Read Iu Mien Singx Nzung 7 Bible Online

Singx Nzung 7 - Iu Mien bible

Singx Nzung 7

¹Singx Nzung 7 Laaix Mben^yaa^min Mienh, Kutv, Ndaawitv doix ZIOUV baaux naaiv diuh sikv^gaa^yon nzung.[10] O ZIOUV, yie nyei Tin-Hungh aac, meih se yie ndaauh kaux nyei dorngx. Tov njoux yie biaux ndutv zunc yie nyei mienh. Tov njoux yie cuotv daaih.

²Nziex ninh mbuo hnangv sienh nor betv yie, tor yie mingh yaac maiv maaih haaix dauh njoux.

³O ZIOUV, yie nyei Tin-Hungh aac, se gorngv yie hnangv naaiv zoux, se gorngv yie nyei buoz zoux dorngc haaix nyungc,

⁴se gorngv yie zoux waaic bun caux yie horpc nyei mienh, fai luv yie nyei win-wangv yaac maiv maaih gorn-baengx,

⁵tov bun win-wangv zunc zaaic yie, zorqv yie nyei maengc caaiv njiec ndau, bun yie nyei sin-sei[11] yiem nie-mbung.[12] Selaa

⁶O ZIOUV aac, tov meih qiex jiez jienv jiez daaih, mborqv yie nyei ciouv haic nyei win-wangv. O yie nyei Tin-Hungh aah! Tov tengx yie. Se meih ganh dingc ziangx siemv zuiz.

⁷Tov bun maanc fingx gapv zunv weih gormx meih, tov meih yiem gu'nguaaic gunv ninh mbuo.

⁸ZIOUV siemv maanc fingx. O ZIOUV aac, tov ziux yie zoux horpc nyei caux yie hnyouv zingx nyei siemv yie.

⁹Meih se zoux horpc nyei Tin-Hungh. Meih zaah mienh nyei hnyouv caux eix. Tov bun zoux orqv nyei mienh nyei jauv dangx, yaac liepc kuv mienh wuonv.

¹⁰Tin-Hungh se yie nyei torngv-baaih beu jienv yie, ninh njoux hnyouv zaqc nyei mienh.

¹¹Tin-Hungh se baengh fim nyei siemv zuiz jien, Tin-Hungh yaac hnoi-hnoi dingc[13] orqv mienh nyei zuiz.

¹²Se gorngv haaix dauh maiv goiv hnyouv, Tin-Hungh oix nzioux laic ninh nyei nzuqc ndaauv, yaac liuc leiz ziangx juang-zinx.

¹³Ninh mbenc ziangx daix mienh nyei wuoqc ginc, liuc leiz ninh maaih douz nyei forng-cang.

¹⁴Orqv mienh kungx hnamv cuotv orqv sic, maaih orqv nyei sic yiem hnyouv beiv mienh maaih gu'nguaaz, yungz cuotv daaih benx gorngv-baeqc nduov mienh nyei sic hnangv.

¹⁵Ninh wetv ziangx kuotv, wetv ndo nyei, ninh ganh yaac ndortv njiec ninh ganh wetv nyei kuotv.

¹⁶Ninh zoux nyei waaic sic daaux nzuonx daaih hoic ninh ganh. Ninh zoux doqc nyei sic kungx ndortv zuqc ninh ganh hnangv.

¹⁷Yie oix dor-ziec ZIOUV weic zuqc ninh baengh fim nyei. Yie oix baaux nzung ceng ZIOUV, Yiem Hlang Jiex Wuov Dauh, nyei mengh.