Read Iu Mien Singx Nzung 63 Bible Online

Singx Nzung 63 - Iu Mien bible

Singx Nzung 63

¹Singx Nzung 63 Ndaawitv yiem Yu^ndaa nyei Deic-Bung-Huaang zoc nyei singx nzung. Tin-Hungh aah! Meih zoux yie nyei Tin-Hungh, yie longc hnyouv zimh lorz meih. Yie nyei hnyouv ngorc haic meih, yie[157] za'gengh! oix haic meih hnangv yiem deic-bung-haanz mborngx nqaai, maiv maaih wuom nyei dorngx nor.

²Yie yiem singx dinc buatc jiex meih, buatc meih nyei qaqv caux njang-laangc.

³Weic zuqc meih ziepc zuoqv nyei hnamv mienh se gauh longx ziangh maengc, yie nyei nzuih ziouc oix ceng meih.

⁴Da'faanh corc maaih maengc nyei ziangh hoc yie oix ceng meih. Yie oix dengv meih nyei mengh sung yie nyei buoz daux gaux.

⁵Yie nyei hnyouv hnangv nyanc beuv yinh wuic nyei lai-hnaangx.[158] Yie nyei nzuih yaac oix njien-youh nyei ceng meih.

⁶Yie bueix jienv coux jangx taux meih, lungh muonz zanc yaac fei-fangv taux meih.

⁷Weic zuqc meih zanc-zanc tengx yie, yie yiem meih nyei ndaatv-ndiev nyei dongh linh njien-youh nyei baaux nzung.

⁸Yie nyei hnyouv kaux wuonv meih. Meih nyei mbiaauc jieqv buoz baav jienv yie.

⁹Oix hoic yie nyei maengc wuov deix mienh zungv oix ndortv njiec yiemh gen.[159]

¹⁰Ninh mbuo oix zuqc nzuqc ndaauv daix, zuqc hieh juv betv nyanc.

¹¹Mv baac hungh diex oix kaux Tin-Hungh njien-youh. Da'faanh ziangv jienv ninh houv waac nyei mienh oix ceng ninh, weic zuqc gorngv-baeqc wuov deix zungv zuqc nqapc jienv nzuih.