Read Iu Mien Singx Nzung 92 Bible Online

Singx Nzung 92 - Iu Mien bible

Singx Nzung 92

¹Singx Nzung 92 Yietc diuh singx nzung. Dingh Gong Hnoi nyei nzung. O Yiem Hlang Jiex nyei ZIOUV aac, mienh dor-ziec, baaux nzung ceng meih nyei mengh se longx haic.

²Lungh ndorm zunh yaangh meih ziepc zuoqv hnamv mienh, lungh muonz zanc zunh yaangh meih ziepc zuoqv nyei hnyouv.

³Longc ziepc diuh finx patv nyei jaa-sic caux domh daanh baah, fiuv-daanh baah patv puix nzung nyei pou.

⁴O ZIOUV aac, meih zoux nyei sic bun yie a'hneiv, meih nyei buoz zoux nyei gong bun yie njien-youh nyei baaux nzung.

⁵O ZIOUV aac, meih zoux nyei gong za'gengh hlo haic, meih nyei hnyouv hnamv nyei sic yaac ndo.

⁶Mienh hnam mienh maiv haih hiuv, mienh hngongx mienh maiv haih mengh baeqc,

⁷maiv gunv mienh waaic mienh hnangv miev baetv cuotv, yietc zungv orqv mienh yaac duqv longx jienv faaux, ninh mbuo za'gengh oix zuqc mietc taux yietc liuz.

⁸Mv baac ZIOUV aac, meih yietc liuz duqv zoux hlo jiex.[265]

⁹O ZIOUV aac, meih nyei win-wangv, meih nyei win-jaa zungv oix zuqc mietc. Orqv mienh yietc zungv oix zuqc nzaanx.

¹⁰Meih bun yie henv hnangv hieh ngongh nor,[266] meih longc siang-youh dox jienv yie.[267]

¹¹Yie nyei m'zing duqv buatc yie nyei win-wangv suei. Yie nyei m'normh muangx haiz oix mborqv yie wuov deix orqv mienh zuqc mietc.

¹²Kuv mienh oix hnangv daau nor hiaangx, yaac hlo daaih hnangv yiem Le^mbaa^norn nyei si^ndaa zongh ndiangx nor.

¹³Ninh mbuo hnangv zuangx yiem zaangc ZIOUV nyei biauv nyei ndiangx, yiem yie mbuo nyei Tin-Hungh nyei laatc gu'nyuoz hiaangx jiez daaih.

¹⁴Ninh mbuo hnyangx-jeiv gox mv baac corc ziangh biouv, haaix zanc yaac nyiemz, maeng nyei,

¹⁵weic bun cing ZIOUV se zien nyei. Ninh se yie nyei La'bieiv, yiem ninh maiv maaih haaix nyungc maiv horpc.