Read Iu Mien I^saa^yaa 30 Bible Online

I^saa^yaa 30 - Iu Mien bible

I^saa^yaa 30

¹ZIOUV hnangv naaiv gorngv, “Hnyouv ngaengc nyei naamh nyouz oix zuqc kouv aqv. Ninh mbuo daav za'eix, mv baac maiv zeiz yie nyei. Ninh mbuo caux mienh liepc ngaengc waac yaac maiv zeiz ei yie nyei Singx Lingh,[140] zuiz ziouc jaa zuiz.

²Ninh mbuo mingh I^yipv Deic-Bung, yaac maiv caux yie caangh laangh. Ninh mbuo oix kaux Faalo Hungh tengx beu jienv ninh mbuo, oix bangc I^yipv zoux ndaauh kaux nyei dorngx.

³Mv baac kaux Faalo beu meih mbuo oix bun meih mbuo zuqc nyaiv. Bangc I^yipv zoux ndaauh kaux nyei dorngx oix bun meih mbuo zuqc baaic hmien.

⁴Maiv gunv ninh nyei jien yiem So^an, ninh nyei gong-zoh yaac taux Haanetv,

⁵ninh mbuo dauh dauh oix zuqc nyaiv, laaix yietc fingx mienh tengx maiv duqv ninh mbuo. Wuov fingx maiv lamh longc, tengx maiv duqv haaix nyungc. Kungx bun zuqc nyaiv, zuqc baaic hmien.”

⁶Naaiv deix waac gorngv taux yiem Negepc nyei hieh zoih. Ninh mbuo zorqv zinh zoih an jienv lorh nyei diqc daanz, zorqv jaaix nyei ga'naaiv an jienv lorh torh nyei buang, tor jienv gan norm aqc nyei, kouv nyei deic-bung mingh, se maaih sienh gouv sienh nyeiz, maaih naang-doqc caux naang-ndaix, ziouc mingh taux yietc fingx maiv haih tengx maiv duqv ninh mbuo nyei mienh.

⁷I^yipv tengx nyei jauv yietc aax yaac maiv lamh longc. Weic naaiv yie cuotv mbuox heuc, Zueiz Jienv Maiv Dongz Nyei Laa^hapc.

⁸Ih zanc mingh aqv. Zorqv naaiv deix waac ndingh jienv la'bieiv-benv, yaac fiev jienv sou-njunc weic nqa'haav hingv, yietc liuz zoux zorng-zengx.

⁹Naaiv se hnyouv ngaengc nyei baeqc fingx, gorngv-baeqc nyei naamh nyouz, maiv kangv muangx ZIOUV njaaux nyei naamh nyouz.

¹⁰Ninh mbuo mbuox gorngv zinh hoz nyei mienh, “Maiv dungx mangc hinc yaangh nyei sic aqv.” Yaac gorngv mbuox douc waac mienh, “Maiv dungx douc horpc nyei jauv bun yie mbuo muangx. Gorngv kuh muangx nyei sic mbuox yie mbuo, yaac douc yie mbuo a'hneiv muangx nyei waac hnangv.

¹¹Guangc nqoi naaiv diuh jauv, leih nqoi naaiv diuh jauv-louc. Maiv dungx zanc-zanc yiem yie mbuo nyei nza'hmien, nzamc I^saa^laa^en nyei Cing-Nzengc Tin-Hungh.”

¹²Weic naaiv I^saa^laa^en nyei Cing-Nzengc Tin-Hungh hnangv naaiv nor gorngv, “Weic zuqc meih mbuo nqemh naaiv deix waac, bangc zeix mienh nyei sic, yaac kaux nduov mienh nyei jauv,

¹³naaiv nyungc zuiz ziouc hnangv zingh laatc hlang nyei, mbaaix mingh, zuo cuotv daaih, liemh zeih, nduqc dangh hnangv mbaang mi'aqv.

¹⁴Zingh laatc ziouc huv hnangv nanv nie zaangc nyei nie-mor huv, za'gengh huv muonc nzengc, lorz maiv duqv yietc hlengx longc cenv douz cuotv douz-nzauc, fai ndamv wuom cuotv siou wuom nyei kuotv.”

¹⁵Ziouv TIN-HUNGH, se I^saa^laa^en nyei Cing-Nzengc Tin-Hungh, hnangv naaiv nor gorngv, “Nzuonx daaih hitv kuonx meih mbuo ziouc duqv njoux. Meih mbuo sekv nzieqc yaac kaux yie, meih mbuo ziouc duqv qaqv. Mv baac meih mbuo maiv kangv hnangv naaiv nor zoux.

¹⁶Meih mbuo gorngv, ‘Maiv zeiz. Yie mbuo oix geh maaz biaux.’ Weic naaiv meih mbuo oix zuqc biaux. Meih mbuo gorngv, ‘Yie mbuo oix geh maaz-siepv mingh.’ Weic naaiv zunc meih mbuo wuov deix yaac oix siepv.

¹⁷Yietc dauh mienh gorngv haeqv, ziouc maaih yietc cin dauh biaux. Biaa dauh mienh gorngv haeqv, meih mbuo yietc zungv ziouc biaux, taux zengc njiec nyei mienh hnangv geh nyei dongc yiem mbong-ningv, yaac hnangv norm jangx-hoc yiem mbong-aiv gu'nguaaic.”

