Read Iu Mien Cong-Mengh Waac 11 Bible Online

Cong-Mengh Waac 11 - Iu Mien bible

Cong-Mengh Waac 11

¹ZIOUV nzorng haic waengc mienh nyei nziangx, mv baac baengh fim nyei nziangx-dorh bun ninh a'hneiv.

²Mienh zoux maux ziouc maaih nyaiv nyei sic gan jienv daaih, mv baac nyiemc ganh zoux faix nyei mienh maaih cong-mengh.

³Hnyouv zingx nyei mienh maaih ziepc zuoqv nyei jauv dorh ninh mbuo, mv baac hnyouv ngau hnyouv njuotv nyei mienh zoux maiv ziepc zuoqv nyei sic bun ganh zuqc mietc.

⁴Zuqc Tin-Hungh nouz nyei hnoi, zinh zoih tengx maiv duqv haaix nyungc, mv baac zoux duqv horpc nyei sic haih njoux mienh biaux ndutv maiv zuqc daic.

⁵Maiv maaih dorngx nqemh nyei mienh zoux hnyouv zingx, ziouc dorh ninh yangh zaqc nyei jauv, mv baac orqv mienh laaix ninh zoux nyei orqv sic bun ninh ndorpc.

⁶Hnyouv zingx nyei mienh zoux duqv horpc ziouc njoux duqv ninh, hnyouv maiv zingx nyei mienh hanc nyei sic hlopv jienv ninh.

⁷Orqv mienh daic mingh, ninh maaih lamh hnamv nyei caux jienv zuqc mietc, mienh waaic mienh hnamv oix duqv nyei yaac baaic nzengc mi'aqv.

⁸Kuv mienh duqv njoux biaux ndutv kuonx naanh, daaux nzuonx orqv mienh buangh zuqc kouv naanc.

⁹Maiv kaux Tin-Hungh nyei mienh longc nzuih gorngv nyei waac baaic waaic ninh nyei juangc laangz mienh, mv baac kuv mienh nyei wuonh zaang haih njoux duqv ninh.

¹⁰Kuv mienh duqv longx, zingh nyei mienh njien-youh, orqv mienh zuqc mietc zuangx mienh njien-youh nyei heuc.

¹¹Weic kuv mienh duqv fuqv, zingh ziouc duqv mienh taaih, mv baac laaix orqv mienh nyei nzuih gorngv nyei waac, zingh zuqc mbienv nzengc.

¹²Haaix dauh mangc piex juangc laangz mienh se hnamv maiv tong haaix nyungc nyei mienh. Mv baac bieqc hnyouv nyei mienh sekv nzieqc nyei.

¹³Jiex naaiv jiex wuov gorngv henh waac nyei mienh gorngv cuotv gem jienv nyei jauv, mv baac bungx duqv hnyouv nyei mienh gem jienv maiv horpc zuqc gorngv nyei sic.

¹⁴Maiv maaih mienh dorh, baeqc fingx ziouc zuqc baaic njiec, mv baac maaih caangh laangh nyei mienh camv, ziouc duqv baengh orn nyei yiem.

¹⁵Haaix dauh beu ganh dauh mienh zungv oix zuqc kouv aqv. Mv baac haaix dauh nzorng beu mienh nyei jauv ziouc yiem duqv wuonv.

¹⁶Hnyouv longx, nzueic nyei m'sieqv dorn duqv mienh taaih, zoux doqc nyei m'jangc dorn kungx duqv butv zoih.

¹⁷Korv-lienh mienh nyei mienh tengx ganh duqv longx, mv baac zoux doqc nyei mienh hoic zuqc ganh.

¹⁸Orqv mienh nyei gong-zinh setv mueiz se maiv duqv haaix nyungc, mv baac mienh zoux horpc nyei jauv, ndongc haaix zungv duqv zingh nyeic.

¹⁹Haaix dauh liepc hnyouv zoux kuv sic ziouc duqv maengc ziangh, haaix dauh lorz orqv nyei sic ziouc zuqc daic.

²⁰Hnyouv buv longh buv dangv nyei mienh, ZIOUV youx haic, mv baac zoux duqv horpc nyei mienh bun ninh a'hneiv.

²¹Oix zuqc hiuv dingc, orqv mienh maiv haih biaux maiv ndutv zuqc dingc zuiz, mv baac kuv mienh zungv oix duqv njoux.

²²M'sieqv dorn nzueic mv baac zieqv maiv duqv haaix nyungc horpc se hnangv norm jiem-kuing cunx jienv dungz nyei mba'zorng.

²³Kuv mienh oix nyei, setv mueiz duqv longx, orqv mienh maaih lamh hnamv nyei, setv mueiz zuqc Tin-Hungh nouz.

²⁴Maaih laanh mienh zoux hnyouv jangv yaac gunv zoux gunv butv zoih. Maaih laanh zoux hnyouv hepc, horpc zuqc bun nyei ninh maiv bun, mv baac gunv zoux gunv jomc.

²⁵Hnyouv jangv nyei mienh oix duqv bungx-zuoqc. Haaix dauh bun wuom mienh hopv, mienh ziouc bun wuom ninh hopv.[47]

²⁶Haaix dauh ngaengc jienv maiv maaic laangh ziqc, ninh zuqc mienh zioux. Haaix dauh laengz maaic ziouc duqv mienh buang waac.

²⁷Haaix dauh jienh lorz zoux longx nyei jauv ziouc duqv mienh taaih, mv baac haaix dauh lorz orqv nyei sic wuov dauh ziouc zuqc orqv sic.

²⁸Haaix dauh kaux ninh ganh nyei zinh zoih zungv zuqc ndorpc,[48] mv baac kuv mienh oix wangc siangx hnangv ndiangx-normh nyiemz.

²⁹Haaix dauh zoux bun ganh nyei hmuangv doic zuqc kouv, setv mueiz maiv duqv haaix nyungc,[49] mienh hngongx mienh yaac oix zuqc zoux cong-mengh mienh nyei bou.

³⁰Kuv mienh zoux nyei sic[50] se bun mienh maaih maengc ziangh,[51] mv baac mienh baamz leiz-latc ziouc hoic mienh guangc maengc.

³¹Se gorngv kuv mienh yiem baamh gen ziux zoux nyei winh bun ninh, orqv mienh caux zuiz-mienh ziux zoux nyei zuqc winh bun ndongc haaix camv!