Read Iu Mien Saa^lo^morn Nyei Nzung 5 Bible Online

Saa^lo^morn Nyei Nzung 5 - Iu Mien bible

Saa^lo^morn Nyei Nzung 5

¹Yie nyei muoc, yie nyei siang-mbuangz aac, yie bieqc yie nyei huingx, yie siou yie nyei mu^yorc caux yie nyei ndaang nyei ga'naaiv. Yie nyanc yie nyei mueiz-dorngh caux yie nyei mueiz-pengx. Yie hopv liuz yie nyei a'ngunc diuv caux ngongh nyorx aqv. O a'nziaauc doic aah! Gunv nyanc gunv hopv. O meih mbuo yietc zungv hnamv jaax nyei mienh aac, gunv hopv taux beuv.

²Yie m'njormh mi'aqv, mv baac yie nyei hnyouv ging jienv nyei. Muangx maah! Yie hnamv nyei mienh ngaengv gaengh. Yie nyei muoc, yie hnamv nyei sieqv, yie nyei norqc nqo, yie nyei dunh yunh nyei mienh aah! Tov tengx yie koi gaengh weic zuqc yie nyei m'nqorngv zuqc mbiungc-suiv ndorn nzengc, yie nyei mba'biei zuqc lungh muonz zanc nyei mouc-yiez pinx hnam.

³Yie jaiv nqoi lui-houx, yie hnangv haaix nor aengx haih zuqv jienv? Yie nzaaux liuz zaux, yie weic haaix diuc oix zuqc aengx bun, yie nyei zaux laih hlopv?

⁴Yie hnamv nyei mienh sung ninh nyei buoz bieqc gaengh sorn nyei kuotv, yie nyei hnyouv haiz a'hneiv haic.

⁵Yie jiez sin daaih oix koi gaengh bun yie hnamv nyei mienh bieqc. Yie nyei buoz maaih mu^yorc ndiepv njiec. Yie nyei buoz-ndoqv maaih mu^yorc wuom ndiepv jienv gaeng-sorn.

⁶Yie weic yie hnamv nyei mienh koi gaengh. Mv baac ninh mingh mi'aqv. Ninh gorngv waac wuov zanc yie nyei hnyouv zungv gan ninh mingh. Yie lorz ninh, mv baac lorz maiv buatc. Yie heuc ninh, mv baac ninh maiv dau.

⁷Zuov zingh nyei mienh youh jienv zingh mingh ninh mbuo buangh zuqc yie. Ninh mbuo mborqv yie, bun yie zuqc mun. Zuov zingh laatc nyei mienh yaac caangv yie buix nyei lui-ndaauv mi'aqv.

⁸O Ye^lu^saa^lem nyei zuangx sieqv aah! Yie jaa waac meih mbuo. Se gorngv meih mbuo buatc yie hnamv nyei dorn, tov mbuox ninh, weic zuqc yie hnamv gau ninh, benx baengc mi'aqv.

⁹O yiem zuangx sieqv mbu'ndongx gauh nzueic jiex nyei sieqv aac, meih hnamv wuov dauh maaih haaix nyungc gauh longx ganh dauh? Meih hnamv wuov dauh maaih haaix nyungc gauh longx ganh dauh meih cingx daaih hnangv naaiv nor jaa waac yie mbuo?

¹⁰Yie hnamv wuov dauh nzueic baetv-baetv, ziangh duqv henv. Beiv yietc waanc dauh ninh gauh longx jiex.

¹¹Ninh nyei m'nqorngv hnangv zien jiex nyei jiem, ninh nyei mba'biei nyuotv-nyuotv, jieqv nyei, hnangv norqc aa.

¹²Ninh nyei m'zing hnangv yiem wuom-hlen nyei baeqc gopv, hnangv longc ngongh nyorx nzaaux yaac puix duqv horpc.[17]

¹³Ninh nyei kamx-bui hnangv hun zuangx ndaang nyei miev buangv, ninh nyei nzuih meix hnangv baeqc horqc biangh ndiepv mu^yorc wuom.

¹⁴Ninh nyei buoz hnangv jiem-guaengv, dangh jienv jaaix nyei, nzueic nyei ga'naaiv. Ninh nyei sin hnangv diu daaih nyei zaangz-nyaah, zorng jienv mbanv mbuov, nzang nyei la'bieiv-jaaix.

¹⁵Ninh nyei zaux hnangv la'bieiv-mau nyei ndiouh, don jienv jiem-taapv gu'nguaaic. Ninh nyei fangx zeiv hnangv Le^mbaa^norn Mbong, hnangv gauh longx jiex nyei si^ndaa zongh ndiangx.

¹⁶Ninh nyei waac[18] za'gengh gaam haic, ziangh dauh mienh maaih yuoqc fei fangx. O Ye^lu^saa^lem nyei zuangx sieqv aah! Naaiv se yie hnamv nyei mienh. Naaiv se yie nyei doic.