Read Iu Mien Cong-Mengh Waac 8 Bible Online

Cong-Mengh Waac 8 - Iu Mien bible

Cong-Mengh Waac 8

¹Cong-mengh heuc jienv maiv zeiz? Mengh baeqc nyei jauv heuc qiex hlo nyei maiv zeiz?

²Ninh yiem jauv-hlen hlang nyei dorngx, souv jienv jaapv-maaz jauv.

³Ninh yiem bieqc zingh nyei laatc gaengh ga'hlen, yiem bieqc gaengh nyei dorngx heuc mbui nyei gorngv,

⁴“Zuangx mienh aah! Yie heuc meih mbuo. Yie hungx jienv yietc zungv baamh mienh heuc.

⁵Maiv hiuv haaix nyungc nyei mienh aah! Meih mbuo oix zuqc hoqc guai. Mienh hngongx mienh aah! Meih mbuo nyei hnyouv oix zuqc mengh baeqc.

⁶Muangx maah! Yie oix gorngv longx haic nyei waac. Haaix nyungc horpc nyei oix yiem yie nyei nzuih cuotv,

⁷weic zuqc yie nyei nzuih oix gorngv zien leiz, yie nyei nzuih meix gamh nziev haic orqv nyei jauv.

⁸Yie nyei nzuih gorngv nyei yietc zungv waac horpc nyei, maiv maaih yietc deix ngau fai njuotv.

⁹Weic haih bieqc hnyouv nyei mienh, naaiv deix yietc zungv waac se zaqc nyei. Weic duqv wuonh zaang nyei mienh, naaiv deix waac se horpc nyei.

¹⁰Ginv longc yie njaaux nyei waac maiv zeiz nyaanh, ginv wuonh zaang maiv zeiz zien jiem,

¹¹weic zuqc cong-mengh se gauh longx jiex la'bieiv-jaaix, dongh meih oix nyei yietc zungv ga'naaiv maiv haih beiv duqv cong-mengh.

¹²“Yie se cong-mengh. Yie bun mienh haih hnamv duqv tong,[36] maaih wuonh zaang yaac guai.

¹³Taaih ZIOUV nyei jauv se nzorng orqv nyei sic. Yie nzorng ceng-hlo, zoux maux nyei sic, zoux orqv nyei jauv caux gorngv-baeqc nduov mienh nyei waac.

¹⁴Yie haih tengx daav za'eix, maaih cong-mengh longx. Yie haih mengh baeqc yaac maaih qaqv.

¹⁵Hungh diex bangc yie gunv. Zoux hlo nyei mienh bangc yie liepc baengh fim nyei leiz.

¹⁶Mouz dauh bieiv zeiv caux zoux hlo nyei mienh bangc yie gunv lungh ndiev.[37]

¹⁷Hnamv yie wuov deix, yie yaac hnamv ninh mbuo, jienh lorz yie wuov deix yaac lorz duqv buatc.

¹⁸Zinh zoih caux njang-laangc yiem yie, yaac maaih yiem duqv wuonv nyei fuqv-loqc caux gong-fim.[38]

¹⁹Meih yiem yie duqv daaih nyei[39] se gauh longx jiex jiem, zungv gauh longx jiex zien haic nyei jiem, yie cuotv nyei yaac gauh longx jiex zien nyaanh.

²⁰Yie yangh zoux horpc nyei jauv, gan baengh fim nyei jauv-louc.

²¹Yie bun hnamv yie wuov deix nzipc zinh zoih bun ninh siou jaaix nyei ga'naaiv nyei dorngx buangv nzengc.

²²“ZIOUV jiez gorn zoux ninh nyei gong wuov zanc, ninh zeix yie ndaangc jiex, se ninh loz-hnoi zoux daaih nyei daauh nyungc gong.

²³Yiem loz-hnoi dongh cor wuov, maiv gaengh maaih baamh gen wuov zanc ninh liepc yie jiez daaih.

²⁴Maiv gaengh maaih koiv, maiv gaengh maaih wuom camv nyei wuom-zingv yie cuotv seix daaih aqv.

²⁵Domh mbong maiv gaengh duqv yiem dingc, fiuv-mbong yaac maiv gaengh maaih, yie zungv cuotv seix.

²⁶Yie cuotv seix ndaangc Tin-Hungh zeix ndau caux lingh deic. Lungh ndiev diqv dien nyei nie-mbung yaac maiv gaengh maaih.

²⁷Ninh liepc lungh yaac guetv huing gormx koiv-minc nyei lungh gorn wuov zanc, yie yiem naaic.

²⁸Ninh bun lungh gu'nguaaic yiem duqv wuonv, yaac liepc ndau-ndiev nyei wuom-zingv wuov zanc,

²⁹ninh dingc koiv nyei gapv-jaaix weic bun wuom maiv jiex ndaangc ninh hatc nyei waac, ninh yaac liepc dingc ndau nyei gorn-ndoqv,

³⁰wuov zanc yie yiem ninh nyei ga'hlen hnangv dauh zaangc mienh. Ninh hnoi-hnoi weic yie a'hneiv, yie yaac zanc-zanc yiem ninh nyei nza'hmien njien-youh haic.

³¹Yie a'hneiv ninh nyei baamh gen,[40] yaac a'hneiv haic baamh mienh.

³²“Yie nyei dorn aac, ih zanc muangx yie maah! Ei jienv yie nyei jauv zoux wuov deix maaih orn-lorqc.

³³Oix zuqc muangx yie njaaux nyei waac ziouc duqv cong-mengh, maiv dungx bungx lorx.

³⁴Muangx yie nyei waac wuov dauh maaih orn-lorqc, ninh hnoi-hnoi yiem yie nyei gaengh ndaangc mangc, yiem yie nyei gaengh ga'hlen zuov.

³⁵Haaix dauh lorz buatc yie ziouc duqv maengc ziangh. ZIOUV yaac horpc hnyouv ninh.

³⁶Mv baac haaix dauh lorz maiv buatc yie, ziouc hoic zuqc ganh. Nzorng yie wuov deix yietc zungv a'hneiv zuqc daic nyei jauv.”