Read Iu Mien I^saa^yaa 8 Bible Online

I^saa^yaa 8 - Iu Mien bible

I^saa^yaa 8

¹ZIOUV gorngv mbuox yie, “Zorqv kuaaiv ga'naaiv hlo nyei daaih fiev pou-tong nyei nzaangc gorngv, ‘Maa^he Saalaan Hatc Mbatc’.[32]

²Yie yaac heuc i dauh kaux duqv wuonv nyei mienh tengx yie zoux zorng-zengx, se U^li^yaa sai mienh caux Ye^mbe^le^ki^yaa nyei dorn, Se^kaa^li^yaa.”

³Yie ziouc mingh yie nyei auv[33] wuov, ninh ziouc maaih jienv sin, yungz duqv dauh dorn. ZIOUV gorngv mbuox yie, “Oix zuqc tengx ninh cuotv mbuox heuc Maa^he Saalaan Hatc Mbatc.

⁴Naaiv dauh dorn maiv gaengh haih heuc ‘Aa dae, aa maa’ nyei ziangh hoc, Ndaa^matv^gatc nyei zinh zoih caux yiem Saa^maa^lie luv daaih nyei ga'naaiv ziouc zuqc Atc^si^lie nyei hungh caangv mingh nzengc.”

⁵ZIOUV aengx gorngv mbuox yie,

⁶“Weic zuqc yie nyei baeqc fingx nqemh Si^lo^aa liouc nyei wuom-sienc, yaac a'hneiv Lesin caux Le^maa^li^yaa nyei dorn.

⁷Weic naaiv, yie, Ziouv, oix bun Yu^fe^ditc Ndaaih henv haic nyei wuom yiemx, se Atc^si^lie Hungh caux ninh nyei yietc zungv njang-laangc. Wuom ziouc mienz cuotv liouc njiec ndaaih nyei diuh diuh ndoqv, caux i bung kamx,

⁸aengx guaatv bieqc Yu^ndaa, yiemx nzengc nyungc-nyungc aengx jiex mingh zungv faaux taux jaang. Ninh oix yang ndaatv buangv meih nyei deic-bung gu'nguaaic, O I^maa^nu^en.”[34]

⁹Maanc guoqv mienh aah! Liuc leiz mborqv jaax, meih mbuo ziouc zuqc mborqv huv yaac gamh nziex. Yiem go nyei yietc zungv guoqv nyei mienh aah! Oix zuqc baeng m'normh muangx. Liuc leiz mborqv jaax[35] meih mbuo ziouc zuqc mborqv huv yaac gamh nziex. Liuc leiz mborqv jaax, meih mbuo ziouc zuqc mborqv huv yaac gamh nziex.

¹⁰Meih mbuo gunv daav za'eix, mv baac maiv haih zoux maiv cuotv, gunv caangh laangh, mv baac zoux maiv cuotv, weic zuqc Tin-Hungh caux mbuo yiem.[36]

¹¹ZIOUV longc ninh henv haic nyei qaqv[37] caux yie gorngv. Ninh kuinx yie maiv dungx gan naaiv deix baeqc fingx nyei jauv. Ninh hnangv naaiv gorngv,

¹²“Naaiv deix mienh gorngv benx beic ndiev daav nyei za'eix, meih maiv dungx gorngv nyungc-nyungc benx beic ndiev daav nyei za'eix. Ninh mbuo gamh nziex nyei meih maiv dungx gamh nziex, yaac maiv dungx bun haeqv zuqc ganh.

¹³Se Nernh Jiex nyei ZIOUV meih oix zuqc funx cing-nzengc. Se dongh ninh meih oix zuqc taaih, yaac dongh ninh meih oix zuqc gamh nziex.

¹⁴Ninh ziouc benx norm singx dinc mv baac weic I^saa^laa^en caux Yu^ndaa nyei i fingx mienh, ninh benx nziangc zaux nyei la'bieiv, yaac benx domh la'bieiv bun mienh ndiqv zuqc ndorpc, benx mungz benx hlaang zorqv yiem Ye^lu^saa^lem nyei mienh.

¹⁵Mienh camv zungv ndiqv zuqc wuov norm la'bieiv, ninh mbuo ziouc ndorpc huv muonc nzengc.[38] Ninh mbuo yaac zuqc hlaang hlopv, zuqc zorqv mingh.”

¹⁶Zorqv zoux zorng-zengx nyei sou ndoh jienv, zorqv njaaux nyei waac[39] mborqv jienv yienx, jiu bun yie nyei sai-gorx.

¹⁷Yie oix zuov jienv ZIOUV. Ninh buang ninh nyei hmien maiv bun Yaakopv nyei zeiv-fun buatc. Yie yaac oix kaux ninh maaih lamh hnamv dorngx.

¹⁸Mangc maah! Yie caux ZIOUV jiu bun yie nyei naamh nyouz yiem I^saa^laa^en Mienh mbu'ndongx zoux yiem Si^on Mbong, Nernh Jiex nyei ZIOUV, bun daaih nyei jangx-hoc caux beiv nyei jauv.[40]

¹⁹Se gorngv maaih mienh gorngv mbuox meih mbuo, “Mingh naaic mbouv guaax mienh fai gaanv hei mienh, se gorngv waac-sapv, gorngv waac-njomc nyei mienh,” baeqc fingx maiv zeiz oix zuqc lorz naaic ninh mbuo nyei Tin-Hungh fai? Horpc zuqc weic mienh nangh mienh lorz daic mingh nyei mienh fai?

²⁰Oix zuqc muangx Tin-Hungh njaaux nyei waac caux zorng-zengx waac. Se gorngv maiv ei naaiv deix waac nyei mienh zungv maiv duqv buatc lungh ndorm nziouv nyei njang.[41]

²¹Ninh mbuo oix zuqc kuonx naanh, hnyouv sie jienv youh deic-bung. Ninh mbuo ngorc nyei ziangh hoc ninh mbuo ziouc qiex jiez haic, cau hmien mangc gu'nguaaic lungh, yaac zioux ninh mbuo nyei hungh diex caux ninh mbuo nyei Tin-Hungh.

²²Wuov zanc ninh mbuo oix mangc ga'ndiev ndau mv baac buatc maaih nzauh kouv caux hmuangx nyei sic hnangv, caux hmuangx nyei kouv naanc. Ninh mbuo yaac oix zuqc zunc bieqc mapv maengh mapv hmuangx nyei dorngx.