Read Iu Mien Lewi 13 Bible Online

Lewi 13 - Iu Mien bible

Lewi 13

²“Se gorngv haaix dauh buatc ndopv omx, fai ndopv huv, fai hnangv douz buov laauz nor, nziex benx gomh huv baengc. Oix zuqc dorh mingh taux Aalon sai mienh fai Aalon nyei zeiv-fun yietc dauh sai mienh.

³Sai mienh ziouc zaah mangc ndopv benx baengc wuov norm dorngx. Buatc wuov norm dorngx nyei biei baeqc mi'aqv, yaac buatc baengc maiv daan yiem ndopv hnangv, se bieqc ndo nyei, ziouc funx benx gomh huv baengc. Sai mienh ziouc dingc ninh maaih uix aqv.

⁴Mv baac buatc wuov norm dorngx baeqc yaac hnangv kungx yiem ndopv benx hnangv, wuov norm dorngx nyei biei yaac maiv baeqc nor, sai mienh ziouc kuonx jienv butv baengc wuov dauh ganh yiem norm dorngx siec hnoi.

⁵Taux da'cietv hnoi, sai mienh aengx zaah ninh. Se gorngv ziux sai mienh buatc, ndopv maiv ganh nyungc, maiv jaa butv nor, sai mienh ziouc aengx kuonx jienv siec hnoi.

⁶Taux da'cietv hnoi, sai mienh aengx zaah nzunc. Buatc wuov norm dorngx mitc deix, maiv jaa butv nor, sai mienh ziouc dingc ninh cing-nzengc, kungx cuotv deix baav ga'naaiv hnangv. Ninh oix zuqc nzox lui-houx ziouc cing-nzengc mi'aqv.

⁷Ninh duqv sai mienh dingc ninh cing-nzengc nyei mv baac se gorngv nqa'haav buatc ndopv aengx jaa huv jienv mingh, oix zuqc aengx mingh bun sai mienh mangc.

⁸Sai mienh zaah liuz, buatc jaa butv jangv jienv mingh, sai mienh ziouc dingc ndopv huv wuov dauh mienh maaih uix. Se gomh huv baengc[21] aqv.

⁹“Se gorngv maaih haaix dauh butv gomh huv baengc, oix zuqc dorh mingh sai mienh wuov.

¹⁰Sai mienh ziouc zaah mangc. Buatc ndopv baeqc yaac omx, bun wuov norm dorngx nyei biei baeqc, omx nyei dorngx yaac tong, cuotv orv-siqv,

¹¹bun cing maiv haih longx, benx yiem ndopv nyei gomh huv baengc. Sai mienh ziouc dingc ninh maaih uix aqv. Maiv dungx kuonx ninh aqv, weic zuqc ninh zungv maaih uix mi'aqv.

¹²“Se gorngv ndopv nyei baengc butv gormx sin, ziux sai mienh buatc se yiem m'nqorngv njiec taux zaux,

¹³sai mienh oix zuqc zaah mangc. Buatc baengc buangv nzengc ziangh sin, yiem m'nqorngv taux zaux, ziouc dingc ninh cing-nzengc mi'aqv. Weic zuqc ziangh sin baeqc nzengc ninh ziouc cing-nzengc mi'aqv.

¹⁴Mv baac se gorngv maaih orv-lunx siqv butv cuotv haaix norm dorngx, ninh maaih uix aqv.

¹⁵Sai mienh zaah mangc, buatc orv-lunx siqv butv cuotv, ziouc dingc ninh maaih uix. Wuov deix orv-lunx maaih uix. Se gomh huv baengc aqv.

¹⁶Se gorngv naaiv deix orv-lunx tuix setv baeqc nzengc, ninh oix zuqc aengx mingh lorz sai mienh.

¹⁷Sai mienh oix zuqc zaah mangc. Buatc wuov deix dorngx tuix setv baeqc, sai mienh ziouc dingc wuov laanh mienh se cing-nzengc nyei. Ninh ziouc cing-nzengc mi'aqv.

