Read Iu Mien Saa^lo^morn Nyei Nzung 3 Bible Online

Saa^lo^morn Nyei Nzung 3 - Iu Mien bible

Saa^lo^morn Nyei Nzung 3

¹Yie lungh muonz zanc bueix jienv coux, lorz yie nyei hnyouv hnamv wuov dauh. Yie lorz ninh yaac lorz maiv buatc.[8]

²Yie gorngv, “Yie ih zanc oix jiez sin daaih youh zingh gu'nyuoz, gan jaai-horngc caux domh zuangx zaamc mingh. Yie oix lorz yie nyei hnyouv hnamv wuov dauh.” Yie ziouc lorz mv baac lorz maiv buatc.

³Zuov zingh nyei mienh gan ninh mbuo zuov nyei dorngx mingh ninh mbuo buangh zuqc yie. Yie naaic ninh mbuo, “Meih mbuo buatc yie nyei hnyouv hnamv wuov dauh dorn nyei fai?”

⁴Yie jang-jang jiex ninh mbuo ziouc lorz buatc yie nyei hnyouv hnamv wuov dauh. Yie nanv jienv ninh, maiv bungx taux yie dorh mingh yie nyei maa nyei biauv, dorh bieqc yie cuotv seix nyei gen.[9]

⁵O Ye^lu^saa^lem nyei zuangx sieqv aac, yie ziangv jienv lomc-huaang nyei jung njaih kuinx meih mbuo, maiv dungx la'nyauv yie mbuo, sueih yie mbuo hnamv taux buangv hnyouv.

⁶Naaiv haaix nyungc yiem deic-bung-huaang daaih buatc hnangv douz-sioux-don nor? Maaih mu^yorc caux faan^gen^sen nyei qiex ndaang, yaac maaih saeng-eix mienh nyungc-nyungc ndaang nyei ga'naaiv nyei qiex.

⁷Mangc maah! Se Saa^lo^morn nyei jiuc. Maaih luoqc ziepc dauh henv nyei jun-baeng, se I^saa^laa^en Mienh nyei jun-baeng weih gormx.

⁸Yietc zungv nanv nzuqc ndaauv, benx mborqv jaax liouc nyei baeng. Dauh dauh nyei jaaiv cipv jienv nzuqc ndaauv, mbungh lungh muonz zanc cuotv nyei heiv sic.

⁹Saa^lo^morn Hungh longc Le^mbaa^norn nyei ndiangx weic ganh zoux norm jiuc.

¹⁰Jiuc nyei ndiouh longc nyaanh zoux, longc jiem zoux bueic nyei dorngx, zueiz nyei dorngx longc setv luoqc nyei ndie, Ye^lu^saa^lem nyei zuangx sieqv longc hnyouv zorng gu'nyuoz.

¹¹O Si^on nyei zuangx sieqv aac, meih mbuo cuotv daaih mangc Saa^lo^morn Hungh maah! Ninh ndongx jienv hungh ningv, se ninh gitv huon nyei hnoi, ninh nyei hnyouv a'hneiv nyei hnoi, ninh nyei maa bun[10] ninh ndongx nyei hungh ningv.