Read Iu Mien I^saa^yaa 10 Bible Online

I^saa^yaa 10 - Iu Mien bible

I^saa^yaa 10

¹Liepc maiv baengh fim nyei leiz-latc caux fiev[48] bun mienh zuqc zeix nyei leiz wuov deix oix zuqc kouv aqv.

²Meih mbuo oix bun dangx-donx nyei mienh maiv duqv baengh fim nyei leiz, oix kuei yie nyei baeqc fingx nyei mienh jomc mienh, maiv bun ninh mbuo duqv horpc zuqc duqv nyei leiz. Weic bun auv-guaav dorngx luv nyei ga'naaiv, yaac bun guh hanh fu'jueiv dorngx caangv daaih nyei ga'naaiv.

³Taux dingc zuiz nyei hnoi, zuqc zeqc naanc yiem go nyei daaih, meih mbuo hnangv haaix nor zoux? Meih mbuo oix biaux mingh lorz haaix dauh tengx? Meih mbuo nyei zinh zoih meih mbuo oix siou haaix?

⁴Cuotv liuz meih mbuo zuqc caux caangv mingh nyei mienh, fai mborqv jaax zuqc daix daic, maiv zengc haaix nyungc aqv. Maiv gunv hnangv naaic, ninh nyei ga'qiex corc maiv fiu. Ninh corc sung jienv ninh nyei buoz.

⁵“Atc^si^lie Mienh oix zuqc kouv aqv. Yie longc ninh mbuo dorngx biaav mborqv yie qiex jiez wuov fingx mienh, yie longc ninh mbuo dorngx nanv ndiangx-ndonx mborqv yie nouz nyei mienh.

⁶Yie oix paaiv Atc^si^lie Mienh mingh mborqv maiv gan Tin-Hungh nyei yietc guoqv mienh. Yie paaiv ninh mbuo mingh mborqv cuoqv yie qiex jiez nyei yietc fingx mienh, weic luv yaac caangv ninh mbuo nyei ga'naaiv, yaac caaiv ninh mbuo njiec hnangv caaiv yiem hei-horngc nyei wuom-bamc.

⁷Mv baac Atc^si^lie Hungh nyei hnyouv maiv zeiz hnangv naaiv nor hnamv. Yiem hnyouv ninh maiv zeiz oix hnangv naaic zoux. Ninh nyei za'eix se ninh oix mietc, oix bun ziex norm guoqv zutc nzengc.

⁸Ninh gorngv, ‘Yie nyei baeng-bieiv[49] yietc zungv zoux hungh maiv zeiz?

⁹Kaanno Zingh zuqc kouv hnangv Kaan^ke^mitv Zingh maiv zeiz? Haamatv zuqc hnangv Aanbatc Zingh maiv zeiz? Saa^maa^lie yaac zuqc hnangv Ndaa^matv^gatc Zingh maiv zeiz?

¹⁰Hnangv yie sung buoz mborqv zaangc miuc-fangx wuov deix guoqv, wuov deix guoqv maaih zuqc daaih nyei miuc-fangx gauh camv[50] yiem Ye^lu^saa^lem caux Saa^maa^lie.

¹¹Wuov nyungc, yie maiv zeiz haih zoux bun Ye^lu^saa^lem caux ninh nyei miuc-fangx, hnangv yie zoux bun Saa^maa^lie caux ninh nyei miuc-fangx fai?’+”

¹²Ziouv yiem Si^on Mbong caux Ye^lu^saa^lem zoux ziangx ninh nyei yietc zungv gong, ninh ziouc gorngv, “Yie oix dingc Atc^si^lie Hungh nyei zuiz, weic zuqc ninh hnyouv maux, ceng ganh hlo, m'zing-jaax hlang.

¹³Weic zuqc ninh gorngv, “+‘Yie longc yie nyei buoz nyei qaqv hnangv naaiv nor zoux. Yie kaux yie ganh nyei cong-mengh weic zuqc yie maaih wuonh zaang. Yie suiv guoqv nyei gapv-jaaix, yaac caangv ninh mbuo nyei zinh zoih. Hnangv dauh henv haic nyei mienh,[51] yie bun ninh mbuo nyei hungh diex tuix weic.

¹⁴Hnangv mienh lom bieqc norqc lauz, yie nyei buoz lom bieqc norm-norm guoqv zorqv ninh mbuo nyei zinh zoih. Hnangv mienh nzauz norqc guangc nyei jaux, yie yaac duqv nzengc ziangh norm lungh ndiev. Maiv maaih yietc kuaaiv ndaatv dongz, fai yietc sung nzuih heuc.’+”

¹⁵Bouv ceng ganh gauh hlo longc bouv goix ndiangx wuov dauh fai? Njoux ceng ganh gauh hlo longc njoux wuov dauh fai? Biaav maiv haih nanv mienh, se mienh nanv biaav. Ndiangx-ndonx maiv haih nanv mienh, se mienh nanv ndiangx-ndonx.

