Read Iu Mien Singx Nzung 20 Bible Online

Singx Nzung 20 - Iu Mien bible

Singx Nzung 20

¹Singx Nzung 20 Jiu bun dorh nzung nyei mienh. Ndaawitv zoc nyei singx nzung. Meih buangh zuqc kouv naanc nyei hnoi-nyieqc tov ZIOUV dau, tov Yaakopv nyei Tin-Hungh[44] beu jienv meih.

²Tov ninh yiem singx dinc tengx meih, yaac yiem Si^on Mbong beu jienv meih.

³Tov ninh jangx meih fongc horc nyei nyungc-nyungc ga'naaiv, yaac a'hneiv meih buov ziec nyei yietc zungv. Selaa

⁴Tov ninh bun meih duqv ziux meih nyei hnyouv oix nyei, yaac ei jienv meih nyei yietc zungv za'eix zoux ziangx.

⁵Yie mbuo ziouc njien-youh nyei heuc weic meih hingh jiex, yie mbuo yaac dengv yie mbuo nyei Tin-Hungh nyei mbuox liepc yie mbuo nyei geh. Tov ZIOUV dau meih tov nyei yietc zungv waac.

⁶Ih zanc yie hiuv duqv ZIOUV oix tengx[45] ninh longc youh orn daaih wuov dauh. Ninh oix yiem ninh cing-nzengc nyei tin-dorngh dau. Ninh longc ninh nyei mbiaauc jieqv buoz nyei domh qaqv tengx hingh jiex.

⁷Maaih deix kaux[46] ninh mbuo nyei mborqv jaax cie, maaih deix kaux ninh mbuo nyei maaz, mv baac yie mbuo kaux ZIOUV, yie mbuo nyei Tin-Hungh.[47]

⁸Ninh mbuo ziouc ndorpc, king njiec, mv baac yie mbuo duqv jiez sin souv wuonv.

⁹O ZIOUV aac, tov tengx hungh diex hingh jiex. Yie mbuo heuc nyei ziangh hoc, tov dau yie mbuo.