Read Iu Mien Singx Nzung 41 Bible Online

Singx Nzung 41 - Iu Mien bible

Singx Nzung 41

¹Singx Nzung 41 Jiu bun dorh nzung nyei mienh. Ndaawitv zoc nyei singx nzung. Maaih hnyouv jangx mienh jomc mienh, wuov dauh maaih njien-youh aqv. Zuqc kouv nyei hnoi-nyieqc ZIOUV oix njoux ninh.

²ZIOUV beu jienv ninh, bun ninh maaih maengc ziangh. Yiem wuov norm deic-bung mienh oix heuc ninh zoux “Duqv fuqv nyei mienh.” Tov maiv dungx zorqv ninh jiu bun win-wangv sueih ganh nyei hnyouv hanc zoux.

³Ninh butv baengc bueix jienv coux nyei ziangh hoc ZIOUV oix goux ninh. Maaih baengc wuov zanc meih zungv oix zorc ninh longx daaih.[101]

⁴Yie gorngv, “O ZIOUV aah! Tov korv-lienh yie, tov zorc yie longx, weic zuqc yie baamz zuiz dorngc meih.

⁵Yie nyei win-wangv gorngv doqc yie. Ninh mbuo gorngv, “Ninh taux haaix zanc cingx daic ni? Ninh nyei mbuox taux haaix zanc cingx zuqc mietc?”

⁶Haaix dauh daaih mangc yie, kungx gorngv jaav waac[102] hnangv. Ninh nyei hnyouv nzauz maiv benx nyei jauv. Cuotv mingh taux haaix, ninh zunh jienv mingh.

⁷Nzorng yie wuov deix yietc zungv longc waac-sapv gorngv taux yie, ninh mbuo laaic yie duqv buangh gauh ciouv jiex nyei sic.

⁸Ninh mbuo gorngv, “Ninh zuqc ciouv haic nyei baengc hoic ninh aqv. Ninh bueix jienv coux yietc liuz maiv duqv aengx jiez sin.”

⁹Liemh yie gauh zuoqc jiex nyei loz-gaeng doic, se yie bungx hnyouv wuov dauh, dongh caux yie juangc hnaangx nyanc nyei mienh, yaac mbienv hnyouv[103] bun yie.

¹⁰O ZIOUV aah! Tov meih korv-lienh yie, bun yie longx, tengx yie jiez sin daaih, haih jaauv win bun ninh mbuo.

¹¹Yie ziouc hiuv duqv meih a'hneiv yie, weic zuqc yie nyei win-wangv maiv haih hingh jiex yie.

¹²Meih baav jienv yie weic zuqc yie hnyouv zingx, meih yaac bun yie yietc liuz yiem meih nyei nza'hmien.

¹³Ceng ZIOUV, I^saa^laa^en nyei Tin-Hungh. Oix zuqc ceng yiem loz-hnoi taux maanc gouv maanc doic. Aamen caux Aamen.