Read Iu Mien I^saa^yaa 64 Bible Online

I^saa^yaa 64 - Iu Mien bible

I^saa^yaa 64

¹O ZIOUV aac, tov meih betv nqoi lungh njiec daaih bun mbong yiem meih nyei nza'hmien dongz

²hnangv douz zieqc yietc ndui ndiangx-nquaah nyang buov wuom mbueix, weic bun meih nyei win-wangv hiuv duqv meih nyei mengh, ziouc bun maanc guoqv yiem meih nyei nza'hmien sin zinx.

³Meih zoux dongh yie mbuo hnamv maiv taux nyei mbuoqc horngh sic. Meih njiec daaih, mbong yaac yiem meih nyei nza'hmien dongz.

⁴Yiem loz-hnoi daaih maiv maaih haaix dauh haiz jiex, fai haaix dauh nyei m'normh duqv muangx jiex, yaac maiv maaih haaix dauh nyei m'zing buatc jiex haaix dauh Tin-Hungh[268] cuotv liuz meih, dongh tengx zuov ninh wuov deix mienh.

⁵Meih zipv a'hneiv zoux horpc nyei mienh, se jangx meih nyei jauv nyei mienh. Mangc maah! Meih qiex jiez weic zuqc yie mbuo baamz zuiz. Yie mbuo yiem zuiz gu'nyuoz lauh nyei, wuov nyungc yie mbuo haih duqv njoux fai?

⁶Yie mbuo yietc zungv ziouc hnangv maiv cing-nzengc nyei mienh. Yie mbuo zoux nyei yietc zungv kuv sic yaac hnangv laih hlopv nyei lui-houx. Yie mbuo yietc zungv hnangv ndiangx-normh nor, nyaux nzengc. Yie mbuo nyei zuiz-nipc yaac hnangv nziaaux nor, buonc yie mbuo mingh.

⁷Maiv maaih haaix dauh daux gaux jouh meih nyei mengh. Maiv maaih haaix dauh dongz sin nanv jienv meih, weic zuqc meih buang meih nyei hmien, maiv mangc yie mbuo, yaac zorqv yie mbuo guangc jienv yiem yie mbuo nyei zuiz gu'nyuoz.

⁸Mv baac ZIOUV aac, meih corc zoux yie mbuo nyei Die. Yie mbuo zoux ba'naih nie, meih se nanv nie zaangc. Yie mbuo yietc zungv benx meih nyei buoz-dauh zoux nyei gong.

⁹O ZIOUV aac, maiv dungx qiex jiez camv jiex ndaangc, maiv dungx yietc liuz jangx yie mbuo nyei zuiz. Yie mbuo tov meih mangc jienv yie mbuo weic zuqc yie mbuo yietc zungv benx meih nyei baeqc fingx.

¹⁰Meih nyei cing-nzengc zingh benx deic-bung-huaang. Liemh Si^on benx deic-bung-huaang, Ye^lu^saa^lem benx baaic huaang nyei dorngx.

¹¹Yie mbuo cing-nzengc, nzueic haic nyei singx dinc, dongh yie mbuo nyei ong-taaix yiem weic ceng meih nyei dorngx, zuqc douz buov qui. Yie mbuo funx jaaix nyei yietc zungv ga'naaiv yaac zuqc baaic waaic nzengc mi'aqv.

¹²ZIOUV aac, maaih naaiv deix sic meih corc haih nyienz duqv jienv nyei fai? Meih corc maiv ko lo, yaac bun yie mbuo zuqc siouc siem haic nyei naanc zingh fai?