Read Iu Mien Singx Nzung 48 Bible Online

Singx Nzung 48 - Iu Mien bible

Singx Nzung 48

¹Singx Nzung 48 Benx diuh nzung. Kolaa nyei Zeiv-Fun zoc nyei singx nzung. ZIOUV za'gengh weih hlo, yaac puix duqv mienh camv-camv nyei ceng yiem yie mbuo nyei Tin-Hungh nyei zingh, se yiem ninh nyei cing-nzengc mbong.

²Mangc naaiv norm mbong youc hlang youc nzueic, bun lungh ndiev nyei zuangx mienh njien-youh. Se Domh Hungh Diex nyei zingh, Si^on Mbong, yiem baqv bung go nyei dorngx,

³Tin-Hungh yiem zingh gu'nyuoz yietc norm wuonv nyei dorngx, bun cing ninh ganh benx wuonv nyei dorngx.

⁴Mangc maah! Zuangx hungh diex gapv zunv daaih, lomh nzoih cuotv mingh oix mborqv naaiv norm zingh.

⁵Ninh mbuo yietv buatc naaiv norm zingh ninh mbuo mbuoqc horngh haic. Gamh nziex gau, huaang-huaang zaang-zaang nyei biaux.

⁶Ninh mbuo gamh nziex haic, sin zinx nzengc, kouv gau, hnangv m'sieqv dorn mun gu'nguaaz nor,

⁷yaac hnangv Taansitv nyei nzangv zuqc dong bung nyei domh nziaaux buonc waaic.

⁸Yie mbuo haiz jiex hnangv haaix nor, ih zanc yie mbuo buatc hnangv wuov nor, yiem Nernh Jiex nyei ZIOUV nyei zingh, se yiem yie mbuo nyei Tin-Hungh nyei zingh. Naaiv norm zingh Tin-Hungh liepc taux yietc liuz. Selaa

⁹O Tin-Hungh aac, yie mbuo yiem meih nyei biauv jangx zuqc meih ziepc zuoqv nyei hnamv mienh.

¹⁰O Tin-Hungh aac, hnangv meih nyei mengh zunh jomc lungh ndiev, mienh yaac hnangv wuov nor ceng meih taux lungh gorn. Meih longc baengh fim nyei jauv gunv. [117]

¹¹Tov bun Si^on Mbong nyei mienh a'hneiv, bun Yu^ndaa Zingh nyei mienh njien-youh, weic zuqc meih baengh fim nyei siemv.

¹²Yangh gormx Si^on maah! Huing gormx nzengc. Saauv zingh nyei laauh.

¹³Samx mangc zingh nyei zingh laatc, zaah mangc zingh wuonv jiex nyei dorngx, weic gorngv mbuox hoz doic mienh.

¹⁴Weic zuqc naaiv dauh Tin-Hungh, se yie mbuo nyei Tin-Hungh taux maanc gouv maanc doic. Ninh yietc liuz yietc seix dorh yie mbuo.