Read Iu Mien Singx Nzung 81 Bible Online

Singx Nzung 81 - Iu Mien bible

Singx Nzung 81

¹Singx Nzung 81 Jiu bun dorh nzung nyei mienh. Ziux gitc^titv. Aasaapc zoc nyei singx nzung. Baaux nzung ceng Tin-Hungh, yie mbuo nyei qaqv. Njien-youh nyei heuc jienv ceng Yaakopv nyei Tin-Hungh.

²Jiez gorn baaux nzung, mborqv nzoz, longc domh daanh baah caux fiuv-daanh baah patv kuh muangx nyei nzung.

³Siang-Hlaax caux ziepc hmz, dongh hlaax junh wuov hnoi, jiex zipv oix zuqc biomv nzatc.

⁴Naaiv se weic I^saa^laa^en benx diuh leiz-nyeic, benx Yaakopv nyei Tin-Hungh nyei leiz.

⁵Ninh cuotv mingh mborqv I^yipv Deic-Bung wuov zanc, ninh yiem Yosepv nyei zeiv-fun mbu'ndongx liepc naaiv diuh lingc. Yiem wuov yie mbuo duqv haiz yie mbuo muangx maiv mengh baeqc nyei waac gorngv,

⁶“Yie zorqv meih mbuo[226] nyiex hniev nyei ga'naaiv bouh njiec, yaac zorqv meih mbuo[227] nyei buoz bouh nyei ndaan bungx njiec mingh.

⁷Zuqc naanc zingh nyei ziangh hoc meih mbuo heuc, yie yaac njoux meih mbuo. Yie yiem mbuonx-jieqv, mba'ong bingx nyei dorngx, dau meih mbuo. Yie yiem Me^li^mbaa Wuom seix meih mbuo. Selaa

⁸“O yie nyei baeqc fingx aah! Muangx yie kuinx meih mbuo. O I^saa^laa^en Mienh aah! Feix duqv meih mbuo muangx yie gorngv nyei waac.

⁹Yiem meih mbuo mbu'ndongx maiv dungx maaih nyiec nyei zienh, maiv dungx gueic njiec baaix ganh fingx nyei zienh.

¹⁰Yie se ZIOUV, meih mbuo nyei Tin-Hungh, dongh dorh meih mbuo cuotv I^yipv wuov dauh. Meih mbuo oix zuqc morngx nzuih hlo nyei, yie ziouc uix meih mbuo beuv.

¹¹“Mv baac yie nyei mienh maiv muangx yie nyei waac. I^saa^laa^en Mienh zungv maiv longc yie.

¹²Yie ziouc sueih binc ninh mbuo ziux ninh mbuo hnyouv ngaengc nyei eix zoux. Sueih ninh mbuo ei ninh mbuo ganh nyei za'eix.

¹³“Feix duqv yie nyei baeqc fingx muangx yie nyei waac. Feix duqv I^saa^laa^en Mienh yangh yie nyei jauv.

¹⁴Yie ziouc siepv-siepv nyei hingh jiex ninh mbuo nyei win-wangv, huin nzuonx cau buoz mborqv ninh mbuo nyei win-jaa.

¹⁵Nzorng ZIOUV nyei mienh zungv zuqc mbaapv njiec ninh nyei nza'hmien, ninh mbuo yaac zuqc dingc zuiz taux yietc liuz.

¹⁶ZIOUV oix zorqv gauh longx jiex nyei mbiauh[228] bun meih mbuo nyanc, yaac zorqv yiem la'bieiv-mbaengx nyei mueiz-dorngh bun meih mbuo buangv hnyouv.