Read Iu Mien Lewi 14 Bible Online

Lewi 14 - Iu Mien bible

Lewi 14

²“Naaiv se mienh butv gomh huv baengc longx mingh saax uix wuov hnoi oix zuqc gan nyei leiz. Oix zuqc dorh ninh mingh lorz sai mienh.

³Sai mienh oix zuqc cuotv ga'nyiec ziqc ndopv-liuh ciangv, yaac oix zuqc zaah mangc ninh. Se gorngv buatc butv gomh huv baengc nyei mienh longx mi'aqv,

⁴sai mienh ziouc heuc zorqv i norm maiv maaih uix nyei norqc nangh caux si^ndaa zongh ndiangx, ba'gi suix-siqv caux husopc miev weic oix saax uix wuov dauh.

⁵Sai mienh heuc ninh zorqv norm norqc yiem zaangh jienv wuom-daaih nyei nie-mor gu'nguaaic daix.

⁶Ninh aengx zorqv nangh wuov norm norqc caux si^ndaa zongh ndiangx, ba'gi suix-siqv caux husopc miev, yietc njiec ziemx zaangh jienv wuom-daaih nyei nie-mor gu'nguaaic daix wuov norm norqc nyei nziaamv.

⁷Sai mienh oix zuqc fuqv butv liuz gomh huv baengc oix saax uix wuov laanh mienh siec nzunc, ziouc dingc ninh cing-nzengc mi'aqv. Sai mienh aengx zorqv nangh wuov norm norqc bungx wuov mboux.

⁸“Duqv saax uix wuov dauh oix zuqc nzox ninh nyei lui-houx, teix nzengc sin zaangc nyei biei caux mba'biei. Longc wuom nzaaux liuz sin ziouc maiv maaih uix aqv. Nqa'haav bieqc ndopv-liuh ciangv duqv nyei mv baac oix zuqc yiem ganh nyei ndopv-liuh ga'nyiec maengx siec hnoi.

⁹Taux da'cietv hnoi ninh oix zuqc aengx teix mba'biei, teix siaam caux mungh maih biei caux sin zaangc nyei yietc zungv biei. Ninh oix zuqc nzox lui-houx, longc wuom nzaaux sin, ninh ziouc cing-nzengc mi'aqv.

¹⁰“Taux da'betv hnoi ninh oix zuqc dorh i dauh ba'gi yungh gouv dorn caux yietc dauh doix hnyangx nyei ba'gi yungh zeic, yietc zungv maiv waaic fangx nyei. Yaac oix zuqc dorh juqv morqv bienx[22] mbuonv-muonc zorpc jienv ga'lanv youh zoux fongc horc ziec nyei laangh ziqc. Yaac oix zuqc dorh yietc gorngc ziepc gouv nyei buo gouv[23] ga'lanv youh.

¹¹Tengx ninh saax uix wuov dauh sai mienh ziouc dorh saax uix nyei mienh caux ninh fongc horc ziec nyei ga'naaiv taux ZIOUV nyei nza'hmien, Wuic Buangh Ndopv-Liuh nyei gaengh ndaangc.

¹²“Sai mienh ziouc zorqv yietc dauh wuov deix ba'gi yungh gouv dorn caux yietc gorngc ziepc gouv nyei buo gouv ga'lanv youh[24] ziec weic zoux dorngc nyei zuiz. Ninh oix zuqc zorqv daaih yiem ZIOUV nyei nza'hmien cunv ging weic zoux cunv ging fongc horc nyei ga'naaiv.

¹³Sai mienh oix zuqc yiem daix ziec weic fiqv zuiz caux buov ziec nyei ga'naaiv wuov norm cing-nzengc dorngx daix, weic zuqc ziec fiqv zoux dorngc zuiz nyei ga'naaiv caux ziec weic fiqv zuiz nyei ga'naaiv fih hnangv nyei benx sai mienh nyei nzengc. Se cing-nzengc jiex nyei ga'naaiv.

¹⁴Sai mienh ziouc zorqv deix ziec weic zoux dorngc zuiz wuov dauh saeng-kuv nziaamv guoqv saax uix naaiv dauh mienh nyei mbiaauc bung m'normh biouv caux mbiaauc jieqv buoz-ndoqv-nyeiz caux mbiaauc jieqv zaux-ndoqv-nyeiz.

¹⁵Sai mienh yaac oix zuqc zorqv deix wuov gorngc ziepc gouv nyei buo gouv ga'lanv youh[25] dox ganh nyei zaaix jieqv buoz-zaangv,

¹⁶yaac longc mbiaauc jieqv buoz-ndoqv-ziangv coqv yiem zaaix jieqv buoz-zaangv nyei youh, ziouc yiem ZIOUV nyei nza'hmien tiu siec nzunc.

