Read Iu Mien Singx Nzung 17 Bible Online

Singx Nzung 17 - Iu Mien bible

Singx Nzung 17

¹Singx Nzung 17 Ndaawitv daux gaux nyei waac. O ZIOUV aah! Tov meih muangx haiz yie tov baengh fim nyei jauv. Tov muangx yie heuc jienv gorngv. Baeng m'normh muangx yie daux gaux nyei waac, se maiv zeiz yiem gorngv-baeqc nduov mienh nyei nzuih gorngv nyei waac.

²Tov meih bun cing yie se maiv dorngc, tov bun meih nyei m'zing mangc buatc haaix nyungc se horpc.

³Meih zungv kauv yie nyei hnyouv, lungh muonz zanc yaac zaah yie, meih seix liuz yie, meih maiv buatc yie dorngc haaix nyungc. Yie nyei nzuih yaac maiv gorngv orqv nyei sic.

⁴Gorngv taux mienh zoux nyei sic, yie bangc meih nyei nzuih gorngv nyei waac. Yie simv jienv, maiv gan zoux doqc nyei mienh nyei jauv.

⁵Yie nyei zaux-mbiec kungx gan meih nyei jauv mingh, yie nyei zaux yaac maiv caaiv piatv.

⁶O Tin-Hungh aah! Yie jouh meih weic zuqc meih zungv oix dau yie. Tov baeng m'normh muangx yie nyei waac.

⁷Meih ziepc zuoqv nyei hnamv mienh, tov bun meih hnamv nyei jauv hinc cuotv daaih. Meih nyei mbiaauc jieqv buoz njoux ndaauh kaux meih wuov deix biaux ndutv ninh mbuo nyei win-wangv.

⁸Tov beu yie hnangv beu meih nyei m'zing-mienh nor, tov bun yie bingx yiem meih nyei ndaatv-ndiev,[30]

⁹bun yie biaux ndutv zeix yie wuov deix orqv mienh nyei buoz-ndiev caux weih gormx oix hoic yie nyei maengc wuov deix win-wangv.

¹⁰Ninh mbuo nyei hnyouv maiv korv-lienh mienh,[31] ninh mbuo nyei nzuih gorngv waac-maux.

¹¹Ninh mbuo zimh jienv yie mingh, ih zanc weih gormx yie. Ninh mbuo bungx m'zing cienh mangc, fongv yie king njiec ndau.

¹²Ninh mbuo hnangv sienh nor, oix betv yie, yaac hnangv sienh lunx bingx jienv mbueiz nyei dorngx oix hoic yie.

¹³ZIOUV aah! Tov daaih caux ninh mbuo mborqv jaax, bun ninh mbuo zuqc suei. Tov longc meih nyei nzuqc ndaauv njoux yie nyei maengc biaux ndutv orqv mienh.

¹⁴O ZIOUV aah! Tov longc meih nyei buoz njoux yie leih ndutv dongh yiem naaiv seix zaangc duqv liuz ninh mbuo nyei buonc nyei mienh. Tov bun dongh meih weic ninh mbuo siou daaih nyei buangv ninh mbuo nyei ga'sie. Tov bun ninh mbuo nyei dorn-jueiv duqv gaux nzengc. Zengc njiec wuov deix liouh njiec bun ninh mbuo nyei fu'jueiv.

¹⁵Mv baac yie ganh zoux duqv horpc ziouc duqv buatc meih nyei hmien. Yie nyie daaih nyei ziangh hoc, yie duqv buatc meih ziouc buangv hnyouv aqv.