Read Iu Mien I^saa^yaa 25 Bible Online

I^saa^yaa 25 - Iu Mien bible

I^saa^yaa 25

¹O ZIOUV aac, meih se yie nyei Tin-Hungh. Yie oix taaih meih yaac ceng meih nyei mengh, weic zuqc meih zoux mbuoqc horngh nyei sic, ziux meih loz-hnoi dingc daaih nyei za'eix ziepc zuoqv, dunh yunh nyei zoux ziangx.

²Meih bun zingh benx ga'naaiv-ndui, weih wuonv nyei zingh zuqc baaic waaic. Meih bun ganh fingx mienh wuonv nyei zingh[121] yiem naaiv mingh maiv haih benx zingh, yietc liuz maiv duqv aengx ceix jiez.

³Weic naaiv henv nyei mienh maanh oix ceng meih, mienh doqc mienh nyei guoqv nyei zingh oix taaih meih.

⁴Weic zuqc meih zoux mienh jomc mienh ndaauh kaux nyei dorngx, yaac zoux dorngx bun dangx-donx mienh zuqc kouv nyei ziangh hoc kaux wuonv, aengx benx bingx domh nziaaux nyei dorngx, yaac tengx mienh bingx nyutc torngv laangh. Weic zuqc mienh doqc mienh nyei qiex se hnangv domh nziaaux buonc zingh laatc,

⁵yaac hnangv deic-bung-haanz jorm nyei qiex. Meih dangv jienv ganh fingx mienh mbui nyei qiex. Mbuonx torngv jienv bun yuoqv nyei qiex hnangv haaix nor sienc mingh, mienh doqc mienh nyei qiex hnangv wuov nor sekv mi'aqv.

⁶Yiem naaiv norm mbong[122] gu'nguaaic, Nernh Jiex nyei ZIOUV oix weic maanc fingx, mbenc longx jiex nyei lai-hnaangx, maaih siou jienv lauh nyei a'ngunc diuv, se longx jiex nyei diuv caux longx jiex nyei nyanc hopv.[123]

⁷Yiem naaiv norm mbong ninh oix mietc torngv maanc fingx nyei ga'naaiv, caux mbiorngz maanc guoqv mienh nyei ndie.[124]

⁸Ninh oix naqv zuqc daic nyei qaqv taux yietc liuz. Ziouv TIN-HUNGH oix sortv nqoi mouz dauh mienh nyei wuom-mueic. Ninh nyei baeqc fingx yiem gormx lungh ndiev zuqc diev nyaiv, Tin-Hungh oix zorqv nqoi. Naaiv se ZIOUV gorngv nyei waac.

⁹Taux wuov hnoi mienh oix gorngv, “Naaiv se yie mbuo nyei Tin-Hungh. Yie mbuo zuov jienv ninh weic bun ninh njoux yie mbuo. Naaiv se ZIOUV, yie mbuo m'daaih zuov ninh. Yie mbuo oix zuqc weic ninh nyei njoux en a'hneiv, orn-lorqc.”

¹⁰ZIOUV nyei buoz oix yiem naaiv norm mbong, mv baac Mo^apc Mienh oix yiem ganh nyei dorngx zuqc caaiv njiec, hnangv mbiauh nqaauv zuqc caaiv njiec nqaiv-ndui gu'nyuoz.

¹¹Ninh ziouc yiem naaic gu'nyuoz sung buoz cuotv hnangv ziouh wuom mienh sung buoz cuotv ziouh wuom nor. Mv baac Tin-Hungh oix bun ninh mbuo zoux maux nyei jauv, caux ninh mbuo nyei buoz nyei buoz-dauh zoux nyei,[125] ndortv njiec aiv.

¹²Meih mbuo wuonv nyei, hlang nyei zingh laatc ninh oix caeqv njiec, mbaang njiec taux ndau, zungv njiec taux nie-mbung.