Read Iu Mien Singx Nzung 44 Bible Online

Singx Nzung 44 - Iu Mien bible

Singx Nzung 44

¹Singx Nzung 44 Jiu bun dorh nzung nyei mienh. Kolaa nyei Zeiv-Fun nyei matv^kin nzung Tin-Hungh aah! Yie mbuo ganh nyei m'normh duqv haiz jiex, yie mbuo nyei ong-taaix mbuox jiex yie mbuo, loz-hnoi yiem ninh mbuo nyei seix zeiv meih zoux jiex hlo haic nyei sic.

²Meih longc meih ganh nyei buoz zunc cuotv yiem wuov nyei norm-norm guoqv nyei mienh, yaac liepc yie mbuo nyei ong-taaix yiem wuov. Meih bun wuov deix ganh fingx zuqc kouv, mv baac bun yie mbuo nyei ong-taaix zoux bungx nqoi nyei mienh.

³Weic zuqc ninh mbuo maiv zeiz weic ganh nyei nzuqc ndaauv duqv wuov norm deic-bung, yaac maiv zeiz ninh mbuo ganh nyei buoz tengx ninh mbuo duqv hingh, mv baac se weic meih nyei mbiaauc jieqv buoz caux meih nyei hmien nyei njang-laangc, weic zuqc meih a'hneiv ninh mbuo.

⁴Meih zoux yie nyei Hungh caux yie nyei Tin-Hungh. Tov paaiv bun Yaakopv duqv hingh.

⁵Yie mbuo kaux meih fongv yie mbuo nyei win-wangv njiec. Yie mbuo kaux meih nyei mengh caaiv jienv caux yie mbuo mborqv jaax wuov deix.

⁶Yie maiv kaux yie nyei juang-zinx, yie nyei nzuqc ndaauv yaac maiv haih njoux yie,

⁷mv baac meih njoux yie mbuo leih ndutv yie mbuo nyei win-wangv, bun nzorng yie mbuo wuov deix zuqc nyaiv.

⁸Yie mbuo ziangh hnoi weic Tin-Hungh bungx waac-maux. Yie mbuo yaac oix yietc liuz dor-ziec meih nyei mbuox. Selaa

⁹Mv baac ih zanc meih guangc yie mbuo, bun yie mbuo zuqc suei. Meih maiv caux yie mbuo nyei zuangx jun-baeng cuotv.

¹⁰Meih bun yie mbuo tuix nzuonx biaux win-wangv. Nzorng yie mbuo wuov deix win-jaa caangv yie mbuo nyei ga'naaiv.

¹¹Meih bun yie mbuo hnangv zuqc daix nyanc nyei ba'gi yungh, yaac bun yie mbuo nzaanx mingh yiem maanc fingx mbu'ndongx.

¹²Meih laanh zaanc maaic meih nyei baeqc fingx hnangv maiv maaih jaax-zinh nyei ga'naaiv. Ziux maaic nyei jaax-zinh zungv maiv duqv yietc deix leic.

¹³Meih bun yie mbuo zuqc laangz zaangc mienh ki, zuqc weih gormx nyei mienh jatv yaac mangc piex.

¹⁴Meih bun yie mbuo yiem maanc fingx mbu'ndongx zoux gouv gorngv, yiem fingx-fingx mbu'ndongx zuqc ninh mbuo huangx m'nqorngv jatv yie mbuo.

¹⁵Yie ziangh hnoi zuqc diev nyaiv, yaac zuqc baaic hmien,

¹⁶laaix mienh gorngv doqc gorngv ki, yaac laaix buatc win-wangv caux jaauv win nyei mienh.

¹⁷Yie mbuo zuqc naaiv deix yietc zungv sic maiv gunv yie mbuo maiv la'kuqv meih fai ngaengc meih caux yie mbuo laengz nyei ngaengc waac.

¹⁸Yie mbuo nyei hnyouv maiv daaux nqaang. Yie mbuo nyei zaux yaac maiv caaiv piatv meih nyei jauv.

¹⁹Mv baac meih zaax jienv yie mbuo, bun yie mbuo benx hieh juv yiem nyei dorngx, bun zuqc daic nyei dongh linh[107] gomv jienv yie mbuo.

²⁰Se gorngv yie mbuo la'kuqv yie mbuo nyei Tin-Hungh nyei mbuox, fai sung yie mbuo nyei buoz cuotv zaangc nyiec nyei zienh,

²¹Tin-Hungh maiv zeiz haih zaah cuotv naaiv deix sic fai? Weic zuqc ninh hiuv duqv mienh nyei hnyouv gem jienv nyei sic.

²²Weic meih yie mbuo ziangh hnoi zuqc mienh daix jienv yiem. Mienh funx yie mbuo hnangv benx oix zuqc daix nyei ba'gi yungh nor.

²³O Ziouv aah! Nyie daaih maah! Meih weic haaix diuc m'njormh? Jiez sin aqv, maiv dungx yietc liuz guangc yie mbuo.

²⁴Meih weic haaix diuc buang meih nyei hmien maiv mangc yie? Meih weic haaix diuc la'kuqv yie mbuo zuqc kouv naanc, zuqc seix nyei sic.

²⁵Yie mbuo zuqc mbaapv njiec taux nie-mbung, ziangh sin naetv jienv ndau-beih.

²⁶Tov meih daaih tengx yie mbuo. Weic zuqc meih ziepc zuoqv nyei hnamv mienh, tov njoux yie mbuo.