Read Iu Mien Singx Nzung 19 Bible Online

Singx Nzung 19 - Iu Mien bible

Singx Nzung 19

¹Singx Nzung 19 Jiu bun dorh nzung nyei mienh. Ndaawitv zoc nyei singx nzung. Lungh zunh yaangh Tin-Hungh nyei njang-laangc, lungh zaangc biux mengh ninh nyei buoz-dauh.

²Yietc hnoi zunh mbuox jiex yietc hnoi, yietc muonz zunh wuonh zaang jiex yietc muonz.

³Mouc nyinh mouc waac, mouc sing-qiex maiv haiz,

⁴mv baac ninh nyei fienx[41] mingh gormx baamh gen, ninh nyei[42] nyinh nyouz mingh jomc lungh ndiev. Tin-Hungh yiem wuov lungh weic mba'hnoi corng ndopv-liuh.

⁵Mba'hnoi cuotv daaih hnangv siang-laangh yiem ninh nyei gen cuotv. Yaac hnangv saaix tiux nyei mienh henv mienh njien-youh nyei gan saaix nyei jauv mingh.

⁶Mba'hnoi yiem naaiv bung lungh cuotv daaih, aengx youh taux wuov bung lungh. Maiv maaih haaix nyungc haih bingx duqv ninh jorm nyei qiex.

⁷ZIOUV nyei leiz-latc se dunh yunh nyei, bun mienh nyei hnyouv fingv jiez daaih. ZIOUV nyei leiz-nyeic se kaux duqv wuonv nyei, bun maiv maaih cong-mengh nyei mienh maaih cong-mengh.

⁸ZIOUV hatc nyei waac horpc nyei, bun gan nyei mienh maaih njien-youh. ZIOUV nyei lingc cing-nzengc nyei, bun mienh haih mengh baeqc.[43]

⁹Mienh taaih ZIOUV se longx haic, oix zuqc taaih taux maanc gouv maanc doic. ZIOUV nyei leiz se zien nyei, diuh diuh baengh fim nyei.

¹⁰Se gauh jaaix jiex jiem, zungv gauh jaaix zien jiem. Yaac gauh gaam jiex mueiz-dorngh, dongh yiem mueiz-pengx liouc cuotv nyei mueiz-dorngh.

¹¹Naaiv deix leiz-latc kuinx meih nyei bou. Mienh ei jienv naaiv deix waac zoux ziouc maaih domh zingh nyeic.

¹²Haaix dauh haih zieqv duqv ganh zoux dorngc nyei jauv? Tov guangc nqoi yie zoux dorngc, zieqv maiv duqv nyei sic.

¹³Tov dangv jienv bun meih nyei bou maiv dungx duqv-eix baamz zuiz. Maiv dungx bun naaiv deix zuiz gunv yie. Hnangv naaic yie ziouc maiv maaih dorngx nqemh, yaac biaux duqv ndutv domh zuiz.

¹⁴O ZIOUV aac, meih zoux yie nyei La'bieiv, yaac zoux Zuoqc Yie Wuov Dauh. Tov bun yie nyei nzuih gorngv cuotv nyei waac, caux yie yiem hnyouv hnamv nyei jauv, ziux meih mangc haih zoux duqv horpc.