Read Iu Mien Singx Nzung 25 Bible Online

Singx Nzung 25 - Iu Mien bible

Singx Nzung 25

¹[63]Singx Nzung 25 Ndaawitv zoc nyei singx nzung. O ZIOUV aac, yie bungx dingc hnyouv kaux meih.

²O yie nyei Tin-Hungh aac, yie kaux meih. Tov maiv dungx bun yie zuqc nyaiv, yaac maiv dungx bun yie nyei win-wangv hingh jiex yie.

³Da'faanh zuov jienv meih nyei mienh yietc liuz maiv zuqc nyaiv. Mv baac ngaengc jienv meih yaac maiv maaih gorn-baengx wuov deix zungv oix zuqc nyaiv aqv.

⁴O ZIOUV aac, tov bun yie hiuv duqv meih nyei za'eix yaac njaaux yie hiuv duqv meih nyei jauv.

⁵Tov meih dorh yie gan meih nyei zien leiz yaac njaaux yie, weic zuqc meih zoux njoux yie wuov dauh Tin-Hungh. Yie ziangh hnoi ziangh muonz zuov meih.[64]

⁶O ZIOUV aac, tov meih jangx jienv meih korv-lienh mienh yaac ziepc zuoqv nyei hnamv mienh, weic zuqc loz-hnoi m'daaih hnangv naaic.

⁷Maiv dungx jangx yie lunx nyei ziangh hoc zoux dorngc, baamz nyei zuiz. O ZIOUV aac, ziux meih ziepc zuoqv nyei hnamv mienh tov meih jangx yie, weic zuqc meih se longx haic.

⁸ZIOUV se longx nyei, baengh fim nyei, ninh ziouc njaaux zuiz-mienh yangh horpc nyei jauv.

⁹Ninh dorh nyiemc ganh zoux faix nyei mienh zoux horpc nyei sic, yaac njaaux ninh mbuo hiuv duqv ninh nyei jauv.

¹⁰Da'faanh ei jienv ZIOUV nyei ngaengc waac caux ninh gorngv nyei waac nyei mienh ninh hnamv yaac ziepc zuoqv nyei dorh.

¹¹O ZIOUV aah! Weic meih ganh nyei mengh tov guangc yie nyei zuiz, weic zuqc yie nyei zuiz hlo haic.

¹²Haaix dauh taaih ZIOUV, ninh oix njaaux wuov dauh ginv yangh horpc nyei jauv.

¹³Yiem ninh nyei seix zeiv ninh duqv siouc fuqv-loqc, ninh nyei hoz doic yaac duqv nzipc naaiv norm deic-bung.

¹⁴ZIOUV caux taaih ninh wuov deix zoux doic. Ninh bun ninh mbuo hiuv duqv ninh laengz nyei ngaengc waac.

¹⁵Yie nyei m'zing zanc-zanc mangc ZIOUV, weic zuqc kungx ninh ganh haih tengx yie nyei zaux leih ndutv, maiv zuqc mungz nzenc.

¹⁶Tov meih huin nzuonx daaih mangc yie, korv-lienh yie, weic zuqc yie ndoqc yaac kuonx naanh.

¹⁷Yie nyei hnyouv nzauh duqv kouv haic. Tov tengx yie biaux ndutv yie nyei kouv naanc.

¹⁸Tov meih tengx corngh yie nyei kouv naanc caux naanc zingh, aengx guangc yie nyei yietc zungv zuiz.

¹⁹Tov meih hnamv mangc gaax, yie nyei win-wangv ndongc haaix camv, yaac mangc gaax ninh mbuo nzorng duqv yie doqc haic.

²⁰Tov meih beu jienv yie nyei maengc aengx njoux yie, bun yie maiv zuqc nyaiv, weic zuqc yie ndaauh kaux meih.

²¹Meih hnyouv zaqc hnyouv zingx nyei ziouc tov meih beu jienv yie, weic zuqc yie zuov jienv meih.

²²O Tin-Hungh aah! Tov meih njoux I^saa^laa^en mienh biaux ndutv ninh mbuo nyei yietc zungv kouv naanc.