Read Iu Mien Singx Nzung 149 Bible Online

Singx Nzung 149 - Iu Mien bible

Singx Nzung 149

¹Singx Nzung 149 Oix zuqc ceng ZIOUV. [393] Oix zuqc baaux diuh siang-nzung bun ZIOUV. Oix zuqc yiem ninh ziepc zuoqv nyei baeqc fingx gapv zunv nyei dorngx ceng ninh.

²Oix zuqc bun I^saa^laa^en Mienh weic Zeix Ninh Mbuo Daaih Wuov Dauh a'hneiv. Oix zuqc bun Si^on nyei baeqc fingx weic ninh mbuo nyei Hungh Diex orn-lorqc.

³Oix zuqc bun ninh mbuo cangx heix ceng ninh nyei mengh, mborqv nzoz patv daanh baah ceng ninh.

⁴Weic zuqc ZIOUV a'hneiv ninh nyei baeqc fingx, ninh bun nyiemc ganh zoux faix nyei mienh duqv hingh jiex.

⁵Tov bun gan longx ninh wuov deix weic ninh mbuo duqv hingh jiex nyei njang-laangc njien-youh. Tov bun ninh mbuo yiem ninh mbuo nyei coux njien-youh nyei baaux nzung.

⁶Tov bun ninh mbuo baaux nzung mbui nyei ceng Tin-Hungh, yaac bun ninh mbuo nyei buoz nanv jienv i maengx laic nyei nzuqc ndaauv,

⁷weic jaauv win bun maanc guoqv mienh, siemv dingc maanc fingx nyei zuiz,

⁸weic zorqv ninh mbuo nyei hungh ndoh jienv, yaac longc hlieqv-limc ndoh ninh mbuo zoux hlo nyei mienh,

⁹weic zoux ziangx ziux fiev jienv oix hnangv haaix nor dingc ninh mbuo nyei zuiz. Naaiv se Tin-Hungh nyei yietc zungv baeqc fingx[394] duqv nyei njang-laangc. Oix zuqc ceng ZIOUV.