¹⁶Weic naaiv Ziouv, Nernh Jiex nyei ZIOUV, oix bun Atc^si^lie junc haic[52] nyei baeng butv baengc-ngaaiz. Ninh mbuo nyei sin ziouc hnangv maaih douz zieqc daaih, hnangv buov jienv nor.

¹⁷I^saa^laa^en nyei Njang ziouc benx douz. Ninh mbuo nyei Cing-Nzengc Tin-Hungh benx douz-mbietc. Yiem yietc hnoi hnangv ninh oix zorqv Atc^si^lie Hungh nyei njimv-cou njimv-muonc buov qui nzengc.

¹⁸Ninh nyei gemh lomc caux ndau-touv longx nyei ndeic nyei njang-laangc,[53] ZIOUV yaac oix buov qui nzengc, hnangv mienh butv baengc-ngaaiz mi'aqv

¹⁹ninh nyei gemh lomc zengc njiec nyei ndiangx zoqc haic, liemh fu'jueiv haih saauv[54] duqv nzengc nyei.

²⁰Taux wuov hnoi, I^saa^laa^en zengc njiec nyei mienh, se Yaakopv nyei zeiv-fun, duqv maengc cuotv wuov deix, yiem naaiv mingh maiv kaux mborqv ninh mbuo wuov deix, mv baac ninh mbuo oix ziepc zuoqv nyei kaux ZIOUV, I^saa^laa^en nyei Cing-Nzengc Tin-Hungh.

²¹Maaih zengc njiec nyei mienh oix nzuonx daaih lorz Henv Haic nyei Tin-Hungh, se Yaakopv nyei zeiv-fun zengc njiec nyei mienh oix nzuonx.

²²O I^saa^laa^en Mienh aac, maiv gunv meih mbuo nyei mienh ndongc koiv nyei saa-ziou camv, kungx maaih zengc njiec nyei mienh duqv nzuonx hnangv. Zuqc mietc nyei jauv dingc ziangx aqv, ziux horpc zuqc duqv nyei oix zuqc winh bun ninh mbuo, hnangv wuom buangv mienz nor.

²³Weic zuqc Ziouv, Nernh Jiex nyei ZIOUV, zungv oix zoux ziux ninh dingc ziangx nyei zoux bun ziangh norm deic-bung.[55]

²⁴Weic naaiv, Ziouv, se Nernh Jiex nyei ZIOUV, hnangv naaiv nor gorngv, “O yie nyei baeqc fingx, yiem Si^on nyei mienh aah! Maiv dungx gamh nziex Atc^si^lie Mienh. Ninh mbuo longc biaav mborqv meih mbuo, aengx yaamh ndiangx-ndonx, hnangv I^yipv Mienh zoux nor.

²⁵Yie qiex jiez meih mbuo nyei jauv maiv lauh baac mi'aqv. Yie ziouc nouz ninh mbuo aengx bun ninh mbuo zuqc mietc.”

²⁶Nernh Jiex nyei ZIOUV ziouc longc biaav-bin mborqv ninh mbuo, hnangv yiem Olepv nyei la'bieiv mborqv Mi^ndien Mienh. ZIOUV oix sung ninh nyei biaav-mbiaac yiem wuom gu'nguaaic, hnangv ninh yiem I^yipv zoux wuov nor.

²⁷Taux wuov hnoi, Atc^si^lie Mienh bun meih mbuo ndaam nyei ndaamx duqv yiem meih mbuo nyei mba'dauh bouh njiec. Gaaz nyei ndiangx-gaaz zungv zuqc wuotv nauv, maiv yiem meih mbuo nyei jaang aqv.[56]

²⁸Atc^si^lie nyei baeng taux Ai^yaatv Zingh, aengx jiex Migon Zingh, yaac zorqv ninh mbuo nyei ga'naaiv an jienv Mikv^maatv mi'aqv.

²⁹Ninh mbuo jiex tong mbong-qangx, bueix muonz Ge^mbaa. Laamaa Zingh nyei mienh sin zinx nzengc, Saulo nyei Gi^mbe^aa Zingh nyei mienh biaux mi'aqv.

³⁰Ganlim Mienh[57] aah! Heuc mbui nyei maah! Laisaa Mienh aah! Muangx maah! Aa^naa^totv Mienh aah! Za'gengh korv-lienh nyei.

³¹Matv^me^naa Mienh biaux mi'aqv. Ge^mbim nyei baeqc fingx lorz dorngx bingx.

³²Ih hnoi win-wangv[58] oix yiem Nopv Mungv, nyuotv buoz-juonh bun Si^on Mienh[59] yiem nyei mbong, se Ye^lu^saa^lem yiem nyei mbong.

³³Mangc maah! Ziouv, Nernh Jiex nyei ZIOUV, oix longc domh qaqv hngaqv ndiangx-nquaah ndaauv ndutv. Hlang jiex nyei ndiangx zungv zuqc goix nauv, hlang haic nyei ndiangx oix zuqc goix njiec.

³⁴Ninh yaac oix longc bouv goix gemh lomc. Le^mbaa^norn nyei domh ndiangx yaac oix zuqc Henv Haic Wuov Dauh goix.