Read Iu Mien Singx Nzung 33 Bible Online

Singx Nzung 33 - Iu Mien bible

Singx Nzung 33

¹Singx Nzung 33 Kuv mienh aah! Oix zuqc kaux ZIOUV orn-lorqc. Hnyouv zingx nyei mienh horpc zuqc ceng ninh.

²Oix zuqc patv daanh baah ceng ZIOUV, longc maaih ziepc diuh finx nyei daanh baah patv nzung ceng ninh.

³Dorng jienv ninh baaux diuh siang-nzung, patv daanh baah liouc nyei, yaac heuc mbui nyei.

⁴Weic zuqc ZIOUV nyei waac se zien nyei, ninh zoux nyei yietc zungv gong ninh ziepc zuoqv nyei zoux.

⁵Haaix nyungc horpc nyei, baengh fim nyei, ninh hnamv. ZIOUV ziepc zuoqv nyei hnamv gormx lungh ndiev ndau-beih.

⁶ZIOUV longc ninh nyei waac zeix cuotv lungh, yaac longc ninh nyei nzuih nyei qiex zeix cuotv mba'hnoi caux hlaax caux hleix.

⁷Ninh zorqv koiv nyei wuom siou zunv hnangv dapv gingx-baengh, zorqv ndo haic nyei koiv zaangh jienv yiem siou ga'naaiv nyei dorngx.

⁸Tov bun gormx lungh ndiev taaih ZIOUV. Tov bun lungh ndiev mienh gamh nziex ninh.

⁹Weic zuqc ninh yietv gorngv, baamh gen ziouc maaih daaih aqv. Ninh yietv hatc, maanc muotc ziouc cuotv daaih.

¹⁰ZIOUV bun zuangx fingx caangh laangh nyei jauv maiv lamh longc, ninh bun maanc fingx nyei za'eix zoux maiv cuotv haaix nyungc.

¹¹ZIOUV caangh laangh nyei waac yietc liuz yiem, ninh yiem hnyouv hnamv cuotv nyei za'eix yiem taux maanc gouv maanc doic.

¹²Maaih ZIOUV zoux ninh mbuo nyei Tin-Hungh wuov norm guoqv nyei mienh maaih orn-lorqc. Se ninh ginv daaih zoux ninh ganh nzipc nyei wuov deix baeqc fingx maaih orn-lorqc.

¹³ZIOUV yiem gu'nguaaic lungh mangc njiec, ninh buatc nzengc yietc zungv baamh mienh.

¹⁴Ninh yiem ninh zueiz nyei weic mangc njiec lungh ndiev maanc mienh yietc zungv.

¹⁵Ninh se zeix ziangx ninh mbuo zuangx mienh nyei hnyouv, ninh mengh baeqc ninh mbuo zoux nyei yietc zungv sic.

¹⁶Hungh diex maiv zeiz weic kaux baeng camv duqv hingh. Mborqv jaax henv nyei baeng maiv zeiz weic qaqv hlo duqv njoux.

¹⁷Kaux mborqv jaax nyei maaz weic hingh jiex se maiv lamh hnamv aqv. Maiv gunv maaz nyei qaqv hlo, maiv haih njoux mienh.

¹⁸Mv baac ZIOUV nyei m'zing mangc jienv gamh nziex ninh, taaih ninh wuov deix, dongh kaux ninh ziepc zuoqv hnamv mienh nyei hnyouv wuov deix.

¹⁹Ninh oix njoux ninh mbuo, bun ninh mbuo maiv zuqc daic, ngorc hnaangx nyei ziangh hoc yaac bun ninh mbuo maaih maengc ziangh jienv.

²⁰Yie mbuo nyei hnyouv maaih lamh hnamv zuov jienv ZIOUV. Ninh tengx mbuo yaac zoux mbuo nyei torngv-baaih.

²¹Yie mbuo nyei hnyouv zungv kaux ninh njien-youh, weic zuqc yie mbuo kaux ninh nyei cing-nzengc mbuox.

²²ZIOUV aac, tov meih ziepc zuoqv nyei hnamv yie mbuo, weic zuqc yie mbuo kaux meih maaih lamh hnamv dorngx.