Read Iu Mien Saa^lo^morn Nyei Nzung 2 Bible Online

Saa^lo^morn Nyei Nzung 2 - Iu Mien bible

Saa^lo^morn Nyei Nzung 2

¹Yie se Saalon nyei yietc norm Janx-muangz njimv biangh, benx yiem horngz nyei baeqc horqc biangh.

²Yietc norm baeqc horqc biangh yiem njimv-lomc hnangv haaix nor, yie hnamv nyei sieqv yiem zuangx sieqv mbu'ndongx yaac hnangv wuov nor.

³Yietc zungh ba'jaauh biouv yiem ndiangx-lomc gu'nyuoz hnangv haaix nor, yie hnamv nyei dorn yiem yietc zungv dorn mbu'ndongx yaac hnangv wuov nor. Yie a'hneiv zueiz jienv ninh torngv laangh nyei dorngx, seix ninh nyei biouv nyei mueix ziouc hiuv duqv gaam nyei.

⁴Ninh dorh yie bieqc ninh mbenc hnaangx hlo nyei dorngx. Yiem yie nyei m'nqorngv gu'nguaaic ninh cie geh bun cing ninh hnamv yie.

⁵Tov zorqv a'ngunc biouv-nqaai bun yie, tengx yie henv, aengx bun ba'jaauh biouv tengx yie nyei hnyouv kuh yiem, weic zuqc yie hnamv gau, benx baengc mi'aqv.

⁶Ninh nyei zaaix jieqv buoz yiem yie nyei m'nqorngv ga'ndiev, ninh nyei mbiaauc jieqv buoz qam jienv yie.

⁷O Ye^lu^saa^lem nyei zuangx sieqv aac, yie ziangv jienv lomc-huaang nyei jung njaih kuinx meih mbuo, maiv dungx la'nyauv yie mbuo, sueih yie mbuo hnamv taux buangv hnyouv.

⁸Muangx maah! Yie hnamv nyei dorn nyei qiex. Mangc maah! Ninh yiem wuov mbong gu'nguaaic biu jienv daaih, tiux jienv gan mbong-aiv daaih.

⁹Yie hnamv nyei mienh se hnangv jung yaac hnangv njaih gouv lunx. Ninh souv jienv yie mbuo nyei laatc nqa'haav maengx, ninh yiem fong muonh mangc, yiem fong muonh nyei piaeng ciepv.

¹⁰Yie hnamv nyei dorn gorngv mbuox yie, Yie hnamv nyei sieqv aac, jiez daaih maah! Yie hnamv nyei sieqv-nzueic, caux yie mingh maah!

¹¹Mangc maah! Juangv nyei ziangh hoc jiex mi'aqv. Mbiungc yaac baac mi'aqv.

¹²Biangh cuotv buangv ndau-beih, baaux nzung nyei ziangh hoc taux aqv. Haiz norqc nqo nyei qiex yiem yie mbuo nyei deic-bung heuc.

¹³Ngongh nyorx ndiangx nyei biouv jiez gorn zuoqc, a'ngunc hmei nqoi biangh, cuotv ndaang nyei qiex. Yie hnamv nyei sieqv aah! Jiez daaih maah! Yie hnamv nyei sieqv-nzueic, caux yie mingh maah!

¹⁴O yie nyei baeqc gopv aac, meih yiem la'bieiv-ngaamh, yiem wuov mbaengx-qangx, tov bun yie buatc meih nyei hmien-mueic. Tov bun yie muangx haiz meih nyei sing-qiex, weic zuqc meih nyei qiex za'gengh kuh muangx, meih nyei hmien-mueic nzueic haic.

¹⁵Oix zuqc zorqv hieh juv bun yie, se hieh juv dorn, ninh mbuo zoux waaic a'ngunc hmei. Yie mbuo nyei a'ngunc hmei yaac nqoi jienv biangh aqv.

¹⁶Yie hnamv nyei mienh se yie nyei, yie se ninh nyei. Ninh yiem baeqc horqc biangh gu'nyuoz bungx ninh nyei ba'gi yungh guanh.

¹⁷O yie hnamv nyei dorn aac, zuov lungh ndorm laangh nyei nziaaux buonc, hmuangx nyei dongh linh mitc mi'aqv. Gunv nzuonx aqv, hnangv dauh jung, hnangv njaih gouv lunx yangh mbong-citv[7] gu'nguaaic mingh.