziec, baaux nzung ceng ZIOUV, longc daanh baah patv nzung bun yie mbuo nyei Tin-Hungh.

⁸Ninh longc mbuonx om jienv lungh, ninh liuc leiz mbiungc duih njiec ndau, bun miev cuotv yiem mbong gu'nguaaic.

⁹Ninh ceix nyanc hopv bun saeng-kuv, caux heuc jienv nyei norqc aa dorn.

¹⁰Ninh a'hneiv nyei se maiv zeiz maaz nyei qaqv, yaac maiv zeiz a'hneiv baamh mienh nyei zaux.[387]

¹¹ZIOUV a'hneiv nyei se taaih ninh nyei mienh, dongh kaux ninh ziepc zuoqv hnamv mienh nyei hnyouv wuov deix.

¹²O Ye^lu^saa^lem aah! Oix zuqc ceng ZIOUV. O Si^on aah! Oix zuqc ceng meih nyei Tin-Hungh.

¹³Ninh bun meih nyei zingh laatc nyei gaengh sorn wuonv, ceix fuqv bun yiem meih gu'nyuoz nyei naamh nyouz.

¹⁴Ninh bun meih nyei gapv-jaaix gu'nyuoz taaix-baengh, bun gauh longx jiex nyei mbiauh meih mbuo duqv nyanc beuv.

¹⁵Ninh bun ninh nyei lingc cuotv mingh gormx lungh ndiev, ninh nyei waac mingh siepv nyei.

¹⁶Ninh bun sorng hnangv ba'gi yungh biei, bun mbiungc-suiv gitv daaih nzaanx mingh hnangv saaiv nor.

¹⁷Ninh bun duih borqc njiec hnangv la'bieiv-muonc nor. Ninh bun nziaaux-namx buonc daaih, haaix dauh haih diev duqv!

¹⁸Ninh yietv gorngv cuotv waac, naaiv deix yuqc nzengc. Ninh bun ninh nyei nziaaux buonc daaih, wuom ziouc liouc.

¹⁹Ninh zorqv ninh nyei waac bun Yaakopv, ninh nyei leiz-nyeic caux leiz jiu bun I^saa^laa^en.

²⁰Ninh maiv hnangv naaiv zoux weic ganh fingx mienh, ninh mbuo maiv hiuv duqv ninh nyei leiz. Oix zuqc ceng ZIOUV.