¹⁷Ninh oix zuqc aengx zorqv deix yiem zaaix jieqv buoz-zaangv zengc njiec nyei youh guoqv jienv oix saax uix wuov dauh mienh nyei mbiaauc bung m'normh biouv, caux mbiaauc jieqv buoz-ndoqv-nyeiz, caux mbiaauc jieqv zaux-ndoqv-nyeiz, se yiem guoqv liuz ziec weic fiqv zoux dorngc zuiz wuov dauh saeng-kuv nyei nziaamv gu'nguaaic.

¹⁸Sai mienh nyei buoz-zaangv zengc njiec nyei youh oix zuqc nzaatv saax uix wuov laanh mienh nyei m'nqorngv ziouc yiem ZIOUV nyei nza'hmien tengx ninh fiqv zuiz.

¹⁹“Sai mienh aengx zorqv fongc horc weic fiqv zuiz nyei ga'naaiv daaih ziec tengx saax uix wuov laanh mienh fiqv zuiz. Nqa'haav daix buov ziec nyei saeng-kuv.

²⁰Sai mienh ziouc zorqv daaih caux fongc horc ziec nyei laangh ziqc an wuov ziec-dorngh tengx ninh fiqv zuiz. Ninh ziouc cing-nzengc mi'aqv.

²¹“Mv baac se gorngv mienh jomc haic, maaiz maiv jiez naaiv buoqv ga'naaiv, oix zuqc dorh yietc dauh ba'gi yungh gouv cunv ging weic fiqv zoux dorngc nyei zuiz. Yaac oix zuqc dorh i morqv[26] mbuonv-muonc zorpc jienv ga'lanv youh weic zoux buov ziec nyei laangh ziqc. Aengx dorh yietc gorngc ziepc gouv nyei buo gouv[27] ga'lanv youh,

²²caux i norm norqc nqo fai i norm baeqc gopv lunx ziux ninh haih lorz duqv nyei. Longc norm ziec fiqv zuiz, aengx longc norm buov ziec.

²³“Taux da'betv hnoi oix saax uix wuov laanh mienh oix zuqc dorh naaiv buoqv ga'naaiv taux ZIOUV nyei nza'hmien, Wuic Buangh Ndopv-Liuh nyei gaengh ndaangc, jiu bun sai mienh weic tengx ninh saax uix.

²⁴Sai mienh ziouc zorqv ziec weic fiqv zoux dorngc zuiz nyei ba'gi yungh dorn, caux yietc gorngc ziepc gouv nyei buo gouv ga'lanv youh,[28] yiem ZIOUV nyei nza'hmien cunv ging weic zoux cunv ging fongc horc nyei ga'naaiv.

²⁵Ninh ziouc daix ziec weic fiqv zoux dorngc zuiz naaiv dauh ba'gi yungh dorn, zorqv deix nziaamv guoqv oix saax uix naaiv dauh mienh nyei mbiaauc bung m'normh biouv, caux mbiaauc jieqv buoz-ndoqv-nyeiz, caux mbiaauc jieqv zaux-ndoqv-nyeiz.

²⁶Sai mienh oix zuqc aengx zorqv deix ga'lanv youh dox ganh nyei zaaix jieqv buoz-zaangv,

²⁷aengx longc mbiaauc jieqv buoz-ndoqv-ziangv coqv yiem zaaix jieqv buoz-zaangv nyei youh, ziouc yiem ZIOUV nyei nza'hmien tiu siec nzunc.

²⁸Aengx longc deix yiem ninh nyei buoz-zaangv zengc njiec nyei youh guoqv jienv mbiaauc bung m'normh biouv caux mbiaauc jieqv buoz-ndoqv-nyeiz caux mbiaauc jieqv zaux-ndoqv-nyeiz, se yiem guoqv liuz ziec weic fiqv zuiz wuov dauh saeng-kuv nyei nziaamv gu'nguaaic.

²⁹Yiem sai mienh nyei buoz-zaangv zengc njiec nyei youh nzaatv saax uix wuov laanh mienh nyei m'nqorngv. Sai mienh ziouc yiem ZIOUV nyei nza'hmien tengx ninh fiqv zuiz.

³⁰Sai mienh oix zuqc tengx ninh ziec. Ziux wuov laanh mienh lorz duqv nyei, norqc nqo fai baeqc gopv lunx,

³¹yietc norm ziec weic fiqv zuiz, yietc norm zoux buov ziec nyei ga'naaiv caux fongc horc nyei laangh ziqc yietc njiec buov. Hnangv naaiv zoux, sai mienh ziouc yiem ZIOUV nyei nza'hmien tengx oix saax uix wuov laanh mienh fiqv zuiz.”

³²Naaiv se butv liuz gomh huv baengc oix saax uix mv baac maaiz maiv jiez hnangv yietc gau horpc zuqc maaiz daaih fongc horc ziec nyei leiz.

³³ZIOUV gorngv mbuox Mose caux Aalon,

³⁴“Meih mbuo bieqc Kaa^naa^an Deic-Bung, dongh yie oix jiu benx meih mbuo nzipc nyei buonc deic-bung, se gorngv yie bun haaix norm biauv jiex mbuov,[29]

³⁵biauv-ziouv oix zuqc mingh mbuox sai mienh, ‘Yie buatc hnangv yie nyei biauv cuotv nyungc baengc nor.’

