Read Iu Mien Cong-Mengh Waac 16 Bible Online

Cong-Mengh Waac 16 - Iu Mien bible

Cong-Mengh Waac 16

¹Mienh yiem hnyouv daav za'eix, mv baac nzuih dau nyei waac se yiem ZIOUV daaih.[72]

²Mienh zoux nyei yietc zungv ziux ganh nyei m'zing mangc se cing-nzengc nyei, mv baac ZIOUV zaah mangc hnyouv.

³Oix zuqc zorqv meih zoux nyei nyungc-nyungc jiu bun ZIOUV, meih daav nyei za'eix ziouc liepc duqv jiez.

⁴ZIOUV zeix nyungc-nyungc weic wuov nyungc nyei eix leiz, liemh orqv mienh se weic zeqc naanc nyei hnoi.

⁵Da'faanh hnyouv maux nyei mienh ZIOUV youx haic, oix zuqc hiuv dingc, ninh zungv biaux maiv ndutv, oix zuqc dingc zuiz.

⁶Mienh ziepc zuoqv gan longx Tin-Hungh ziouc duqv zuiz guangc liuz, mienh taaih ZIOUV ziouc duqv simv nqoi orqv sic.

⁷Se gorngv mienh zoux nyei jauv bun ZIOUV a'hneiv, ZIOUV yaac bun wuov dauh nyei win-wangv caux ninh horpc.

⁸Maaih ga'naaiv zoqc mv baac zoux duqv zingx, se gauh longx maaih ga'naaiv camv mv baac zoux maiv baengh fim.

⁹Mienh nyei hnyouv daav za'eix lorz ganh nyei jauv, mv baac ZIOUV yienz ninh yangh nyei zaux-mbiec.

¹⁰Hungh diex gorngv waac maaih Tin-Hungh nyei hatc maaz. Siemv dingc nyei ziangh hoc ninh nyei nzuih yaac maiv gorngv dorngc.

¹¹Horpc nyei tin-baengh dangv caux nziangx benx ZIOUV nyei, yiem mbuoqc nyei yietc zungv dangv-dorh, nziangx-dorh se ninh zoux nyei.

¹²Hungh diex zoux orqv se gamh nziev haic nyei sic,[73] weic zuqc hungh weic bangc baengh fim nyei leiz liepc daaih.

¹³Mienh nyei nzuih gorngv zien nyei waac hungh diex a'hneiv, ninh yaac hnamv gorngv zingx nyei waac nyei mienh.

¹⁴Hungh diex qiex jiez bun cing mienh oix zuqc daic,[74] mv baac cong-mengh mienh haih donv hungh diex nyei ga'qiex.

¹⁵Hungh diex nyei hmien njang ziouc bun mienh haih duqv maengc ziangh, hungh diex horpc hnyouv se hnangv mbuonx dorh jienv cun-gen nyei mbiungc daaih nor.

¹⁶Duqv cong-mengh se gauh longx jiex duqv jiem, ginv duqv wuonh zaang se gauh longx ginv duqv nyaanh.

¹⁷Hnyouv zingx mienh gan nyei jauv-louc simv nqoi orqv sic. Haaix dauh goux longx ganh nyei jauv ziouc goux ganh nyei maengc.

¹⁸Zoux maux nyei jauv dorh mienh mingh zuqc mietc, hnyouv ceng-hlo bun mienh zuqc ndorpc.

¹⁹Nyiemc ganh zoux faix caux mienh jomc mienh yiem, gauh longx zorqv guaatv daaih nyei ga'naaiv caux zoux maux nyei mienh bun nqoi.

²⁰Haaix dauh gan longx njaaux nyei waac ziouc duqv longx, haaix dauh kaux ZIOUV yaac duqv orn-lorqc.

²¹Maaih cong-mengh nyei hnyouv, mienh heuc benx bieqc hnyouv nyei mienh. Gorngv waac longx, jaa baeng duqv mienh.[75]

²²Weic maaih cong-mengh nyei mienh, cong-mengh benx ziangh maengc nyei wuom-zingv, mv baac mienh hngongx mienh zuqc ninh mbuo hngongx nyei jauv dingc ninh mbuo nyei zuiz.

²³Cong-mengh mienh nyei hnyouv njaaux ninh gorngv waac horpc, ninh nyei nzuih gorngv nyei waac yaac gauh haih baeng duqv mienh.[76]

²⁴Gorngv waac longx se hnangv mueiz-dorngh[77] gaam nyei, bun hnyouv kuh yiem, sin yaac wangc siangx.

²⁵Maaih diuh jauv mienh funx se horpc nyei, mv baac naaiv diuh jauv setv mueiz dorh mienh mingh zuqc daic.

²⁶Mienh kouv laaix sung nzuih, ninh nyei nzuih zunc ninh mingh.

²⁷Maiv lamh longc nyei mienh daav za'eix zoux orqv sic, ninh gorngv nyei waac hnangv douz ziqv mienh.

²⁸Buv longh buv dangv nyei mienh coqv mienh nzaeng jaax. Gorngv waac-huv[78] nyei mienh hoic loz-gaeng doic bun nqoi.

²⁹Mienh doqc mienh yuoqc ninh nyei juangc laangz mienh, yaac dorh ninh yangh maiv benx nyei jauv.

³⁰Mienh nyapc m'zing ninh daav nduov mienh nyei za'eix, nqapc nzuih meix wuov dauh bun orqv sic cuotv daaih.

³¹Mba'biei baeqc se njang-laangc nyei ningv, se weic mienh yiem seix zaangc gan zoux horpc nyei jauv duqv daaih.

³²Maiv qiex jiez siepv nyei mienh se gauh longx henv nyei mienh, haih gunv duqv ganh nyei hnyouv se gauh longx mborqv duqv yietc norm zingh.

³³Mienh dingc maengc mangc,[79] mv baac dingc nyei se yiem ZIOUV daaih.