Read Iu Mien Cong-Mengh Waac 7 Bible Online

Cong-Mengh Waac 7 - Iu Mien bible

Cong-Mengh Waac 7

¹Yie nyei dorn aac, meih oix zuqc ei jienv yie nyei waac, oix zuqc zorqv yie hatc nyei waac siou jienv meih nyei hnyouv.

²Oix zuqc ei jienv yie hatc nyei waac ziouc duqv maengc ziangh, goux longx yie njaaux nyei waac hnangv goux longx ganh nyei m'zing nor,[33]

³zorqv daaih ndoh jienv meih nyei buoz-ndoqv, aengx fiev jienv meih nyei hnyouv gu'nyuoz.

⁴Oix zuqc gorngv mbuox cong-mengh, “Meih zoux yie nyei dorc,” yaac heuc mengh baeqc nyei jauv zoux meih nyei loz-gaeng doic.

⁵Naaiv deix i nyungc ziouc tengx meih simv ndutv hienx nqox nyei auv, yaac biaux ndutv nzuih mbiaangc, buangh liouh nyei m'sieqv dorn.

⁶Yie yiem yie nyei biauv nyei fong muonh, mangc cuotv laan jienv nyei piaeng nyei kuotv.

⁷Yie buatc yiem maiv hiuv haaix nyungc nyei zuangx mienh gu'nyuoz, yiem mienh lunx mienh mbu'ndongx, maaih dauh mienh lunx mienh hnamv duqv hngongx haic.

⁸Ninh gan jauv mingh taux bieqc wuov dauh m'sieqv dorn nyei biauv nyei jauv-caax, aengx yangh wuov diuh jauv mingh wuov dauh nyei biauv

⁹doix lungh maanz-hmuangx, nziemx-yaangh, taux lungh muonz zanc hmuangx nyei ziangh hoc.

¹⁰Mangc maah! Maaih dauh m'sieqv dorn daaih buangh ninh, ninh zorng sin hnangv maaic sin nyei m'sieqv dorn yaac maaih guv guaix nyei hnyouv.

¹¹Ninh liaa haic, maiv hiuv duqv nyaiv, ninh nyei zaux kungx oix mingh, maiv yiem dingc biauv.

¹²Aav dangh yiem jaai-horngc, aav dangh yiem domh zuangx zaamc, yiem norm-norm jauv-caax ninh bingx jienv zuov.

¹³Ninh zorqv jienv wuov dauh mienh lunx mienh zom ninh, caux ninh gorngv yaac maiv hiuv duqv nyaiv. Ninh gorngv,

¹⁴“Yie fongc horc ziec weic jiu tong nyei ga'naaiv,[34] ih hnoi yie yaac jaauv sung yie laengz jiex nyei ngaengc waac,

¹⁵yie ziouc cuotv daaih lorz meih, qaqv lorz meih, ziouc lorz buatc aqv.

¹⁶Yie longc yiem I^yipv daaih nyei ziex setv la'maah ndie-muonc, dimc ziangx yie nyei coux.

¹⁷Yie longc mu^yorc, aa^lo ndie-ndaang, caux jieh louh ndopv bun yie nyei coux ndaang.

¹⁸Daaih maah! Yie mbuo ziangh muonz hnamv taux beuv, yaac hnamv taux lungh ndorm. Yie mbuo haih njien-youh nyei laanh hnamv laanh,

¹⁹weic zuqc yie nyei nqox maiv yiem biauv. Ninh cuotv jauv mingh go.

²⁰Ninh dorh yietc mbuoqc nyaanh mingh. Taux hlaax-junh ninh cingx nzuonx.”

²¹Naaiv dauh hienx nqox nyei auv longc waac-gaam yuoqc ninh, longc nzuih mbiaangc baeng ninh mingh.

²²Wuov dauh mienh lunx mienh liemh zeih gan jienv ninh mingh aqv, hnangv ngongh gouv mingh zuqc daix daic, hnangv njaih[35] zuqc hlaang hlopv jienv zietc nyei,

²³zuov taux forng-cang buonv bieqc ninh nyei hlan, fai hnangv norm norqc siepv-siepv nyei ndaix bieqc mungz gu'nyuoz. Ninh liemh maiv hiuv duqv ganh oix zuqc hoic maengc.

²⁴Dorn aah! Ih zanc oix zuqc muangx yie maah! Oix zuqc longc hnyouv muangx yie nyei nzuih gorngv nyei waac.

²⁵Maiv dungx bun meih nyei hnyouv huin mingh wuov dauh m'sieqv dorn nyei jauv, maiv dungx bieqc ninh nduov nyei jauv-louc.

²⁶Zuqc wuov dauh m'sieqv dorn hoic nyei mienh maiv zeiz zoqc, zuqc ninh daix daic nyei mienh za'gengh camv! haic.

²⁷Ninh nyei biauv yiem mingh yiemh gen nyei jauv, se dorh mienh njiec zuqc daic nyei mienh yiem nyei dorngx.