Read Iu Mien Saa^lo^morn Nyei Nzung 4 Bible Online

Saa^lo^morn Nyei Nzung 4 - Iu Mien bible

Saa^lo^morn Nyei Nzung 4

¹Yie hnamv nyei sieqv aac, meih nzueic haic, meih za'gengh! nzueic. Yiem meih nyei mbiorngz hmien ndie gu'nyuoz meih nyei m'zing hnangv baeqc gopv nor. Meih nyei mba'biei hnangv yietc guanh yungh njiec Gi^le^aatc Mbong nyei mbaiv.

²Meih nyei nyaah hnangv siang-japv liuz, coqv hoqc nzaaux nzengc nyei ba'gi yungh nyeiz baeqc. Yietc zungv benx yietc sung yietc doix, yaac maiv caa yietc norm.[11]

³Meih nyei nzuih meix hnangv siqv-hongc nyei suix, meih nyei nzuih za'gengh nzueic haic. Meih nyei kamx-bui hnangv i maengx ziqc liouh biouv yiem meih nyei mbiorngz hmien ndie gu'nyuoz.

⁴Meih nyei jaang hnangv Ndaawitv Hungh zoux siou mborqv jaax nyei ga'naaiv nyei laauh,[12] yaac hnangv kuangx jienv henv haic nyei baeng nyei yietc cin norm torngv-baaih.

⁵Meih nyei i norm nyorx hnangv yietc doix njaih dorn, se njaih nyeiz njiec nyei sung-dorn, yiem baeqc horqc biangh gu'nyuoz lorz nyanc.

⁶Zuov lungh ndorm laangh nyei nziaaux buonc, hmuangx nyei dongh linh mitc mi'aqv, yie oix gaanv mingh taux maaih mu^yorc nyei mbong, taux maaih faan^gen^sen nyei mbong-aiv.

⁷O yie hnamv nyei sieqv aac, meih za'gengh nzueic haic. Maiv maaih dorngx nqemh aqv.

⁸Yie nyei siang-mbuangz aac, tov caux jienv yie leih nqoi Le^mbaa^norn tov caux jienv yie leih nqoi Le^mbaa^norn maah! Leih nqoi Aa^maa^naa nyei mbong-ningv, leih nqoi Seni caux Hemon nyei mbong-ningv, leih nqoi sienh nyei kuotv, caux maaih nda'maauh mbeux nyei mbong.

⁹Yie nyei muoc,[13] yie nyei siang-mbuangz aac, meih nimc yie nyei hnyouv mi'aqv. Meih bungx m'zing mangc yietc mueic, longc meih nyei yietc diuh jiem-limc nimc yie nyei hnyouv mi'aqv.

¹⁰Yie nyei muoc, yie nyei siang-mbuangz, meih hnamv yie se za'gengh longx haic,[14] meih hnamv yie se gauh longx a'ngunc diuv, meih nyei youh ndaang nyei qiex yaac gauh ndaang jiex yietc zungv laapc liuc.

¹¹Yie nyei siang-mbuangz aac, meih nyei nzuih meix hnangv mueiz-dorngh oix ndiepv nor, meih nyei mbietc ga'ndiev se hnangv ngongh nyorx caux mueiz-dorngh, meih nyei lui-houx ndaang hnangv Le^mbaa^norn nyei qiex ndaang.

¹²Yie nyei muoc, yie nyei siang-mbuangz aac, meih se yietc norm forv jienv nyei huingx, weih jienv nyei wuom-nyuonh, mborqv jienv yienx nyei wuom-zingv.

¹³Meih nyei huingx zuangx ziqc liouh ndiangx,[15] yaac maaih nyungc-nyungc longx jiex nyei biouv, maaih fongc fin biangh caux naa^ndaa,

¹⁴maaih naa^ndaa caux saa^fon biangh,[16] maaih zaah nqaan caux jieh louh ndiangx, caux yietc zungv zoux hung nyei ndiangx-ndaang. Yiem wuov maaih mu^yorc caux aa^lo ndie-ndaang, aengx maaih yietc zungv zaangc horngh ndaang nyei ga'naaiv.

¹⁵Meih se hnangv huingx nyei wuom-nyuonh, hnangv liouc cuotv nyei wuom-zingv, yaac hnangv Le^mbaa^norn liouc njiec nyei suang-suiv.

¹⁶O baqv bung nziaaux aah! Nyie daaih maah! Naamh bung nziaaux aah! Buonc daaih maah buonc yie nyei huingx weic buonc huingx ndaang nyei qiex nzaanx cuotv mingh. Bun yie hnamv nyei mienh daaih bieqc ninh nyei huingx, nyanc huingx gauh longx jiex nyei biouv.