Read Iu Mien Singx Nzung 77 Bible Online

Singx Nzung 77 - Iu Mien bible

Singx Nzung 77

¹Singx Nzung 77 Jiu bun dorh nzung nyei mienh. Ziux Ye^ndu^tun.[204]Aasaapc zoc nyei singx nzung. Yie heuc jienv jouh Tin-Hungh. Yie heuc jienv tov, ninh zungv oix muangx yie.

²Yie zuqc kouv naanc nyei hnoi-nyieqc yie lorz Ziouv, yie ziangh muonz sung jienv buoz maiv dingh liouh nyei daux gaux, mv baac maiv duqv orn hnyouv.

³Yie hnamv taux Tin-Hungh ziouc tauv domh qiex. Yie jangx taux naaiv deix jauv, haiz hnyouv mau nzengc aqv. Selaa

⁴Meih bun yie maiv haih m'njormh. Yie hnyouv nzauh kouv haic, zungv maiv haih gorngv waac.

⁵Yie hnamv taux jiex daaih nyei hnoi-nyieqc, yaac jangx zuqc loz-hnoi nyei hnyangx-daauh.

⁶Yie lungh muonz zanc yiem hnyouv hnamv,[205] yie yiem hnyouv fei-fangv yaac naaic gaax ganh,

⁷“Ziouv oix yietc liuz guangc yie mbuo, yietc liuz maiv aengx a'hneiv yie mbuo fai?

⁸Ninh yietc liuz maiv aengx hnamv yie mbuo fai? Ninh laengz nyei waac yietc liuz yietc seix baac nzengc mi'aqv fai?

⁹Tin-Hungh la'kuqv ceix en bun yie mbuo fai? Ninh qiex jiez ziouc maiv korv-lienh fai?” Selaa

¹⁰Yie aengx gorngv, “Bun yie hnyouv nzauh nyei se Yiem Hlang Jiex Wuov Dauh nyei mbiaauc jieqv buoz goiv yienc mi'aqv.[206]

¹¹Yie oix jangx taux ZIOUV zoux jiex nyei sic, za'gengh oix jangx meih loz-hnoi zoux wuov deix mbuoqc horngh nyei sic.

¹²Yie yiem hnyouv buih meih zoux nyei yietc zungv gong, yie oix longx-longx nyei hnamv taux meih zoux jiex maaih qaqv nyei sic.

¹³O Tin-Hungh aac, meih zoux nyei jauv-louc se cing-nzengc haic, maiv maaih haaix dauh zienh ndongc yie mbuo nyei Tin-Hungh hlo.

¹⁴Meih se zoux mbuoqc horngh nyei sic wuov dauh Tin-Hungh. Meih yiem maanc fingx mbu'ndongx bun ninh mbuo buatc meih nyei domh qaqv.

¹⁵Meih longc meih nyei qaqv njoux[207] meih nyei mienh, se njoux Yaakopv caux Yosepv nyei zeiv-fun. Selaa

¹⁶O Tin-Hungh aac, wuom buatc meih, wuom buatc meih wuov zanc ziouc gamh nziex. Ndo haic nyei koiv yaac dongz.

¹⁷Mbuonx dox cuotv wuom, yiem wuov lungh maaih mba'ong mbui. Mba'lingc[208] yaac njapc njapc nyei biei bung.

¹⁸Mba'ong yiem domh nziaaux-zunc mbui cuotv. Meih nyei mba'lingc bun lungh ndiev njang nzengc. Ndau-beih ndanc dongz nzengc.

¹⁹Meih nyei jauv se yiem koiv jiex, meih mingh nyei jauv gan domh wuom mingh, mv baac meih nyei zaux-mienv maiv maaih mienh buatc.

²⁰Meih dorh meih nyei baeqc fingx hnangv goux yungh mienh dorh ba'gi yungh guanh nor, yaac bangc Mose caux Aalon nyei buoz dorh.