Read Iu Mien I^saa^yaa 3 Bible Online

I^saa^yaa 3 - Iu Mien bible

I^saa^yaa 3

¹Mangc maah! Ziouv, se Nernh Jiex nyei ZIOUV, oix yiem Ye^lu^saa^lem caux Yu^ndaa zorqv cuotv mienh kaux nyei caux qiemx longc nyei, se zorqv cuotv maaih nyei yietc zungv nyanc hopv ga'naaiv caux maaih nyei yietc zungv wuom.

²Zorqv cuotv henv haic nyei baeng caux mborqv jaax baeng, siemv zuiz jien caux douc waac mienh, mbouv guaax mienh caux mienh gox,

³gunv hmz ziepc dauh baeng nyei baeng-bieiv caux zoux hlo nyei mienh, caangh laangh mienh caux zoux huaax-nyinz nyei mienh guai mienh caux haih zoux faatv nyei mienh.

⁴ZIOUV gorngv, “Yie oix bun houh saeng benx ninh mbuo nyei jien, bun fu'jueiv gunv ninh mbuo.[10]

⁵Baeqc fingx oix zuqc zeix, laanh oix zeix laanh, gorqv-mienh oix zeix gorqv-mienh nyei juangc laangz mienh. Mienh lunx mienh oix mangc piex mienh gox mienh. Haac horngh mienh yaac oix mangc piex zaangc horngh nyei mienh.[11]

⁶Mienh oix zorqv dauh ganh nyei gorx-youz yiem ninh nyei die nyei biauv ziouc gorngv, “Meih maaih deix domh lui. Meih oix zuqc zoux yie mbuo nyei bieiv zeiv. Naaiv ndui baaic waaic nyei dorngx ziouc guei meih nyei buoz-ndiev.”

⁷Taux wuov hnoi ninh ziouc gorngv cuotv, “Yie maiv haih tengx meih mbuo zorc. Yie nyei biauv maiv maaih nyanc hopv, yaac maiv maaih domh lui, meih mbuo maiv dungx orn yie zoux baeqc fingx nyei bieiv zeiv.”

⁸Ye^lu^saa^lem zuqc baaic,[12] Yu^ndaa yaac mbaang mi'aqv, weic zuqc ninh mbuo gorngv nyei waac caux zoux nyei sic ki ZIOUV. Ninh mbuo ngaengc njang-laangc nyei Tin-Hungh.

⁹Ninh mbuo nyei hmien biux mengh ninh mbuo dorngc. Ninh mbuo zunh ninh mbuo ganh nyei zuiz hnangv So^ndom Zingh nyei mienh nor. Ninh mbuo zuqc kouv aqv. Ninh mbuo hoic ninh mbuo ganh zuqc zeqc naanc.

¹⁰Oix zuqc mbuox kuv mienh, ninh mbuo oix duqv longx. Weic zuqc ziux ninh mbuo zoux nyei sic duqv winh bun ninh mbuo.

¹¹Orqv mienh oix zuqc kouv aqv. Ninh zungv zuqc zeqc naanc. Ziux ninh nyei buoz zoux nyei, ninh ganh yaac zuqc hnangv wuov nor.

¹²Yie nyei baeqc fingx zuqc fu'jueiv zeix ninh mbuo, yaac maaih m'sieqv dorn gunv ninh mbuo. O yie nyei baeqc fingx aac, meih mbuo nyei bieiv zeiv dorh meih mbuo mingh dorngc jauv, yaac zoux bun meih mbuo nyei jauv lunc nzengc.

¹³ZIOUV bieqc ninh nyei sic-dorngh, souv jiez daaih siemv ninh nyei baeqc fingx.[13]

¹⁴ZIOUV jiez gorn siemv ninh nyei baeqc fingx mbu'ndongx nyei mienh gox caux jien, “Se dongh meih mbuo zoux waaic yie nyei a'ngunc huingx. Meih mbuo luv mienh jomc mienh nyei ga'naaiv yiem meih mbuo nyei biauv.

¹⁵Meih mbuo weic haaix diuc zeix yie nyei baeqc fingx aengx bun mienh jomc mienh zuqc kouv taux ndiev?”[14] Ziouv, Nernh Jiex nyei TIN-HUNGH, hnangv naaiv nor gorngv.

¹⁶ZIOUV gorngv, “Laaix Si^on nyei m'sieqv dorn maux haic, yangh jauv ngorngz jienv jaang, ninh mbuo nyei m'zing hlungh hlungh hlioux-hlioux, yangh jauv fungh fungh fieh fieh, zaux nyei jiemh hlaetv hlaetv nyei.

¹⁷Ziouv ziouc bun Si^on nyei m'sieqv dorn nyei m'nqorngv butv faang, ZIOUV yaac bun ninh mbuo nyei bingx-ciouv cuotv.”[15]

¹⁸Taux wuov hnoi Ziouv oix zorqv nqoi ninh mbuo nzueic nyei zaux-jiemh, m'nqorngv-kou, ja'waanh,

¹⁹m'normh hiun, jiemh, mbiorngz hmien ndie,

²⁰nzueic nyei ningv, kou buoz-sei-zungx nyei ndie, la'sin, dapv youh ndaang nyei faang, caux bouh,

²¹buoz-ndoqv-nzaeng, mba'zorng-hiun,

²²nzueic nyei lui-houx, domh lui, domh lui-ndaauv, caux ndopv-mbuoqc,

²³buoz nanv nyei gingx, la'maah ndie-muonc nyei lui-houx, m'nqorngv-beu caux mbiorngz m'nqorngv ndie.

²⁴Zueix-huv ziouc div youh ndaang, hlaang div la'sin, m'nqorngv njang div mba'biei nzueic, la'maah ndie-cou div ciouh dunc lui-houx, baaic hmien nyei sic div nzueic nyei jauv.

²⁵Meih mbuo nyei m'jangc dorn oix zuqc nzuqc ndaauv daix. Meih mbuo henv haic nyei m'jangc dorn yiem mborqv jaax ciangv zuqc daic.

²⁶Si^on nyei zingh gaengh oix nzauh nyiemv, zingh gu'nyuoz yaac oix hnangv dauh zuqc betv nqoi lui-houx nyei m'sieqv dorn zueiz jienv ndau.