Read Iu Mien Singx Nzung 74 Bible Online

Singx Nzung 74 - Iu Mien bible

Singx Nzung 74

¹Singx Nzung 74 Aasaapc zoc nyei matv^kin nzung. O Tin-Hungh aah! Meih weic haaix diuc yietc liuz guangc yie mbuo? Meih weic haaix diuc qiex jiez meih nyei yungh ciangv nyei ba'gi yungh hnangv cuotv douz-sioux?

²Tov meih jangx jienv meih loz-hnoi ginv daaih nyei baeqc fingx, dongh meih zuoqc nzuonx weic zoux meih ganh nzipc nyei buonc. Jangx jienv Si^on Mbong, dongh meih yiem jiex nyei dorngx.

³Tov meih laamx mingh mangc naaiv deix yietc liuz baaic huaang nyei dorngx. Win-wangv mietc nzengc yiem singx dinc nyei yietc zungv ga'naaiv.

⁴Meih nyei win-wangv yiem meih nyei wuic dorngh qaqv heuc. Ninh mbuo cie ninh mbuo ganh nyei geh faaux weic zoux jangx-hoc.

⁵Buatc ninh mbuo hnangv mienh yiem lomc yaamh bouv hngaqv ndiangx nor.[192]

⁶Yiem singx dinc gu'nyuoz yietc zungv diu daaih nyei ndiangx, ninh mbuo longc bouv longc zueih mborqv waaic nzengc.

⁷Ninh mbuo longc douz buov meih nyei singx dinc njiec taux ndau, ninh mbuo bun meih nyei Mengh yiem nyei dorngx maaih uix.

⁸Ninh mbuo yiem hnyouv hnamv, “Yie mbuo oix hingh jiex nzengc ninh mbuo.” Ninh mbuo ziouc zorqv yiem gormx deic-bung, Tin-Hungh nyei norm-norm wuic dorngh, buov nzengc.

⁹Yie mbuo maiv buatc yie mbuo nyei jangx-hoc, yaac maiv zengc yietc dauh douc waac mienh, yiem yie mbuo mbu'ndongx yaac maiv maaih haaix dauh hiuv duqv oix zuqc hnangv naaiv nor ndongc haaix lauh.

¹⁰O Tin-Hungh aah! Win-jaa oix huotv ndongc haaix lauh? Win-wangv oix yietc liuz gorngv doqc meih nyei mengh fai?

¹¹Meih weic haaix diuc nyuotv jienv buoz, se meih nyei mbiaauc jieqv buoz.[193] Meih weic haaix diuc maiv zorqv buoz yiem la'kuotv sung cuotv daaih mietc ninh mbuo?

¹²Mv baac Tin-Hungh aac, yiem loz-hnoi daaih meih zoux yie nyei hungh. Meih yiem lungh ndiev zoux gong weic njoux mienh.

¹³Meih longc meih nyei domh qaqv zorqv koiv bun nqoi, mborqv yiem koiv gu'nyuoz nyei jung-hungh[194] nyei m'nqorngv huv.

¹⁴Meih zienv Le^wi^aa^taan nyei m'nqorngv huv, yaac zorqv ninh jiu bun yiem deic-bung-huaang nyei hieh zoih[195] nyanc.

¹⁵Meih bun wuom-zingv caux ndoqv nyei wuom liouc cuotv. Zanc-zanc maaih wuom liouc jienv nyei ndaaih meih bun nqaai mingh.

¹⁶Lungh hnoi zanc benx meih nyei, lungh muonz zanc yaac meih nyei. Meih liuc leiz hlaax caux mba'hnoi.

¹⁷Ndau-beih nyei yietc zungv gapv-jaaix se meih dingc daaih. Meih yaac bun maaih haac gueix caux dong gueix.

¹⁸O ZIOUV aah! Tov meih jangx jienv win-wangv ndongc haaix huotv meih. Mienh hngongx mienh yaac gorngv doqc meih nyei mengh.

¹⁹Maiv dungx zorqv meih nyei norqc nqo[196] nyei maengc jiu bun hieh zoih. Tov maiv dungx yietc liuz la'kuqv meih nyei mienh jomc mienh nyei maengc.

²⁰Tov jangx jienv meih liepc nyei ngaengc waac weic zuqc ndau-beih norm-norm hmuangx nyei dorngx maaih zoux doqc hoic mienh nyei sic buangv nzengc.

²¹Tov maiv dungx bun zuqc zeix nyei mienh zuqc nyaiv. Tov bun mienh jomc mienh caux dangx-donx nyei mienh ceng meih nyei mengh.

²²O Tin-Hungh aah! Tov meih jiez daaih maah! Tov weic ganh caengx sic. Jangx jienv mienh hngongx mienh hnangv haaix nor ziangh hnoi huotv meih.

²³Maiv dungx la'kuqv meih nyei win-wangv qaqv heuc nyei qiex. Se meih nyei win-jaa maiv dingh liouh nyei nauc jienv heuc mbui nyei qiex.