Read Iu Mien Singx Nzung 73 Bible Online

Singx Nzung 73 - Iu Mien bible

Singx Nzung 73

¹Singx Nzung 73 Aasaapc zoc nyei singx nzung. Tin-Hungh za'gengh! zoux longx bun I^saa^laa^en Mienh, zoux longx bun maaih hnyouv cing-nzengc nyei mienh.

²Mv baac yie ganh aeqv, yie nyei zaux aav lamh ndiqv zuqc ndorpc, yie nyei zaux-caaiv kaav deix piatv.

³Weic zuqc yie buatc orqv mienh duqv longx wuov zanc, yie ziouc mueic jieqv zoux maux nyei mienh.

⁴Ninh mbuo daic nyei ziangh hoc maiv zuqc diev mun, ninh mbuo nyei sin yaac wangc siangx, henv nyei.

⁵Ninh mbuo maiv zuqc siouc kouv hnangv nyiec nyei mienh, yaac maiv hnangv nyiec nyei mienh zuqc zeqc naanc.

⁶Weic naaiv ninh mbuo zoux maux nyei jauv beiv jiem-limc dangh jienv jaang. Zoux doqc nyei sic buang jienv ninh mbuo hnangv zuqv lui nor.

⁷Ninh mbuo nyei hnyouv ngaengc, kungx zoux waaic nyei sic hnangv.[185] Ninh mbuo nyei hnyouv hnamv cuotv orqv nyei za'eix camv haic.

⁸Ninh mbuo jatv mienh, gorngv doqc ki mienh. Ninh mbuo ceng-hlo, gorngv oix zeix mienh.

⁹Ninh mbuo nyei nzuih gorngv doqc yiem gu'nguaaic lungh nyei Tin-Hungh. Ninh mbuo nyei mbietc zoux maux gorngv doqc lungh ndiev mienh.

¹⁰Weic naaiv baeqc fingx[186] huin nzuonx ceng ninh mbuo, lorz maiv duqv dorngx nqemh ninh mbuo.[187]

¹¹Ninh mbuo gorngv, “Tin-Hungh hnangv haaix nor haih hiuv? Yiem Hlang Jiex Wuov Dauh maaih wuonh zaang nyei fai?”

¹²Mangc maah! Orqv mienh se hnangv naaiv nor. Ninh mbuo zanc-zanc kuh yiem kuh nyanc, gunv zoux gunv benx jienv faaux.

¹³Wuov nyungc yie goux longx yie nyei hnyouv cing-nzengc yaac maiv baamz zuiz[188] se maiv lamh longc.

¹⁴Weic zuqc yie ziangh hnoi kungx zuqc kouv hnangv, ndorm-ndorm yaac zuqc dingc zuiz.

¹⁵Se gorngv yie gorngv, “Yie oix hnangv naaiv nor gorngv,” yie ziouc zuqc zoux maiv zingx bun meih nyei zuangx baeqc fingx.[189]

¹⁶Yie hnamv mangc gaax hnangv haaix nor haih bieqc hnyouv naaiv deix sic, mv baac yie gengh haiz aqc haic,

¹⁷taux yie bieqc Tin-Hungh nyei singx dinc, yie ziouc mengh baeqc orqv mienh nyei setv mueiz hnoi.

¹⁸Meih za'gengh bun ninh mbuo yiem mbiaangc nyei dorngx, bun ninh mbuo ndorpc, zuqc mietc nzengc.

¹⁹Ninh mbuo nduqc dangh hnangv zuqc mietc mi'aqv. Zuqc gamh nziex haic nyei sic guaatv ninh mbuo mingh nzengc.

²⁰Hnangv mienh mbeix buatc liuz nyie daaih maiv buatc mi'aqv. O Ziouv aah! Meih nyie daaih meih la'kuqv[190] ninh mbuo nyei fangx mi'aqv.

²¹Yie nyei hnyouv kouv wuov zanc, yie haiz hnangv mba'nziu zuqc baqv jienv mun nor.

²²Yie ziouc hngongx, maiv hiuv haaix nyungc, hnangv dauh hieh zoih yiem meih nyei nza'hmien.

²³Mv baac yie zanc-zanc caux meih yiem. Meih nanv jienv yie nyei mbiaauc jieqv buoz.

²⁴Meih tengx yie caangh laangh weic dorh yie nyei jauv. Nqa'haav meih oix zipv yie, bun yie duqv njang-laangc.

²⁵Yiem wuov gu'nguaaic lungh, cuotv liuz meih, yie maiv maaih haaix dauh. Yiem naaiv lungh ndiev, cuotv liuz meih, yie maiv oix longc haaix nyungc.

²⁶Yie nyei sin caux yie nyei hnyouv haih mau jienv njiec, mv baac Tin-Hungh se yie nyei hnyouv nyei qaqv[191] yaac yietc liuz zoux yie nyei buonc.

²⁷Mangc maah! Leih meih go nyei mienh zungv oix zuqc mietc. Meih oix mietc nzengc maiv ziepc zuoqv nyei zoux bun meih wuov deix mienh.

²⁸Mv baac yie nor, yie yiem nitv Tin-Hungh fatv se longx haic. Yie bun Ziouv TIN-HUNGH zoux yie ndaauh kaux nyei dorngx, weic bun yie zunh gorngv ninh zoux nyei yietc zungv sic.