Read Iu Mien Singx Nzung 38 Bible Online

Singx Nzung 38 - Iu Mien bible

Singx Nzung 38

¹Singx Nzung 38 Ndaawitv zoc nyei singx nzung. Longc weic fongc horc ziec jangx nyei buonc.[92] O ZIOUV aah! Maiv dungx qiex jiez, hemx yie, yaac maiv dungx nouz yie, dingc yie nyei zuiz.

²Weic zuqc meih nyei forng-cang buonv bieqc yie gu'nyuoz, meih nyei buoz njiec daaih ngatv jienv yie.

³Weic zuqc meih nouz yie, yie nyei sin cingx maiv wangc siangx. Laaix yie nyei zuiz yie[93] benx baengc mi'aqv.

⁴Yie zoux dorngc nyei zuiz yiemx gauh hlang jiex yie nyei m'nqorngv, yaac hnangv ga'naaiv hniev jiex ndaangc yie nyei qaqv.

⁵Laaix yie zoux hngongx nyei sic yie mun nyei dorngx zueix yaac huv.

⁶Yie zuqc kouv, ndoqv njiec, zungv mbaapv njiec ndau. Ziangh hnoi ziangh muonz nzauh nyiemv jienv yiem.

⁷Yie nyei jaaiv jorm hnangv douz buov jienv nor, yie nyei sin maiv maaih yietc norm dorngx wangc siangx.

⁸Yie suei nzengc, kouv taux ndiev. Yie nyei hnyouv mun, njunh jienv yiem.

⁹Ziouv aah! Yie nyei hnyouv oix longc nyei meih hiuv nzengc mi'aqv. Yie njunh jienv nyei qiex bingx maiv mbueiz meih.

¹⁰Yie nyei mba'nziu dongz seix nyei, yie nyei qaqv yaac mau jienv njiec. Liemh yie nyei m'zing zungv maiv njang aqv.

¹¹Laaix yie nyei zeqc naanc yie nyei doic caux gorx-youz simv yie go, yie nyei cien-ceqv yaac simv yie go haic.

¹²Oix zorqv yie nyei maengc wuov deix zaeng ninh mbuo nyei mungz. Oix hoic yie wuov deix kungx gorngv hnangv haaix nor haih bun yie zuqc baaic, ninh mbuo ziangh hnoi daav za'eix nduov yie.

¹³Mv baac yie hnangv m'normh ndung nyei mienh muangx maiv haiz. Yaac hnangv ga'naaiv-hngongx, maiv haih gorngv waac.

¹⁴Yie hnangv yietc dauh muangx maiv haiz nyei mienh, nzuih maiv haih dau.

¹⁵O ZIOUV aah! Yie zuov jienv meih. O ZIOUV, yie nyei Tin-Hungh aah! Meih zungv oix dau yie.

¹⁶Weic zuqc yie daux gaux gorngv, “Yie nyei zaux caaiv piatv nyei ziangh hoc, maiv dungx bun ninh mbuo jatv yie fai ceng-hlo.”

¹⁷Weic zuqc yie zungv oix ndorpc haic aqv. Yie yaac zanc-zanc mun jienv yiem.

¹⁸Yie nyiemc yie nyei zuiz, yie weic yie nyei zuiz nzauh.

¹⁹Yie nyei win-wangv youc camv youc henv. Nzorng yie mv baac maiv maaih gorn-baengx nyei mienh yaac maaih camv.

²⁰Longc orqv sic jaauv yie zoux nyei kuv sic wuov deix caux yie doix-dekc, weic zuqc yie kungx lorz zoux horpc nyei jauv hnangv.

²¹O ZIOUV aah! Tov maiv dungx guangc yie. O yie nyei Tin-Hungh aah! Maiv dungx leih go yie.

²²Njoux yie wuov dauh Ziouv aah! Tov siepv-siepv nyei daaih tengx yie.