Read Iu Mien Singx Nzung 72 Bible Online

Singx Nzung 72 - Iu Mien bible

Singx Nzung 72

¹Singx Nzung 72 Saa^lo^morn zoc nyei singx nzung. O Tin-Hungh aah! Tov ceix bun hungh diex baengh fim nyei siemv hnangv meih nor, yaac bun hungh dorn hnangv meih nor, zoux duqv horpc.

²Tov bun ninh longc gong-fim siemv meih nyei baeqc fingx, yaac baengh fim nyei siemv meih nyei mienh jomc mienh.

³Weic baeqc fingx zoux horpc nyei jauv tov bun domh mbong fiuv-mbong duqv bungx-zuoqc.

⁴Tov bun hungh diex baengh fim nyei tengx baeqc fingx mbu'ndongx nyei mienh jomc mienh, njoux dangx-donx nyei mienh yaac zatv jienv zeix ninh mbuo wuov deix.

⁵Mba'hnoi caux hlaax corc yiem jienv nyei ziangh hoc, tov bun ninh mbuo taaih meih[183] taux maanc gouv maanc doic.

⁶Tov bun hungh diex hnangv mbiungc duih njiec mbietv liuz miev nyei ndau, yaac hnangv mbiungc-mbuonv puonx ndau-beih nor.

⁷Ninh yiem nyei hnoi-nyieqc, tov bun kuv mienh hiaangx jienv faaux, yaac maaih baengh orn camv ndongc maaih hlaax yiem.

⁸Tov bun ninh gunv nyei guoqv yiem naaiv bung koiv taux wuov bung koiv,[184] yiem Yu^fe^ditc Ndaaih taux jomc lungh ndiev.

⁹Tov bun yiem deic-bung-huaang nyei mienh yiem ninh nyei nza'hmien gueic njiec baaix, yaac bun ninh nyei win-wangv mbiec nie-mbung.

¹⁰Tov bun Taansitv caux zuangx koiv-nzou nyei hungh diex cuotv korx-zinh bun ninh. Yaac bun Qe^mbaa caux Se^mbaa nyei hungh diex dorh zingh nyeic bun ninh.

¹¹Tov bun zuangx hungh diex puoqv njiec ninh nyei nza'hmien, yaac bun maanc guoqv fu-sux ninh.

¹²Weic zuqc dangx-donx nyei mienh heuc jienv tov nyei ziangh hoc ninh njoux, yaac njoux mienh jomc mienh caux maiv maaih haaix dauh tengx nyei mienh.

¹³Ninh korv-lienh mau nyei mienh caux mienh jomc mienh, yaac njoux jomc kouv mienh nyei maengc.

¹⁴Ninh zuoqc ninh mbuo nyei maengc leih ndutv zuqc zeix, zuqc zoux doqc nyei jauv. Ziux ninh mangc, ninh mbuo nyei maengc funx jaaix nyei.

¹⁵Tov bun hungh diex ziangh duqv ndaauv. Tov bun ninh duqv Qe^mbaa nyei jiem. Tov bun mienh maiv dingh liouh nyei weic ninh daux gaux, yaac tov Tin-Hungh ziangh hnoi ceix fuqv bun ninh.

¹⁶Tov bun deic-bung nyei ndau cuotv laangh ziqc bungx-zuoqc, yiem mbong gu'nguaaic jiex laangc paan-paan nyei, cuotv daaih gitv yaac jauh nyei hnangv Le^mbaa^norn nyei gemh, yaac bun zingh gu'nyuoz nyei mienh hiaangx hnangv lomc huaang nyei miev nor.

¹⁷Tov bun hungh diex nyei mbuox yietc liuz yiem, ninh nyei mengh hoc yiem jienv ndongc mba'hnoi lauh. Maanc guoqv mienh oix weic hungh diex duqv fuqv, maanc fingx mienh yaac heuc ninh zoux maaih fuqv nyei mienh.

¹⁸Ceng ZIOUV, I^saa^laa^en Mienh nyei Tin-Hungh. Kungx ninh ganh haih zoux mbuoqc horngh nyei sic.

¹⁹Oix zuqc yietc liuz ceng ninh njang-laangc nyei mbuox, tov bun ninh nyei njang-laangc buangv lungh ndiev. Aamen caux Aamen.

²⁰Jetc^si nyei dorn, Ndaawitv, daux gaux nyei waac dorng mi'aqv.