¹⁸“Se gorngv maaih mienh ziangh zueih longx mingh,

¹⁹nqa'haav yiem ziangh jiex zueih nyei dorngx omx daaih baeqc nyei fai maaih deix dorngx baeqc siqv, ninh oix zuqc mingh bun sai mienh mangc.

²⁰Sai mienh zaah mangc buatc butv wuov norm dorngx maiv daan yiem ndopv hnangv, se bieqc ndo nyei, wuov norm dorngx nyei biei yaac tuix setv baeqc nzengc mi'aqv, sai mienh ziouc dingc wuov laanh mienh maaih uix. Se benx gomh huv baengc yiem ziangh jiex zueih nyei dorngx cuotv.

²¹Mv baac se gorngv sai mienh zaah mangc nyei ziangh hoc buatc wuov norm dorngx nyei biei maiv baeqc, kungx ndopv benx hnangv, maiv bieqc ndo, yaac buatc mitc deix aqv, sai mienh ziouc kuonx jienv wuov laanh mienh, bun ninh ganh yiem norm dorngx siec hnoi.

²²Buatc ndopv aengx butv jangv jienv mingh nor, sai mienh ziouc dingc ninh maaih uix. Se haih jiex mienh nyei baengc.

²³Mv baac se gorngv buatc wuov norm dorngx hnangv loz nor, maiv butv jangv jienv mingh, se zueih nyei naanx hnangv. Sai mienh ziouc dingc ninh maiv maaih uix.

²⁴“Haaix dauh zuqc douz buov, yiem zuqc buov wuov norm dorngx buatc orv-lunx cuotv baeqc siqv fai baeqc,

²⁵sai mienh oix zuqc zaah mangc. Buatc wuov norm dorngx nyei biei tuix setv baeqc nzengc, yaac buatc maiv daan yiem ndopv hnangv, se bieqc ndo nyei, se gomh huv baengc yiem douz buov nyei dorngx cuotv. Sai mienh ziouc dingc ninh maaih uix. Benx gomh huv baengc aqv.

²⁶Mv baac se gorngv sai mienh zaah mangc, buatc wuov norm dorngx nyei biei maiv baeqc, buatc maiv ndo, kungx ndopv benx hnangv, yaac buatc mitc deix, sai mienh ziouc kuonx jienv bun baengc mienh ganh yiem norm dorngx siec hnoi.

²⁷Taux da'cietv hnoi, sai mienh oix zuqc aengx zaah nzunc ninh. Se gorngv buatc huv jienv gan ndopv mingh, sai mienh ziouc dingc ninh maaih uix, se gomh huv baengc.

²⁸Mv baac se gorngv buatc wuov norm dorngx m'daaih hnangv loz wuov nor, yaac maiv huv jienv gan ndopv mingh, yaac mitc deix nyei, se omx laaix zuqc douz buov hnangv, sai mienh ziouc dingc ninh maiv maaih uix. Se kungx douz buov nyei naanx hnangv.

²⁹“Maiv gunv m'jangc fai m'sieqv, haaix dauh butv faang yiem m'nqorngv fai haah baah,

³⁰sai mienh oix zuqc zaah mangc naaiv deix faang. Buatc maiv daan yiem ndopv hnangv, se bieqc ndo nyei, buatc wuov norm dorngx nyei mba'biei fai siaam tuix setv yangh nyei, muonc nyei, sai mienh ziouc dingc ninh maaih uix. Se yiem m'nqorngv fai yiem haah baah butv faang sietv nyei gomh huv baengc.

³¹Se gorngv sai mienh zaah mangc buatc butv faang sietv nyei dorngx maiv ndo, kungx yiem ndopv hnangv, yaac maiv maaih mba'biei fai siaam jieqv yiem wuov norm dorngx, sai mienh ziouc kuonx jienv wuov laanh mienh bun ninh ganh yiem norm dorngx siec hnoi.

