Read Iu Mien I^saa^yaa 7 Bible Online

I^saa^yaa 7 - Iu Mien bible

I^saa^yaa 7

¹Utc^si^yaa nyei fun, Yotaam nyei dorn, Aa^hatc, zoux Yu^ndaa nyei hungh nyei ziangh hoc, Silie Hungh, Lesin, caux I^saa^laa^en nyei hungh, Le^maa^li^yaa nyei dorn, Begaa, gapv doic daaih mborqv Ye^lu^saa^lem, mv baac ninh mbuo mborqv maiv hingh.

²Maaih mienh mbuox Ndaawitv nyei zeiv-fun, “Silie caux E^faa^im dongh hnyouv gapv qaqv.” Aa^hatc Hungh nyei hnyouv caux baeqc fingx nyei hnyouv ziouc dongz nzengc, hnangv yiem lomc nyei ndiangx zuqc nziaaux buonc dongz nor.

³ZIOUV gorngv mbuox I^saa^yaa, “Meih caux meih nyei dorn, Se^aan Yaasupv,[25] mingh buangh Aa^hatc Hungh. Ninh yiem wuov jiex bung nyei wuom-domh nyei zuonx jomc nyei dorngx, nyomc ndie nyei ciangv wuov diuh jauv.

⁴Oix zuqc mbuox ninh, ‘Meih oix zuqc faix fim, maiv dungx hnyouv huaang yaac maiv dungx gamh nziex. Maiv dungx hnyouv namx laaix naaiv deix i nqanx cuotv sioux nyei zaangh neix, se weic Lesin caux Silie aengx caux Le^maa^li^yaa nyei dorn qiex jiez! haic.

⁵Weic zuqc Silie caux E^faa^im, aengx caux Le^maa^li^yaa nyei dorn daav orqv nyei za'eix hoic meih. Ninh mbuo gorngv,

⁶“Mbuo lomh nzoih faaux mingh mborqv Yu^ndaa, haeqv ninh mbuo gamh nziex. Mbuo caangv deic-bung benx mbuo ganh nyei, aengx yiem naaic mbu'ndongx liepc Taa^mbe^en nyei dorn zoux hungh.”

⁷Mv baac Ziouv TIN-HUNGH hnangv naaiv gorngv, “+‘Naaiv deix sic zungv maiv cuotv, zungv maiv haih hnangv naaic,

⁸weic zuqc Silie nyei bieiv[26] se Ndaa^matv^gatc Zingh. Ndaa^matv^gatc nyei bieiv se Lesin Hungh. Yiem luoqc ziepc hmz hnyangx gu'nyuoz, E^faa^im oix zuqc baaic, maiv benx yietc fingx aqv.

⁹E^faa^im nyei bieiv se Saa^maa^lie Zingh, Saa^maa^lie nyei bieiv se Le^maa^li^yaa nyei dorn. Mv baac se gorngv meih mbuo maiv sienx dingc, meih mbuo zungv maiv duqv liepc wuonv.’+”

¹⁰ZIOUV aengx gorngv mbuox Aa^hatc,

¹¹“Meih oix zuqc tov ZIOUV, meih nyei Tin-Hungh, bun norm jangx-hoc, maiv gunv yiem ndo taux yiemh gen fai hlang taux gu'nguaaic lungh.”

¹²Mv baac Aa^hatc gorngv, “Yie maiv tov aqv. Yie yaac maiv seix ZIOUV. ”

¹³I^saa^yaa gorngv, “Ndaawitv nyei zeiv-fun aah! Muangx maah! Meih zoux bun mienh nyei noic nzengc se maiv gaengh gaux fai? Meih corc oix zoux bun yie nyei Tin-Hungh nyei noic nzengc?

¹⁴Weic naaiv Ziouv ganh oix bun norm jangx-hoc. Maaih dauh maiv bueix jiex dorn nyei sieqv,[27] oix maaih norm sin, yungz duqv dauh dorn, aengx tengx ninh cuotv mbuox heuc, I^maa^nu^en.[28]

¹⁵Naaiv dauh fu'jueiv hlo daaih, haih dingc haaix nyungc longx haaix nyungc ciouv nyei ziangh hoc, ninh duqv nyanc ngongh nyorx-hmei caux mueiz-dorngh.

¹⁶Weic zuqc naaiv dauh fu'jueiv maiv gaengh hiuv duqv ngaengc orqv nyei, ginv longx nyei, dongh meih ih zanc gamh nziex wuov deix i dauh hungh nyei deic-bung zungv zuqc benx ndau-huaang.

¹⁷ZIOUV oix bun meih caux meih nyei baeqc fingx caux meih nyei die nyei douh zong zuqc zeqc naanc nyei hnoi-nyieqc. Maiv maaih jiex hnoi-nyieqc ndongc naaic kouv yiem E^faa^im leih nqoi Yu^ndaa taux ih zanc. Se Atc^si^lie nyei hungh oix daaih.”

¹⁸Wuov hnoi ZIOUV oix fiuv mungz yiem I^yipv nyei ndaaih nyuonh nyei dorngx, yaac fiuv mueiz yiem Atc^si^lie Deic-Bung ndaix daaih.

¹⁹Ninh mbuo yietc zungv ziouc ndaix daaih yiem horngz-guei horngz-qaamv, yiem la'bieiv-ngaamh gu'nyuoz, yaac biormh jienv zungh zungh njimv caux yietc zungv miev-ciangv.[29]

²⁰Wuov hnoi Ziouv oix longc yiem wuov ngaanc ziqc ndaaih, se yiem Atc^si^lie nyei hungh cingv daaih nyei teix-do pienx, teix meih mbuo nyei m'nqorngv caux zaux nyei biei. Liemh meih mbuo nyei siaam yaac teix nzengc.

²¹Taux wuov hnoi, yietc dauh mienh oix yungz yietc dauh ngongh nyeiz caux i dauh ba'gi yungh.[30]

²²Weic zuqc duqv nyorx camv, ninh duqv nyanc nyorx-hmei. Yiem deic-bung zengc njiec nyei dauh dauh mienh duqv nyanc nyorx-hmei caux mueiz-dorngh.

²³Taux wuov hnoi, da'faanh maaih jiex yietc cin zungh a'ngunc hmei, zic duqv siec joih[31] nyaanh nyei ndau, oix cuotv benx njimv-cou njimv-muonc nyei lomc.

²⁴Mienh oix dorh jienv juang-zinx caux forng mingh wuov, weic zuqc kungx maaih njimv-cou njimv-muonc buangv nzengc.

²⁵Zinh ndaangc longc porng wetv nyei norm-norm mbong meih zungv maiv mingh naaic aqv, weic zuqc gamh nziex njimv-cou njimv-muonc. Kungx benx dorngx bungx ngongh yaac bun ba'gi yungh caaiv nyei dorngx.