Read Iu Mien I^saa^yaa 56 Bible Online

I^saa^yaa 56 - Iu Mien bible

I^saa^yaa 56

¹ZIOUV hnangv naaiv gorngv, “Meih mbuo oix zuqc goux jienv baengh fim nyei jauv yaac zoux horpc nyei sic, weic zuqc yie nyei njoux en taux fatv aqv. Yie nyei gong-fim oix biux mengh cuotv daaih.

²Hnangv naaiv ei jienv zoux nyei mienh, dongh jienh gan longx nyei mienh, maaih orn-lorqc. Se ninh gan longx Dingh Gong Hnoi nyei leiz, maiv bun maaih uix, yaac gunv jienv ganh nyei buoz, maiv zoux haaix nyungc orqv sic.”

³Caux ZIOUV horpc nyei ganh fingx mienh maiv dungx bun gorngv, “ZIOUV ndongc haaix zungv oix zorqv yie caux ninh nyei baeqc fingx bun nqoi.” Yaac maiv dungx bun im dov nyei mienh gorngv, “Mangc maah! Yie kungx zoux ndiangx-kou-nqaai.”

⁴Weic zuqc ZIOUV hnangv naaiv gorngv, “Da'faanh im dov nyei mienh gan longx yie nyei Dingh Gong Hnoi nyei leiz, ginv dongh yie horpc hnyouv nyei sic, yaac sienx wuonv yie laengz nyei ngaengc waac,

⁵yie zungv oix bun ninh mbuo yiem yie nyei singx dinc caux laatc gu'nyuoz maaih jangx-hoc yaac maaih mbuox gauh longx maaih naamh nyouz. Yie zungv oix bun ninh mbuo maaih yietc liuz nyei mbuox, yaac maiv haih pai guangc.

⁶Aengx maaih daaih nyiemc ZIOUV nyei ganh fingx mienh oix fu-sux ninh, hnamv ZIOUV nyei mbuox yaac zoux ninh nyei bou, yietc zungv gan longx Dingh Gong Hnoi nyei leiz, maiv bun maaih uix, yaac sienx longx yie laengz nyei ngaengc waac,

⁷yie ziouc oix dorh naaiv deix mingh taux yie nyei cing-nzengc mbong, yaac bun ninh mbuo yiem yie nyei daux gaux nyei biauv maaih njien-youh. Ninh mbuo buov ziec caux fongc horc ziec nyei ga'naaiv, yiem yie nyei ziec-dorngh horpc yie nyei hnyouv nyei. Weic zuqc yie nyei biauv, mienh oix heuc maanc fingx mienh daux gaux nyei biauv.”

⁸Ziouv TIN-HUNGH, dongh dorh zuqc guaatv mingh nzaanx nyei I^saa^laa^en Mienh daaih zunv wuov dauh, hnangv naaiv gorngv, “Cuotv liuz yie bun gapv zunv liuz nyei mienh, yie corc oix dorh ganh deix mienh daaih caux ninh mbuo gapv zunv.”

⁹Lomc-huaang nyei yietc zungv hieh zoih caux ndiangx-lomc yietc zungv hieh zoih daaih naqv maah!

¹⁰I^saa^laa^en nyei siouv gaeng mienh m'zing maengh, ninh mbuo yietc zungv maiv maaih cong-mengh. Ninh mbuo yietc zungv hnangv juv-hngongx, maiv haih njungx. Ninh mbuo kungx oix bueix jienv, oix mbeix mbeix, mauv m'njormh.

¹¹Wuov deix juv cei haic, nyanc yaac maiv hiuv duqv beuv. Goux ba'gi yungh nyei mienh yaac maiv mengh baeqc haaix nyungc. Gorqv-mienh ziux gorqv-mienh nyei jauv yangh. Gorqv-mienh douh gorqv-mienh ganh duqv longx hnangv.

¹²Ninh mbuo gorngv, “Daaih maah! Mbuo mingh zorqv a'ngunc diuv, mbuo hopv beuv diuv-kuv. Njang hnoi oix hnangv ih hnoi fai zungv gauh yaauc.”