Read Iu Mien Singx Nzung 80 Bible Online

Singx Nzung 80 - Iu Mien bible

Singx Nzung 80

¹Singx Nzung 80 Aasaapc zoc nyei singx nzung. Jiu bun dorh nzung nyei mienh. Ziux “Baeqc Horqc Biangh” nyei pou. O goux I^saa^laa^en nyei Ziouv aac,[223] dongh dorh Yosepv nyei zeiv-fun hnangv dorh ba'gi yungh wuov dauh aah! Tov baeng m'normh muangx. Meih yiem wuov deix i dauh ke^lu^mbim mbu'ndongx[224] nyei weic, tov aengv cuotv meih nyei njang,

²yiem E^faa^im, Mben^yaa^min caux Maa^natv^se Fingx nyei nza'hmien. Tov longc meih nyei domh qaqv daaih njoux yie mbuo.

³O Tin-Hungh aac, tov bun yie mbuo aengx duqv longx hnangv loz wuov nor. Tov bun meih nyei hmien aengv cuotv njang, weic bun yie mbuo duqv njoux.

⁴O ZIOUV, Nernh Jiex nyei Tin-Hungh aah! Meih oix qiex jiez meih nyei baeqc fingx daux gaux nyei waac ndongc haaix lauh?

⁵Meih zorqv wuom-mueic dorngx hnaangx bun ninh mbuo nyanc, aengx hlaau wuom-mueic camv nyei bun ninh mbuo hopv.

⁶Meih bun weih gormx yie mbuo wuov deix fingx-fingx mienh nzaeng yie mbuo nyei deic-bung. Yie mbuo nyei win-wangv lomh nzoih jatv.

⁷O Nernh Jiex nyei Tin-Hungh aac, tov bun yie mbuo aengx duqv longx hnangv loz wuov nor. Tov bun meih nyei hmien aengv cuotv njang, weic bun yie mbuo duqv njoux.

⁸Meih dorh diuh a'ngunc hmei cuotv I^yipv, meih zunc cuotv fingx-fingx mienh, zorqv naaiv diuh hmei zuangx jienv.

⁹Meih fioux ndau bun nzungh njiec ndo, hmei mbiorngz buangv deic-bung nzengc.

¹⁰Naaiv diuh hmei nzie jienv geh zorng, hmei nyei nquaah nzie jiex domh si^ndaa zongh ndiangx.

¹¹Hmei nyei nquaah mbiorngz mingh taux domh koiv, hmei nyei cunx mingh taux Yu^fe^ditc Ndaaih.

¹²Meih weic haaix diuc mborqv waaic naaiv norm laatc? Jiex jauv nyei yietc zungv mienh ziouc gaeqv biouv.

¹³Hieh dungz yiem lomc cuotv daaih caaiv waaic, yiem lomc-huaang nyei yietc zungv hieh zoih daaih nyanc aqv.

¹⁴O Nernh Jiex nyei Tin-Hungh aac, tov meih huin nzuonx. Tov yiem wuov lungh mangc buatc, aengx goux naaiv diuh a'ngunc hmei,

¹⁵dongh meih nyei mbiaauc jieqv buoz zuangx nyei a'ngunc hmei, se meih weic ganh bun hlo daaih henv nyei.

¹⁶Ninh mbuo longc douz buov naaiv diuh hmei yaac hngaqv njiec nzengc. Tov bun ninh mbuo buatc meih nyei hmien qiex jiez, ziouc mietc ninh mbuo.

¹⁷Tov bun meih nyei buoz maan jienv yiem meih nyei mbiaauc jieqv buoz nyei mienh, se dongh meih ganh liepc daaih henv wuov dauh baamh mienh.[225]

¹⁸Hnangv naaic yie mbuo ziouc yietc liuz maiv tuix nzuonx leih nqoi meih. Tov bun yie mbuo duqv maengc ziangh, yie mbuo ziouc jouh meih, kaux meih nyei mbuox.

¹⁹O Nernh Jiex nyei ZIOUV Tin-Hungh aac, tov bun yie mbuo aengx duqv longx hnangv loz wuov nor. Tov bun meih nyei hmien aengv cuotv njang, weic bun yie mbuo duqv njoux.