³²Taux da'cietv hnoi, sai mienh aengx mangc butv faang nyei dorngx. Buatc sietv nyei dorngx maiv jaa huv mingh, yiem faang gu'nyuoz maiv maaih mba'biei yangh, yaac buatc hnangv kungx yiem ndopv benx hnangv, maiv bieqc ndo,

³³naaiv dauh mienh oix zuqc teix mba'biei fai siaam. Mv baac butv faang nyei dorngx maiv dungx teix. Sai mienh ziouc aengx kuonx jienv siec hnoi.

³⁴Da'cietv hnoi sai mienh oix zuqc zaah mangc butv faang sietv nyei dorngx. Se gorngv buatc ndopv maiv butv jangv jienv mingh nor, yaac kungx yiem ndopv hnangv, maiv bieqc ndo, sai mienh ziouc dingc ninh maiv maaih uix. Ninh oix zuqc nzox lui-houx ziouc maiv maaih uix aqv.

³⁵Se gorngv ninh saax liuz uix mv baac nqa'haav butv faang sietv nyei dorngx butv jangv jienv mingh,

³⁶oix zuqc bun sai mienh zaah mangc ninh. Se gorngv buatc butv faang sietv nyei dorngx yiem ndopv butv jangv jienv mingh, sai mienh maiv zuqc lorz biei yangh. Ninh zungv maaih uix aqv.

³⁷Mv baac ziux sai mienh mangc buatc butv faang sietv nyei dorngx maiv jaa butv, yiem faang gu'nyuoz yaac cuotv biei jieqv nor, butv faang nyei dorngx se longx mi'aqv. Wuov dauh mienh yaac maiv maaih uix. Sai mienh ziouc dingc ninh cing-nzengc mi'aqv.

³⁸“Maiv gunv m'jangc m'sieqv, se gorngv sin zaangc nyei ndopv baeqc mingh yietc diemv yietc diemv nyei,

³⁹sai mienh oix zuqc zaah mangc. Se gorngv buatc wuov norm dorngx kungx baeqc hnangv, maiv youc nor, wuov dauh mienh se cing-nzengc nyei, maiv maaih uix.

⁴⁰“Se gorngv haaix dauh m'jangc dorn nyei mba'biei bioh, ninh se m'nqorngv njang nyei mv baac cing-nzengc, maiv maaih uix.

⁴¹Haaix dauh nyei biorngh ceiv caux m'nqorngv nza'hmien maengx nyei mba'biei bioh, ninh nyei m'nqorngv njang nyei mv baac ninh cing-nzengc, maiv maaih uix.

⁴²Mv baac se gorngv m'nqorngv fai biorngh njang cuotv deix baeqc siqv nyei dorngx, naaiv se yiem m'nqorngv njang fai biorngh cuotv nyei gomh huv baengc.

⁴³Sai mienh oix zuqc zaah mangc. Se gorngv buatc yiem m'nqorngv fai biorngh omx nyei dorngx baeqc siqv hnangv gomh huv baengc nor,

⁴⁴wuov dauh mienh ziouc maaih gomh huv baengc. Ninh maaih uix aqv. Sai mienh ziouc dingc ninh maaih uix, weic zuqc baengc butv cuotv yiem ninh nyei m'nqorngv.

⁴⁵“Mienh butv gomh huv baengc oix zuqc zuqv betv huv nyei lui-houx, bungx mba'biei forqv, buang jienv gu'nguaaic wuov maengx nzuih meix, yaac heuc jienv gorngv, ‘Maaih uix, maaih uix aqv.’

⁴⁶Da'faanh butv jienv wuov nyungc baengc, ninh maaih uix aqv. Ninh oix zuqc mingh yiem ga'nyiec ziqc ndopv-liuh ciangv, yaac oix zuqc nduqc dauh ganh yiem hnangv.

