Read Iu Mien Cong-Mengh Waac 3 Bible Online

Cong-Mengh Waac 3 - Iu Mien bible

Cong-Mengh Waac 3

¹Yie nyei dorn aah! Maiv dungx la'kuqv yie njaaux nyei waac. Meih nyei hnyouv oix zuqc gan longx yie nyei leiz-latc.

²meih yiem seix zaangc nyei hnoi-nyieqc caux hnyangx-soux ziouc haih ziangh duqv ndaauv, meih yaac haih duqv longx.

³Maiv dungx guangc hnamv nyei, ziepc zuoqv nyei jauv. Oix zuqc zorqv daaih kuangx jienv meih nyei jaang, aengx fiev jienv meih nyei hnyouv gu'nyuoz.

⁴Hnangv naaic ziux Tin-Hungh caux baamh mienh mangc, meih zoux duqv horpc yaac maaih mengh dauh longx.

⁵Oix zuqc longc nzengc hnyouv kaux ZIOUV, maiv dungx kaux ganh haih mengh baeqc.[6]

⁶Yiem meih zoux nyei diuh diuh jauv oix zuqc nyiemc ninh, ninh ziouc dorh meih yangh horpc nyei jauv-louc.[7]

⁷Maiv dungx hnamv ganh maaih cong-mengh, oix zuqc taaih ZIOUV yaac leih nqoi orqv nyei sic.

⁸Hnangv naaic ziouc hnangv longx haic nyei ndie zorc meih[8] wangc siangx, sin[9] yaac kuh yiem.

⁹Oix zuqc longc meih nyei zinh zoih caux meih nyei yietc zungv gaeng-zuangx nyei daauh torngx biouv taaih ZIOUV.

¹⁰Hnangv naaic meih nyei lamz ziouc buangv nzengc, meih nyei diuv-ongx maaih a'ngunc diuv buangv mienz cuotv.

¹¹Yie nyei dorn aah! Maiv dungx mangc piex ZIOUV mborqv njaaux nyei waac, yaac maiv dungx youx ninh gorngv-njaaux,

¹²weic zuqc ZIOUV hnamv wuov dauh ninh gorngv-njaaux wuov dauh, hnangv die gorngv-njaaux ninh a'hneiv nyei dorn.

¹³Duqv cong-mengh yaac duqv bieqc hnyouv nyei mienh, za'gengh maaih orn-lorqc,

¹⁴weic zuqc duqv cong-mengh nyei ndaauv-daauh se gauh longx jiex nyaanh, ninh duqv nyei leic gauh longx jiex jiem.

¹⁵Cong-mengh gauh jaaix jiex la'bieiv-jaaix. Meih oix duqv nyei yietc zungv ga'naaiv, maiv maaih yietc nyungc haih beiv duqv ninh.[10]

¹⁶Yiem ninh nyei mbiaauc jieqv buoz maaih siouc nyuonh ndaauv, yiem ninh nyei zaaix jieqv buoz maaih zinh zoih caux njang-laangc.

¹⁷Ninh nyei jauv se bun mienh maaih orn-lorqc, ninh nyei yietc zungv jauv-louc bun mienh duqv baengh orn.

¹⁸Cong-mengh beiv diuh ziangh maengc nyei ndiangx. Haaix dauh nanv jienv ninh, wuov dauh ziouc duqv mienh heuc orn-lorqc.

¹⁹ZIOUV longc cong-mengh liepc ndau, longc ninh nyei wuonh zaang[11] liepc lungh.

²⁰Ninh nyei wuonh zaang bun ndau-ndiev nyei wuom mbeux cuotv, bun lungh[12] maaih mbiungc-suiv ndiepv njiec.

²¹Yie nyei dorn aah! Meih oix zuqc goux jienv cong-mengh caux haih samx duqv cuotv nyei jauv. Maiv dungx bun naaiv deix i nyungc leih nqoi meih nyei m'zing-ndaangc.

²²I nyungc ziouc bun meih ziangh duqv maengc ndaauv, yaac beiv dangh jaang nzueic nyei ga'naaiv.

²³Meih ziouc baengh orn nyei gan meih nyei jauv yangh, meih nyei zaux yaac maiv ndiqv zuqc ndorpc.

²⁴Meih bueix njiec nyei ziangh hoc maiv dungx gamh nziex, meih bueix njiec, meih ziouc m'njormh duqv kuv.

²⁵Liemh zeih zuqc heiv sic maiv dungx gamh nziex, orqv mienh zuqc baaic waaic, maiv dungx gamh nziex.

²⁶Weic zuqc ZIOUV zoux meih kaux nyei dorngx, ninh oix goux jienv maiv bun meih nyei zaux caaiv zuqc hlaang hlopv.

²⁷Meih maaih banh zeic tengx mienh nyei ziangh hoc, maiv dungx ngaengc zoux longx nyei sic bun qiemx zuqc tengx nyei mienh.

²⁸Se gorngv meih ih zanc maaih jienv gaux tengx mienh nyei, maiv dungx gorngv mbuox juangc laangz mienh, “Mingh aqv, aengx daaih nzunc. Njang hnoi yie m'daaih bun meih.”

²⁹Maiv dungx daav za'eix hoic juangc laangz mienh, ninh yiem meih ga'hlen bungx hnyouv meih.

³⁰Se gorngv mienh maiv zoux haaix nyungc bun meih yaac maiv maaih haaix nyungc gorn-baengx, maiv dungx caux ninh nzaeng.

³¹Maiv dungx mueic jieqv mienh doqc mienh, maiv dungx ginv ninh nyei haaix diuh jauv.

³²ZIOUV youx haic buv longh buv dangv nyei mienh, mv baac ninh caux hnyouv zingx nyei mienh zuoqc haic.

³³ZIOUV zioux orqv mienh nyei jaa-dingh,[13] mv baac ZIOUV ceix fuqv bun kuv mienh yiem nyei dorngx.

³⁴Ninh huotv zoux maux huotv mienh nyei mienh, mv baac ninh ceix en bun nyiemc ganh zoux faix nyei mienh.

³⁵Cong-mengh mienh duqv[14] mienh taaih, mv baac mienh hngongx mienh zungv zuqc mienh mangc piex.