Read Iu Mien Singx Nzung 148 Bible Online

Singx Nzung 148 - Iu Mien bible

Singx Nzung 148

¹Singx Nzung 148 Oix zuqc ceng ZIOUV. [388] Oix zuqc yiem gu'nguaaic lungh ceng ZIOUV, yiem hlang nyei dorngx ceng ninh.

²Ninh nyei zuangx fin-mienh oix zuqc ceng ninh. Ninh nyei zuangx fin-mienh baeng oix zuqc ceng ninh.

³Mba'hnoi aah! Hlaax aah! Oix zuqc ceng ninh. Ziux njang nyei yietc zungv hleix aah! Oix zuqc ceng ninh.

⁴Hlang jiex nyei lungh caux yiem lungh gu'nguaaic nyei wuom[389] aah! Oix zuqc ceng ninh.

⁵Tov bun naaiv deix yietc zungv ceng ZIOUV nyei mengh, weic zuqc ninh yietv hatc ziouc cuotv daaih aqv.

⁶Ninh liepc naaiv deix daaih yietc liuz taux yietc liuz. Ninh njiec nyei lingc yietc liuz maiv haih jiex.[390]

⁷Oix zuqc yiem ndau-beih ceng ZIOUV. Koiv nyei domh mbiauz caux yiem koiv ndo nyei dorngx yietc zungv oix zuqc ceng.

⁸Douz caux borqc, sorng caux mbuonx, caux ei jienv ninh nyei lingc nyei domh nziaaux,

⁹domh mbong fiuv-mbong yietc zungv, ziangh biouv nyei ndiangx caux yietc zungv si^ndaa zongh ndiangx,

¹⁰hieh zoih caux yietc zungv saeng-kuv, nyorng ndau nyei ga'naaiv caux haih ndaix nyei norqc oix zuqc ceng ninh.

¹¹Lungh ndiev nyei hungh diex caux maanc fingx mienh, zoux jien nyei caux yietc zungv zoux hlo nyei mienh,

¹²houh saeng caux sieqv, mienh gox mienh caux fu'jueiv oix zuqc ceng ninh.

¹³Tov bun naaiv deix yietc zungv ceng ZIOUV nyei mengh, weic zuqc kungx maaih ninh nyei mbuox ganh hlo jiex hnangv. Ninh nyei njang-laangc yiem lungh caux ndau gu'nguaaic.

¹⁴Ninh bun ninh nyei baeqc fingx henv[391] weic bun ninh nyei cing-nzengc baeqc fingx ceng ninh, se dongh nitv ninh fatv nyei baeqc fingx,[392] I^saa^laa^en Mienh. Oix zuqc ceng ZIOUV.