¹⁸Mv baac ZIOUV zuov jienv oix ceix en bun meih mbuo. Ninh jiez daaih oix korv-lienh meih mbuo, weic zuqc ZIOUV se baengh fim nyei Tin-Hungh, da'faanh zuov ninh nyei mienh ziouc maaih orn-lorqc.

¹⁹O Si^on Mienh, se yiem Ye^lu^saa^lem nyei mienh aah! Yiem naaiv mingh meih mbuo maiv zuqc nyiemv aqv. ZIOUV haiz meih mbuo heuc jienv tov nyei qiex, ninh oix ceix en bun meih mbuo. Ninh yietv haiz, ninh ziouc dau meih mbuo.

²⁰Maiv gunv Ziouv bun meih mbuo zuqc kuonx naanh dorngx njuov, yaac bun kouv naanc dorngx wuom, yiem naaiv mingh meih mbuo nyei fin-saeng maiv aengx bingx. Meih mbuo ganh nyei m'zing zungv duqv buatc ninh.[141]

²¹Maiv gunv meih mbuo hungx jienv zaaix fai mbiaauc mingh, meih mbuo ziouc haiz nqa'haav maengx maaih qiex gorngv, “Se dongh naaiv diuh jauv. Gunv yangh naaiv mingh.”

²²Meih mbuo oix bun zuqc daaih buang jienv nyaanh nyei miuc-fangx caux dox daaih buang jienv jiem nyei miuc-fangx maaih uix. Meih mbuo oix zoi guangc hnangv guangc laih hlopv nyei ga'naaiv, yaac mbuox miuc-fangx, “Mingh aqv.”

²³ZIOUV oix bun mbiungc njiec daaih yungz meih mbuo zuangx njiec ndau nyei nyim. Yiem ndau cuotv nyei laangh ziqc yaac oix longx, bungx-zuoqc. Taux wuov hnoi meih mbuo nyei ngongh guanh oix yiem jangv nyei miev-ciangv nyanc miev.

²⁴Laih ndau nyei ngongh caux lorh yaac duqv nyanc jaa jienv nzauv nyei miev caux longc domh ba'gen-nyaapv caux ga'naaiv-cenv tiu daaih nyei mbiauh nqaauv.

²⁵Taux win-wangv zuqc daix daic nyei domh hnoi, norm-norm laauh oix mbaang njiec nzengc. Norm-norm domh mbong fiuv-mbong oix maaih ndoqv, maaih wuom liouc.

²⁶Taux ZIOUV beu ninh nyei baeqc fingx zuqc mun nyei dorngx yaac zorc bun ninh mbuo zuqc mun nyei naanx, hlaax ziouc hnangv mba'hnoi nor njang. Mba'hnoi nyei nyutc oix gauh njang siec gouv, hnangv siec hnoi gapv daaih nyei njang.

²⁷Mangc maah! ZIOUV [142] yiem go nyei dorngx daaih. Ninh qiex jiez hnangv douz nor jorm, maaih sioux hoz faaux. Ninh nyei nzuih maaih qiex jiez nyei waac buangv nzengc, baetv cuotv daaih hnangv buov qui nyei douz.

²⁸Ninh nyei qiex cuotv daaih hnangv wuom buangv mouh yiemx jienv faaux taux jaang. Ninh oix longc zuqc mietc nyei jauv lorh maanc guoqv, yaac zorqv hanh kouv fapv mienh nyei nzuih, ziouc dorh ninh mbuo mingh dorngc jauv.

²⁹Meih mbuo oix baaux nzung hnangv meih mbuo jiex cing-nzengc zipv nyei muonz nor. Meih mbuo nyei hnyouv oix njien-youh hnangv mienh biomv hlauv-ndongh nux faaux ZIOUV nyei mbong, taux I^saa^laa^en nyei La'bieiv wuov.

³⁰ZIOUV oix bun mienh duqv haiz ninh haangh daauh nyei qiex, yaac bun ninh mbuo buatc ninh nyei buoz mborqv njiec. Ninh za'gengh! qiex jiez yaac hnangv douz nor oix buov qui nzengc, aengx longc domh mbiungc, nziaaux-jieqv caux borqc.

³¹Atc^si^lie Mienh haiz ZIOUV nyei sing-qiex ziouc haeqv ninh mbuo za'gengh! gamh nziex haic. ZIOUV yaac longc ninh nyei hungh biaav mborqv ninh mbuo.

³²ZIOUV oix longc ninh dingc zuiz nyei biaav mborqv ninh mbuo. Mborqv yietc biaav ziouc maaih mborqv nzoz, patv daanh baah nyei qiex puix jienv. Mborqv jaax nyei ziangh hoc ninh longc ninh nyei buoz mborqv ninh mbuo.

³³Jiex daaih lauh aqv, ZIOUV liuc leiz ziangx yietc norm dorngx[143] buov hungh diex nyei sei. Wuov norm dorngx youc ndo youc jangv, douz caux zaangh yaac maaih camv nyei. ZIOUV nyei qiex hnangv hungh[144] buov zieqc daaih.