Read Iu Mien Saa^lo^morn Nyei Nzung 1 Bible Online

Saa^lo^morn Nyei Nzung 1 - Iu Mien bible

Saa^lo^morn Nyei Nzung 1

¹Saa^lo^morn gauh kuh muangx jiex nyei nzung.[1]

²Tov meih[2] longc meih nyei nzuih zom yie, weic zuqc meih hnamv yie se gauh longx a'ngunc diuv.

³Meih nzaatv sin nyei youh huonh huonh nyei ndaang, meih nyei mengh hnangv dox cuotv nyei youh ndaang, weic naaiv zuangx sieqv hnamv meih.

⁴Tov dorh yie caux meih mingh. Bun yie mbuo siepv-siepv nyei mingh maah! Hungh diex dorh yie bieqc ninh nyei gen. Yie mbuo ziouc weic meih njien-youh orn-lorqc. Yie mbuo ziouc oix ceng meih ndongc naaic hnamv yie gauh camv a'ngunc diuv-kuv. Zuangx m'sieqv dorn hnamv meih se horpc nyei.

⁵O Ye^lu^saa^lem nyei zuangx sieqv aac, maiv gunv yie jieqv, mv baac nzueic nyei, hnangv Ke^ndaa nyei ndopv-liuh yaac hnangv Saa^lo^morn nyei hungh dinc nyei mbaeqc gaengh ndie.

⁶Maiv dungx mangc piex yie weic zuqc yie jieqv. Yie jieqv weic zuqc nyutc pui. Caux yie juangc maa nyei gorx qiex jiez yie, aapv yie goux a'ngunc huingx, mv baac yie ganh nyei a'ngunc huingx yie maiv duqv goux.[3]

⁷Yie nyei hnyouv hnamv nyei mienh aah! Tov meih mbuox yie, meih yiem haaix norm dorngx bungx ba'gi yungh? Lungh aanx meih bun meih nyei ba'gi yungh hitv kuonx haaix norm dorngx? Yie weic haaix diuc oix zuqc hnangv mbiorngz jienv hmien nyei m'sieqv dorn yiem meih nyei doic nyei ba'gi yungh guanh ga'hlen?

⁸Gauh nzueic jiex nyei sieqv aac, se gorngv meih maiv hiuv nor, zimh jienv ba'gi yungh guanh nyei deih mingh. Gunv bungx meih nyei yungh yiem goux yungh mienh nyei ndopv-liuh ga'hlen.

⁹Yie hnamv nyei sieqv aah! Yie beiv meih hnangv Faalo Hungh tor cie nyei maaz nzueic.

¹⁰Meih nyei i bung kamx-bui maaih zorng nzueic nyei ga'naaiv, meih nyei jaang dangh jienv cunx daaih nyei zou-buv.

¹¹Yie mbuo oix longc jiem zoux siou-setv bun meih, aengx longc nyaanh hietv puix jienv.

¹²Hungh diex zueiz jienv ninh nyei dieh nyei ziangh hoc, yie nyei youh ndaang[4] cuotv ndaang nyei qiex buangv.

¹³Yie hnamv nyei dorn weic yie se hnangv yietc mbuoqc mu^yorc ndaang, zanc-zanc yiem yie nyei la'kuotv.[5]

¹⁴Yie hnamv nyei dorn weic yie se hnangv yietc joih fongc fin biangh yiem En Ge^ndi nyei a'ngunc huingx gu'nyuoz.

¹⁵Yie hnamv nyei sieqv aac, meih nzueic haic. Meih za'gengh! nzueic. Meih nyei m'zing hnangv baeqc gopv nor.

¹⁶Yie hnamv nyei dorn aah! Meih nzueic haic, meih za'gengh! nzueic. Mbuo nyei coux se miev-nyiemz.

¹⁷Mbuo nyei biauv nyei dungz-haengh se si^ndaa zongh ndiangx. Zongh ndiangx zoux mbuo nyei saengh siouv.[6]