⁴⁷“Se gorngv lui-houx jiex mbuov, maiv gunv ba'gi yungh biei fai la'maah ndie nyei lui-houx,

⁴⁸se longc la'maah suix fai ba'gi suix ndatv daaih fai ciqv daaih nyei lui-houx, fai saeng-kuv ndopv fai longc saeng-kuv ndopv zoux daaih nyei haaix nyungc ga'naaiv,

⁴⁹yaac se gorngv naaiv deix lui-houx fai longc ndopv zoux daaih nyei ga'naaiv jiex mbuov daaih maeng nyei fai siqv nyei, naaiv nyungc ga'naaiv-mbuov se haih butv jienv mingh. Zungv oix zuqc bun sai mienh zaah mangc.

⁵⁰Sai mienh mangc liuz ziouc ganh ca'lengc hietv jienv yietc norm dorngx siec hnoi.

⁵¹Taux da'cietv hnoi, sai mienh aengx zaah mangc. Buatc naaiv deix ga'naaiv-mbuov aengx butv jienv mingh, maiv gunv yiem lui-houx fai ndatv daaih fai ciqv daaih nyei ga'naaiv, fai haaix nyungc longc ndopv zoux daaih nyei ga'naaiv, naaiv nyungc ga'naaiv-mbuov se doqc nyei. Naaiv deix jiex mbuov nyei ga'naaiv ziouc maaih uix.

⁵²Sai mienh oix zuqc buov guangc nzengc naaiv deix longc ba'gi suix fai la'maah ndie ndatv daaih nyei lui-houx fai longc ndopv zoux daaih nyei ga'naaiv, weic zuqc naaiv nyungc ga'naaiv-mbuov se doqc nyei. Oix zuqc longc douz buov guangc.

⁵³“Mv baac sai mienh zaah mangc nyei ziangh hoc, se gorngv buatc yiem ndatv daaih fai ciqv daaih nyei lui-houx fai longc ndopv zoux daaih nyei ga'naaiv, jiex naaiv nyungc mbuov maiv butv jangv jienv mingh,

⁵⁴sai mienh oix zuqc hatc nzox jiex mbuov nyei ga'naaiv. Nzox liuz, oix zuqc aengx an jienv wuov siec hnoi.

⁵⁵Nzox liuz, se gorngv buatc naaiv deix ga'naaiv maiv tuix setv, maiv gunv maiv butv jangv jienv mingh, corc maaih uix. Maiv gunv jiex mbuov gu'nyuoz fai ga'nyiec maengx, oix zuqc longc douz buov guangc.

⁵⁶Se gorngv nzox liuz, sai mienh aengx zaah mangc wuov zanc buatc jiex mbuov nyei dorngx nyei setv tuix nor, oix zuqc betv jiex mbuov nyei dorngx cuotv wuov deix lui-houx fai ndopv fai ndatv daaih, ciqv daaih nyei ndie.

⁵⁷Mv baac se gorngv nqa'haav naaiv deix lui-houx, fai ndatv daaih, ciqv daaih nyei ndie, fai longc ndopv zoux daaih nyei ga'naaiv, corc aengx jiex mbuov, buatc butv camv jienv faaux, oix zuqc longc douz buov guangc.

⁵⁸Mv baac se gorngv nzox liuz naaiv deix lui-houx, fai ndatv daaih, ciqv daaih nyei ndie, fai longc ndopv zoux daaih nyei ga'naaiv, yaac buatc jiex mbuov nyei dorngx nyei setv tuix nzengc nor, oix zuqc aengx nzox nzunc. Naaiv deix ga'naaiv ziouc cing-nzengc.”

⁵⁹Naaiv se ga'naaiv jiex mbuov nyei leiz weic dingc ga'naaiv se cing-nzengc fai maaih uix, maiv gunv se longc ba'gi suix fai la'maah ndie nyei lui-houx, ndatv daaih, ciqv daaih nyei ndie, fai longc saeng-kuv ndopv zoux daaih nyei ga'naaiv.