Read Iu Mien Singx Nzung 94 Bible Online

Singx Nzung 94 - Iu Mien bible

Singx Nzung 94

¹Singx Nzung 94 O ZIOUV aac, meih se jaauv win nyei Tin-Hungh. Jaauv win nyei Tin-Hungh aah! Tov ziux cuotv njang daaih maah!

²Siemv lungh ndiev nyei Jien aah! Daaih maah! Daaih bun zoux maux nyei mienh duqv ziux ninh mbuo horpc zuqc duqv nyei buonc.

³ZIOUV aac, orqv mienh oix a'hneiv ndongc haaix lauh? Oix ndongc haaix lauh?

⁴Ninh mbuo bungx waac-maux. Yietc zungv zoux orqv nyei mienh ceng-hlo.

⁵O ZIOUV aac, ninh mbuo njiec qaqv zeix meih nyei baeqc fingx yaac hoic meih nzipc nyei buonc.

⁶Ninh mbuo daix auv-guaav caux yiem deic-bung nyei ganh fingx mienh, yaac daix guh hanh fu'jueiv.

⁷Ninh mbuo gorngv, “ZIOUV maiv buatc. Yaakopv nyei Tin-Hungh maiv hnamv taux.”

⁸Yiem baeqc fingx mbu'ndongx nyei mienh hngongx mienh aah! Oix zuqc hiuv aqv. Meih mbuo mbanc haic nyei mienh aah! Meih mbuo taux haaix zanc cingx guai?

⁹Tin-Hungh zeix m'normh, ninh ganh muangx maiv haiz fai? Ninh zeix m'zing, ninh ganh mangc maiv buatc?

¹⁰Ninh mborqv njaaux maanc guoqv mienh, ninh maiv zeiz oix dingc ninh mbuo nyei zuiz? Ninh njaaux baamh mienh, ninh ganh maiv maaih wuonh zaang fai?

¹¹ZIOUV hiuv duqv baamh mienh hnamv nyei sic kungx hnangv tauv yietc nzunc qiex.

¹²O ZIOUV aac, meih mborqv njaaux nyei mienh maaih orn-lorqc, se meih longc meih nyei leiz-latc njaaux nyei mienh.

¹³Yiem ninh zuqc kouv nyei hnoi-nyieqc meih bun ninh duqv fong deix, zuov wetv ziangx kuotv bun orqv mienh zuqc mietc.

¹⁴Weic zuqc ZIOUV zungv maiv guangc ninh ganh nyei baeqc fingx, ninh maiv leih guangc ninh nzipc daaih nyei buonc.

¹⁵Siemv nyei jauv ziouc aengx nzuonx daaih gan baengh fim nyei leiz. Yietc zungv hnyouv zingx nyei mienh yaac oix gan.

¹⁶Maaih haaix dauh weic yie jiez daaih ngaengc orqv mienh? Haaix dauh weic yie ngaengc jienv zoux orqv nyei mienh?

¹⁷Se gorngv ZIOUV maiv tengx yie, yie zungv siepv-siepv nyei mingh yiem sekv nzieqc nyei deic-bung.[268]

¹⁸Yie gorngv, “Yie nyei zaux caaiv piatv mi'aqv.” O ZIOUV aac, wuov zanc meih ziepc zuoqv nyei hnamv yie ziouc baav jienv yie.

¹⁹Yie maaih you-nzauh kuonx hnyouv nyei sic camv nyei ziangh hoc, meih orn yie nyei hnyouv bun yie njien-youh.

²⁰Waaic haic nyei gunv sic jien haih caux meih jiu tong nyei fai? Ninh mbuo longc leiz-nyeic zoux waaic nyei sic.

²¹Ninh mbuo gapv zunv hoic kuv mienh nyei maengc yaac dingc daix maiv zoux dorngc nyei mienh.

²²Mv baac ZIOUV se yie kaux wuonv nyei dorngx, yie nyei Tin-Hungh, se yie ndaauh kaux nyei la'bieiv.

²³Ninh oix ziux ninh mbuo zoux dorngc nyei zuiz winh bun ninh mbuo, weic ninh mbuo zoux nyei orqv sic mietc ninh mbuo. ZIOUV, yie mbuo nyei Tin-Hungh, oix mietc nzengc ninh mbuo.