³⁶Sai mienh ziouc heuc ninh mbuo bienh yiem biauv gu'nyuoz nyei nyungc-nyungc ga'naaiv cuotv nzengc ninh cingx daaih bieqc mingh zaah mangc biauv jiex mbuov nyei dorngx. Nzauh heix oix zuqc dingc naaiv deix ga'naaiv maaih uix. Nqa'haav sai mienh bieqc mingh zaah mangc biauv.

³⁷Ninh zaah mangc yiem njongc wuov deix jiex mbuov nyei dorngx, buatc yietc diemv yietc diemv maeng nyei, siqv nyei, hnangv bieqc ndo deix nyei nor, maiv zeiz kungx yiem ga'nyiec liangv nyei hnangv.

³⁸Sai mienh ziouc cuotv ga'nyiec, yiem wuov gaengh ndaangc guon jienv gaengh, maiv bun mienh bieqc siec hnoi.

³⁹Taux da'cietv hnoi sai mienh aengx mingh zaah mangc. Buatc jiex mbuov nyei dorngx yiem njongc butv jangv jienv mingh nor,

⁴⁰ninh ziouc heuc mienh caeqv cuotv jiex mbuov wuov deix la'bieiv dorh mingh guangc ga'nyiec ziqc zingh maaih uix nyei dorngx.

⁴¹Yaac oix zuqc heuc mienh guaaih nzengc biauv gu'nyuoz nyei norm-norm dorngx. Guaaih ndutv nyei ga'naaiv-mbuonv oix zuqc dorh mingh guangc ga'nyiec ziqc zingh maaih uix nyei dorngx.

⁴²Ninh mbuo oix zuqc aengx zorqv siang-la'bieiv dorh mingh div caeqv cuotv wuov deix. Aengx longc siang-ba'naih nie naic jienv.

⁴³“Se gorngv caeqv cuotv wuov deix la'bieiv, guaaih liuz biauv aengx naic jienv, nqa'haav buatc aengx jiex mbuov nor,

⁴⁴sai mienh oix zuqc mingh zaah mangc. Se gorngv buatc jiex mbuov jangv jienv mingh, se buatc doqc nyei nor, biauv yaac maaih uix aqv.

⁴⁵Yietc norm biauv oix zuqc caeqv nzengc. La'bieiv, ndiangx, nie, oix zuqc bienh mingh guangc ga'nyiec ziqc zingh maaih uix nyei dorngx.

⁴⁶“Dongh guon jienv biauv nyei ziangh hoc, haaix dauh bieqc, wuov dauh maaih uix taux hmuangx.

⁴⁷Haaix dauh yiem wuov norm biauv bueix fai nyanc ga'naaiv, wuov dauh oix zuqc nzox ganh nyei lui-houx.

⁴⁸“Mv baac se gorngv naic liuz biauv, nqa'haav sai mienh daaih zaah mangc, buatc maiv jaa jiex mbuov nor, ninh ziouc dingc biauv maiv maaih uix, weic zuqc jiex mbuov nyei jauv baac mi'aqv.

⁴⁹Weic saax naaiv norm biauv nyei uix oix zuqc longc i norm norqc caux si^ndaa zongh ndiangx, ba'gi suix-siqv caux husopc miev.

⁵⁰Ninh oix zuqc zorqv norm norqc yiem zaangh jienv wuom-daaih nyei nie-mor gu'nguaaic daix.

⁵¹Ninh oix zuqc aengx zorqv nangh wuov norm norqc caux si^ndaa zongh ndiangx, ba'gi suix-siqv caux husopc miev, yietc njiec ziemx yiem daix wuov norm norqc nyei nziaamv caux wuom-daaih, ziouc fuqv biauv siec nzunc.

⁵²Ninh ziouc longc norqc nziaamv, wuom-daaih, norqc nangh, si^ndaa zongh ndiangx, husopc miev caux ba'gi suix-siqv saax biauv nyei uix.

⁵³Nangh wuov norm norqc ninh zorqv daaih bungx cuotv ga'nyiec ziqc zingh gan mboux mingh. Hnangv naaiv zoux, ninh saax biauv nyei uix, biauv ziouc cing-nzengc mi'aqv.”

⁵⁴Naaiv deix leiz se weic butv gomh huv baengc, weic butv faang sietv,

⁵⁵weic lui-houx fai biauv jiex mbuov nyei leiz,

⁵⁶weic ndopv omx, ndopv peux fai ndopv tuix setv hnangv laauz nor. Se weic bun cing haaix nyungc maaih uix, haaix nyungc maiv maaih uix.

⁵⁷Naaiv se gomh huv baengc caux biauv jiex mbuov nyei baengc oix zuqc gan nyei leiz.