Read Iu Mien Ye^le^mi 28 Bible Online

Ye^le^mi 28 - Iu Mien bible

Ye^le^mi 28

¹Dongh wuov hnyangx, se Se^nde^ki^yaa faaux weic zoux hungh gunv Yu^ndaa da'feix hnyangx, hmz hlaax, Gi^mbe^on Mienh, Atc^su nyei dorn, douc waac mienh, Haa^nan^yaa, yiem zaangc ZIOUV nyei biauv dorng jienv sai mienh caux zuangx baeqc fingx doix yie gorngv,

²“Nernh Jiex nyei ZIOUV, I^saa^laa^en nyei Tin-Hungh, hnangv naaiv gorngv, ‘Yie zungv wuotv nauv Mbaa^mbi^lon hungh nyei ndiangx-gaaz.[130]

³I hnyangx gu'nyuoz yie oix zorqv zaangc ZIOUV nyei biauv nyei jaa-sic dorh nzuonx taux naaiv norm dorngx, dongh Mbaa^mbi^lon hungh, Ne^mbu^katv^netv^saa, yiem naaiv norm dorngx caangv mingh Mbaa^mbi^lon, wuov deix jaa-sic.

⁴Yie yaac oix dorh Yu^ndaa nyei hungh, Ye^ho^yaa^kim nyei dorn, Ye^ko^ni^yaa,[131] caux Yu^ndaa zuqc guaatv mingh Mbaa^mbi^lon nyei yietc zungv mienh nzuonx daaih taux naaiv norm dorngx, weic zuqc yie oix wuotv Mbaa^mbi^lon hungh nyei ndiangx-gaaz nauv.’+” Naaiv se ZIOUV gorngv nyei waac.

⁵Douc waac mienh, Ye^le^mi, ziouc dorng jienv sai mienh caux souv jienv yiem zaangc ZIOUV nyei biauv gu'nyuoz nyei zuangx mienh, gorngv mbuox douc waac mienh, Haa^nan^yaa,

⁶douc waac mienh, Ye^le^mi, gorngv “Aamen. Tov ZIOUV hnangv naaiv zoux. Tov ZIOUV bun meih douc nyei waac cuotv daaih zien, bun zaangc ZIOUV nyei biauv nyei jaa-sic caux yietc zungv zuqc guaatv mingh nyei mienh yiem Mbaa^mbi^lon duqv nzuonx naaiv norm dorngx.

⁷Mv baac tov muangx yie gorngv bun meih caux zuangx mienh muangx haiz yie gorngv naaiv joux waac.

⁸Yiem loz! hnoi daaih, se yiem ndaangc meih caux yie wuov deix douc waac mienh douc waac gorngv camv-guoqv caux ziex domh fingx oix zuqc mborqv jaax, zuqc ngorc hnaangx, zuqc wuon-baengc.

⁹Douc gorngv baengh orn nyei jauv wuov dauh douc waac mienh aeqv, zuov ninh nyei waac cuotv daaih zien, ziouc hiuv duqv za'gengh ZIOUV paaiv daaih nyei douc waac mienh.”

¹⁰Douc waac mienh, Haa^nan^yaa, ziouc zorqv gaaz jienv douc waac mienh, Ye^le^mi, nyei jaang nyei ndiangx-gaaz, wuotv nauv mingh.

¹¹Haa^nan^yaa dorng jienv zuangx baeqc fingx gorngv, “ZIOUV hnangv naaiv gorngv, ‘I hnyangx gu'nyuoz yie oix hnangv naaiv wuotv nauv Mbaa^mbi^lon hungh, Ne^mbu^katv^netv^saa, bun maanc guoqv mienh gaaz jienv nyei ndiangx-gaaz.’+” Mv baac douc waac mienh, Ye^le^mi, mingh mi'aqv.

¹²Douc waac mienh, Haa^nan^yaa, zorqv douc waac mienh, Ye^le^mi, gaaz jienv jaang nyei ndiangx-gaaz wuotv nauv liuz, nqa'haav Ye^le^mi duqv zipv ZIOUV nyei waac gorngv,

¹³“Mingh mbuox Haa^nan^yaa, ZIOUV hnangv naaiv gorngv, ‘Meih wuotv ndiangx-gaaz nauv mv baac yie oix zoux hlieqv-gaaz div.

¹⁴Weic zuqc Nernh Jiex nyei ZIOUV, I^saa^laa^en nyei Tin-Hungh, hnangv naaiv gorngv. ‘Yie zorqv hlieqv-gaaz gaaz jienv naaiv deix guoqv nyei mienh nyei jaang bun ninh mbuo fu-sux Mbaa^mbi^lon nyei Ne^mbu^katv^netv^saa Hungh. Ninh mbuo zungv oix zuqc fu-sux ninh weic zuqc liemh lomc-huaang nyei hieh zoih yie jiu bun ninh mi'aqv.’+”

¹⁵Douc waac mienh, Ye^le^mi, gorngv mbuox douc waac mienh, Haa^nan^yaa, “Haa^nan^yaa aah! Muangx maah! ZIOUV maiv paaiv meih. Meih yaac bun naaiv deix baeqc fingx kaux gorngv-baeqc nyei waac.

¹⁶Weic naaiv ZIOUV gorngv, “Yie oix suiv meih cuotv baamh gen nyei ndau-beih. Dongh naaiv hnyangx gu'nyuoz meih oix zuqc daic, weic zuqc meih gorngv nyei waac ngaengc jienv ZIOUV. ”

¹⁷Dongh wuov hnyangx cietv hlaax, douc waac mienh, Haa^nan^yaa, daic mi'aqv.