Read Iu Mien Cong-Mengh Waac 26 Bible Online

Cong-Mengh Waac 26 - Iu Mien bible

Cong-Mengh Waac 26

¹Ceng mienh hngongx mienh se maiv puix, hnangv nqaai gorng duih sorng, fai siou gaeng-zuangx nyei ziangh hoc duih mbiungc.

²Zioux mienh yaac maiv maaih gorn-baengx yaac zioux maiv zuqc, hnangv norqc meix fai norqc mba'hinx ndaix mingh ndaix daaih yaac maiv nzopc nor.

³Biaav-bin longc mborqv maaz, hanh kouv fapv lorh nyei nzuih baengx, biaav longc mborqv mienh hngongx mienh nyei diqc daanz.

⁴Maiv dungx dau mienh hngongx mienh ziux ninh hngongx nyei waac, nziex meih ganh ziouc caux ninh fih hnangv.

⁵Oix zuqc dau mienh hngongx mienh ziux ninh hngongx nyei waac, nziex ei ninh nyei m'zing mangc, ninh funx ninh ganh maaih cong-mengh.

⁶Haaix dauh bangc mienh hngongx mienh fungx fienx, se hnangv hngaqv ganh nyei zaux ndutv ziouc hoic ganh.[117]

⁷Cong-mengh waac yiem mienh hngongx mienh nyei nzuih se maiv lamh longc, hnangv zaux mbai mienh nyei zaux maiv lamh longc.[118]

⁸Ceng mienh hngongx mienh se hnangv zorqv la'bieiv hietv jienv ndopv-hlaang.[119]

⁹Cong-mengh waac yiem mienh hngongx mienh nyei nzuih, hnangv njimv yiem diuv nquin mienh nyei buoz.

¹⁰Haaix dauh cingv jiex jauv nyei mienh hngongx mienh fai diuv nquin mienh, se hnangv buonv juang-zinx nyei mienh la'guaih buonv bun zuangx mienh zuqc mun.[120]

¹¹Mienh hngongx mienh zoux hngongx nyei sic, zoux liuz aengx zoux, se hnangv juv nzuonx mingh nyanc ninh lov nyei ga'naaiv.

¹²Meih buatc mienh funx ninh ganh maaih cong-mengh fai? Mienh hngongx mienh zungv maaih lamh hnamv gauh camv ninh.

¹³Mienh lueic mienh gorngv, “Maaih sienh yiem wuov jauv! Maaih dauh sienh yiem wuov jaai-horngc.”

¹⁴Gaengh naapc hnangv haaix nor bun gaengh koi mingh koi daaih, mienh lueic mienh bueix jienv coux hnangv wuov nor mbienv mingh mbienv daaih.

¹⁵Mienh lueic mienh nyei buoz dapv bieqc nzormc, bouh faaux ganh nyei nzuih ninh zungv nqemh kouv haic.

¹⁶Mienh lueic mienh ziux ganh nyei m'zing mangc ninh maaih cong-mengh, gauh camv siec dauh dau duqv horpc nyei mienh.

¹⁷Mienh nzaeng jaax nyei sic maiv guen zuqc mbuo, mbuo yaac mingh la'nyauv, se hnangv juv jiex jauv, mienh la'guaih baeng juv nyei m'normh.

¹⁸Haaix dauh nduov ninh nyei juangc laangz mienh yaac gorngv, “Yie gorngv a'nziaauc hnangv lorqc!” Ninh se hnangv butv-ndin mienh zoi douz-baav caux forng-cang, caux bun mienh zuqc daic nyei ga'naaiv.

²⁰Maiv maaih zaangh, douz ziouc daic mi'aqv. Haaix ndau maiv maaih mienh gorngv waac-sapv waac-huv, nzaeng jaax nyei jauv ziouc dingh aqv.

²¹Nzaeng jaax nyei mienh nzaeng jaax bun sic cuotv, hnangv douz-taanx jaa jienv douz caux zaangh dapv jienv zieqc jienv douz nyei douz-nzauc.

²²Gorngv waac-sapv daanh mienh nyei waac, se hnangv duqv nyanc aax kuv nyei ga'naaiv, naqv njiec taux ga'sie.

²³Nzuih gaam hnyouv ciouv, se hnangv nie-mor nzaatv jienv liuc[121] nor.

²⁴Mienh nzorng mienh yaac longc nzuih ganh nyungc gorngv. Yiem hnyouv ninh kungx nduov mienh hnangv.

²⁵Ninh gorngv kuh muangx nyei waac meih maiv dungx sienx ninh, weic zuqc yiem ninh nyei hnyouv maaih siec nyungc[122] gamh nziev nyei sic.

²⁶Maiv gunv ninh longc guv guaix nyei za'eix buang jienv ninh nzaeng nyei jauv, ninh nyei orqv sic oix yiem mienh camv gapv zunv nyei dorngx cuotv daaih.

²⁷Haaix dauh wetv kuotv, ganh ziouc ndortv bieqc kuotv gu'nyuoz. Haaix dauh fongv la'bieiv, la'bieiv aengx oix daaux nqaang ndapv ninh.

²⁸Mienh nyei nzuih gorngv-baeqc hoic ninh nzorng nyei mienh. Longc nzuih la'guaih ceng mienh yaac baaic waaic mienh.