Read Iu Mien I^saa^yaa 53 Bible Online

I^saa^yaa 53 - Iu Mien bible

I^saa^yaa 53

¹Haaix dauh haih sienx yie mbuo zunh nyei jauv?[229] ZIOUV nyei qaqv[230] cuotv daaih bun haaix dauh buatc?

²Ninh yiem ZIOUV nyei nza'hmien hlo daaih hnangv cunx lunx, hnangv ndiangx-nzungh yiem ndau-nqaai cuotv cunx. Maiv maaih fangx zeiv fai nzueic nyei jaax bun yie mbuo haiz oix mangc. Yaac maiv maaih nzueic nyei dorngx laqv yie mbuo nyei mueic.

³Ninh zuqc mienh mangc piex, zuqc mienh nqemh, ninh zuqc diev mun, zuqc diev kouv.[231] Ninh se hnangv mienh buang jienv hmien, maiv oix mangc nyei mienh, ninh zuqc mienh mangc piex, yie mbuo yaac maiv taaih ninh.

⁴Ninh ndaam yie mbuo nyei baengc tongx, hlorv yie mbuo nzauh kouv nyei jauv mingh nzengc. Maiv gunv hnangv naaic, yie mbuo funx ninh zuqc mborqv, se zuqc Tin-Hungh mborqv, yaac zuqc kouv.

⁵Daaux nzuonx ninh laaix yie mbuo zoux dorngc nyei sic zuqc mun, laaix yie mbuo baamz nyei zuiz zuqc mborqv faaux nziaamv. Ninh zuqc dingc zuiz bun yie mbuo duqv baengh orn. Ninh zuqc mborqv faaux nziaamv bun yie mbuo duqv zorc longx.

⁶Yie mbuo yietc zungv hnangv ba'gi yungh, yangh dorngc jauv, gorqv-mienh yangh gorqv-mienh nyei jauv hnangv. ZIOUV zorqv yie mbuo zuangx mienh nyei zuiz an jienv ninh, bun ninh ndaam.

⁷Ninh zuqc hoic, zuqc diev kouv, ninh yaac maiv ko lo. Ninh se hnangv zuqc dorh mingh daix nyei ba'gi yungh dorn, aengx hnangv japv biei nyei ba'gi yungh dorn maiv ko lo, yaac maiv morngx ninh nyei nzuih.

⁸Ninh zuqc zeix, zuqc siemv, zuqc dorh mingh. Dongh ninh wuov doic mienh maiv maaih haaix dauh hnamv taux ninh weic yie nyei baeqc fingx baamz nyei zuiz zuqc mborqv, yaac yiem ziangh jienv nyei mienh mbu'ndongx zuqc pai guangc.

⁹Maiv gunv ninh maiv zoux doqc, ninh nyei nzuih yaac maiv nduov mienh, mv baac mienh liuc leiz bun ninh caux orqv mienh biopv. Daic wuov zanc ninh caux butv-zoih mienh juangc zouv zangx.

¹⁰Mv baac se ZIOUV nyei za'eix bun ninh zuqc faaux nziaamv, bun ninh zuqc siouc kouv. ZIOUV longc ninh zoux ziec fiqv zuiz nyei ga'naaiv,[232] ninh zungv duqv buatc ganh nyei hoz doic, yaac duqv bun ninh ziangh nyei hnoi-nyieqc ndaauv. ZIOUV a'hneiv nyei za'eix ziouc yiem ninh nyei buoz zoux duqv cuotv.

¹¹Ninh zungv duqv buatc ganh weic siouc kouv zoux cuotv daaih nyei sic ziouc buangv hnyouv. Weic naaiv dauh kuv mienh, se yie nyei bou nyei wuonh zaang, mienh camv duqv funx benx kuv mienh. Ninh yaac oix ndaam ninh mbuo yietc zungv nyei zuiz.

¹²Weic naaiv yie oix bun ninh caux zoux hlo nyei mienh maaih buonc. Ninh caux mienh henv mienh bun nqoi caangv daaih nyei ga'naaiv, weic zuqc ninh zorqv ninh nyei maengc dox cuotv zuqc daic, yaac zuqc funx caux zuiz-mienh fih hnangv. Maiv gunv hnangv naaic, ninh ndaam mienh camv nyei zuiz, yaac weic baamz zuiz nyei mienh jouh Tin-Hungh.