Read Iu Mien Cong-Mengh Waac 5 Bible Online

Cong-Mengh Waac 5 - Iu Mien bible

Cong-Mengh Waac 5

¹Yie nyei dorn aah! Oix zuqc longc hnyouv zipv yie cong-mengh nyei waac, baeng m'normh muangx yie bieqc hnyouv nyei waac.

²Hnangv naaic meih haih ei jienv guai nyei jauv, meih nyei nzuih meix beu jienv wuonh zaang.

³Weic zuqc hienx nqox nyei m'sieqv dorn nyei nzuih meix ndiepv jienv mueiz-dorngh. Ninh nyei waac[19] gauh mbiaangc ga'lanv youh,

⁴mv baac setv mueiz ninh ndongc yangh meuz im, yaac laic hnangv i maengx nzuqc laic.

⁵Ninh nyei zaux njiec mingh zuqc daic, ninh nyei zaux-mbiec hungx jienv yiemh gen mingh.

⁶Ninh yaac maiv hengx lorz duqv maengc ziangh nyei jauv. Ninh nyei jauv youh mingh youh daaih, ninh ganh yaac maiv hiuv.

⁷Yie nyei dorn aah! Ih zanc muangx yie maah! Maiv dungx bungx ndortv yie nyei nzuih gorngv nyei waac.

⁸Meih nyei jauv oix zuqc leih go naaiv dauh m'sieqv dorn, maiv dungx mingh nitv fatv ninh nyei biauv nyei gaengh.

⁹Nziex meih zorqv meih nyei njang-laangc jiu bun ganh dauh, zorqv meih nyei hnyangx-soux bun maiv korv-lienh nyei mienh.

¹⁰Nziex maiv hiuv nyei mienh nyanc nzengc meih nyei qaqv,[20] meih laauh luic duqv daaih nyei yaac bieqc ganh fingx mienh nyei biauv.

¹¹Taux meih nyei setv mueiz hnoi, orv caux sin yuqc nzengc, meih ziouc njunh jienv yiem.

¹²Meih ziouc gorngv, “Zinh ndaangc yie nzorng haic mborqv njaaux nyei jauv, yie nyei hnyouv yaac mangc piex gorngv-njaaux nyei waac.

¹³Yie maiv muangx yie nyei fin-saeng nyei waac yaac maiv bungx m'normh muangx njaaux yie wuov deix.

¹⁴Yie yiem gapv zunv nyei zuangx mienh mbu'ndongx aav lamh zuqc baaic waaic.”

¹⁵Meih oix zuqc hopv ganh nyei siou wuom-kuotv nyei wuom, hopv ganh nyei wuom-zingv[21] nyei wuom-daaih.

¹⁶Meih nyei wuom-zingv mienz cuotv ga'nyiec, meih nyei ndoqv liouc njiec jaai-horngc se horpc nyei fai?

¹⁷Kungx oix zuqc weic meih ganh nduqc dauh hnangv, maiv dungx bun ga'nyiec nyei mienh juangc jienv longc.

¹⁸Tov bun meih nyei wuom-zingv duqv fuqv, yaac a'hneiv meih lunx nyei ziangh hoc duqv daaih nyei auv.

¹⁹Ninh se nzueic haic, ziangh duqv sung nyei m'sieqv dorn.[22] Ninh nyei nyorx zanc-zanc bun meih buangv hnyouv. Ninh hnamv haic ziouc bun meih njien-youh taux daauh.

²⁰Yie nyei dorn aah! Meih fungc oix zuqc bun hienx nqox nyei m'sieqv dorn wakv meih? Weic haaix diuc qam jienv buangh liouh nyei auv?[23]

²¹Weic zuqc ZIOUV nyei m'zing mangc jienv mienh nyei jauv, ninh zaah mangc mienh nyei yietc zungv jauv-louc.

²²Orqv mienh zoux nyei orqv sic hlopv zuqc ninh, ninh nyei zuiz hnangv hlaang nor ndoh jienv ninh.

²³Ninh maiv longc mienh njaaux nyei waac ziouc zuqc daic. Laaix ninh ba'laqc hngongx, ninh zuqc mingh dorngc jauv.