Read Iu Mien Singx Nzung 9 Bible Online

Singx Nzung 9 - Iu Mien bible

Singx Nzung 9

¹Singx Nzung 9[16] Jiu bun dorh nzung nyei mienh. Ziux “Dorn Zuqc Daic”[17] nyei pou. Ndaawitv zoc nyei nzung. Yie oix longc nzengc hnyouv dor-ziec ZIOUV, yie oix zunh meih zoux yietc zungv mbuoqc horngh nyei sic.

²Yie oix weic meih a'hneiv njien-youh. O Yiem Hlang Jiex Wuov Dauh aac, yie oix baaux nzung ceng meih nyei mengh.

³Yie nyei win-wangv daaux sin tuix nzuonx nyei ziangh hoc, ninh mbuo yiem meih nyei nza'hmien ndiqv zuqc ndorpc yaac zuqc mietc.

⁴Meih zueiz jienv siemv zuiz nyei weic baengh fim nyei siemv, meih yaac baengh fim siemv bun yie duqv longx.

⁵Meih hemx ganh fingx mienh, bun orqv mienh zuqc mietc. Meih sortv ninh mbuo nyei mbuox guangc taux maanc gouv maanc doic.

⁶Win-wangv zuqc baaic zuqc mbaang taux yietc liuz, meih baaic waaic ninh mbuo nyei yietc zungv zingh hnangv liemh nzungh baeng cuotv nor, liemh maiv maaih haaix dauh jangx ninh mbuo.

⁷Mv baac ZIOUV yietc liuz zueiz jienv ninh nyei weic gunv, ninh liepc ninh nyei weic daaih siemv zuiz.

⁸Ninh baengh fim nyei siemv lungh ndiev mienh, hnyouv zingx nyei siemv maanc fingx.

⁹ZIOUV zoux wuonv nyei dorngx bun zuqc zeix zuqc hoic nyei mienh kaux, zuqc kuonx naanh nyei ziangh hoc maaih lamh kaux dorngx.

¹⁰O ZIOUV aac, nyiemc meih nyei mbuox wuov deix oix kaux meih, weic zuqc meih maiv guangc lorz meih wuov deix mienh.

¹¹Oix zuqc baaux nzung ceng yiem Si^on nyei ZIOUV, oix zuqc yiem maanc fingx mbu'ndongx zunh ninh zoux nyei jauv-louc.

¹²Weic zuqc ninh zoux jaauv mienh maengc win wuov dauh,[18] yaac jangx ninh mbuo. Ninh maiv la'kuqv zuqc zeix zuqc hoic, heuc jienv tov nyei mienh.

¹³O ZIOUV aah! Tov meih korv-lienh yie. Tov meih mangc nzorng yie wuov deix mienh bun yie zuqc nyei kouv naanc. Se meih njoux yie yiem zuqc daic nyei gaengh cuotv daaih,

¹⁴weic bun yie yiem Si^on[19] nyei zingh gaengh, zunh yaangh ceng meih nyei sic, yaac orn-lorqc haic weic zuqc meih njoux yie.

¹⁵Maanc fingx mienh ndortv njiec ninh mbuo ganh wetv nyei kuotv. Ninh mbuo nyei zaux yaac zuqc ninh mbuo ganh zaeng nyei mungz nzenc jienv.

¹⁶ZIOUV bun mienh hiuv duqv ninh ganh, ninh baengh fim nyei siemv zuiz. Orqv mienh nyei buoz zoux nyei sic hlopv jienv ninh mbuo ganh. Hikv^gai^on, [20] Selaa

¹⁷Orqv mienh, se la'kuqv Tin-Hungh nyei fingx-fingx mienh, zungv zuqc mingh yiem yiemh gen.

¹⁸Ninh maiv zeiz yietc liuz la'kuqv dangx-donx nyei mienh. Mienh jomc mienh maiv zeiz yietc liuz maiv lamh hnamv dorngx.

¹⁹O ZIOUV aah! Daaih maah! Maiv dungx bun baamh mienh duqv hingh. Tov bun maanc fingx yiem meih nyei nza'hmien zuqc siemv.

²⁰O ZIOUV aah! Tov bun ninh mbuo gamh nziex. Tov bun maanc fingx zieqv duqv ninh mbuo benx baamh mienh hnangv. Selaa