Read Iu Mien Cong-Mengh Waac 27 Bible Online

Cong-Mengh Waac 27 - Iu Mien bible

Cong-Mengh Waac 27

¹Maiv dungx bungx waac-maux gorngv njang hnoi nyei sic, weic zuqc meih maiv hiuv duqv yietc hnoi yietc hnoi oix maaih haaix nyungc sic cuotv.

²Bun ganh dauh ceng meih, maiv zeiz longc meih ganh nyei nzuih. Bun nyiec nyei mienh ceng meih, maiv zeiz ganh nyei nzuih ceng.

³La'bieiv se hniev, saa-ziou yaac maaih hniev-daauh, mv baac mienh hngongx mienh cuoqv mienh zungv gauh hniev naaiv deix i nyungc.

⁴Mienh nouz se ciouv, mienh qiex jiez haih baaic waaic, mv baac mienh mueic jieqv, haaix dauh haih ngaengc duqv jienv?

⁵Dorng jienv mienh gorngv-hemx, se gauh longx maiv bun mienh hiuv duqv meih hnamv ninh.

⁶Loz-gaeng doic bun meih zuqc mun se ziepc zuoqv nyei zoux, mv baac win-wangv zom hmien jiex ndaangc zien nyei jauv.

⁷Nyanc beuv nyei mienh ziouc youx mueiz-dorngh, mv baac hnyouv sie nyei mienh, liemh im nyei ga'naaiv yaac gaam nyei.

⁸Mienh leih nqoi ganh nyei biauv, se hnangv norm norqc leih nqoi ninh nyei lauz.

⁹Youh ndaang caux wuom-ndaang bun hnyouv a'hneiv. Loz-gaeng doic longc hnyouv kuinx bun hnyouv orn-lorqc.[123]

¹⁰Meih maiv dungx guangc meih nyei loz-gaeng doic caux meih nyei die nyei loz-gaeng doic. Zuqc zeqc naanc nyei hnoi yaac maiv dungx mingh meih nyei muoz-doic nyei biauv. Yiem fatv nyei juangc laangz mienh se gauh longx yiem go nyei muoz-doic.

¹¹Yie nyei dorn aac, meih oix zuqc zoux cong-mengh mienh, yaac bun yie nyei hnyouv njien-youh. Haaix dauh daanh yie, yie ziouc maaih waac dau.

¹²Mienh guai mienh buatc haih maaih sic cuotv ziouc simv nqoi, mv baac maiv hiuv haaix nyungc nyei mienh hungx jienv mingh ziouc zuqc kouv aqv.

¹³Se gorngv mienh beu ga'nyiec nyei mienh, oix zuqc zorqv laengz beu nyei mienh nyei lui daaih dorngx. Se gorngv ninh beu ganh fingx mienh, zungv oix zuqc zorqv ninh nyei lui dorngx jienv.[124]

¹⁴Haaix dauh jiez sin nziouv, qiex hlo nyei heuc jienv buang waac bun juangc laangz mienh, daaux nzuonx mienh funx benx zioux nyei waac.

¹⁵Zanc-zanc nzaeng jaax nyei m'sieqv dorn, se hnangv duih mbiungc nyei hnoi maaih mbiungc zanc-zanc ndiepv njiec, maiv dingh.

¹⁶Dangv jienv ninh se hnangv dangv jienv nziaaux, fai longc mbiaauc jieqv buoz nanv youh.

¹⁷Hnangv hlieqv nzioux hlieqv laic daaih, laanh caux laanh[125] yaac hnangv wuov nor.

¹⁸Haaix dauh goux ngongh nyorx ndiangx ziouc duqv nyanc ndiangx nyei biouv. Haaix dauh goux ninh nyei ziouv, wuov dauh ziouc duqv mienh taaih.

¹⁹Mangc wuom buatc ganh nyei hmien, mienh nyei hnyouv fih hnangv nyei bun cing mienh hnangv haaix nor.[126]

²⁰Yiemh gen caux zuqc mietc nyei mienh yiem nyei dorngx,[127] yietc liuz maiv buangv. Mienh nyei m'zing buatc oix duqv nyei, yietc liuz yaac maiv gaux.

²¹Nyaanh korqv se weic sinx nyaanh, louh se weic sinx jiem, ceng nyei waac yaac haih seix duqv cuotv mienh.

²²Maiv gunv zorqv mienh hngongx mienh caux zong muonc nyei mbiauh dapv jienv da'komv aengx longc da'juih zong, mienh hngongx mienh m'daaih hnangv naaic hngongx aqv.

²³Meih oix zuqc hiuv duqv meih nyei ba'gi yungh guanh hnangv haaix nor, yaac mangc longx meih nyei ngongh guanh,

²⁴weic zuqc zinh zoih maiv haih yietc liuz maaih. Hungh ningv yaac haih yiem taux maanc gouv maanc doic fai?

²⁵Gaatv miev-nqaai mingh, miev-lunx aengx cuotv daaih, mbong zaangc nyei lai-miev yaac siou nzengc,

²⁶wuov zanc meih ziouc duqv ba'gi yungh dorn nyei biei weic zoux meih nyei lui-houx. Yungh yaac benx lingh deic nyei jaax-zinh.

²⁷Maaih yungh nyorx gaux zoux meih nyei nyanc hopv, yaac gaux meih nyei yietc biauv mienh, liemh meih nyei m'sieqv bou.