Read Iu Mien Ye^le^mi 41 Bible Online

Ye^le^mi 41 - Iu Mien bible

Ye^le^mi 41

¹Taux cietv hlaax, maaih hungh nyei douh zong, zoux hlo nyei jien, se E^li^saa^maa nyei fun, Ne^taa^ni^yaa nyei dorn, I^saa^maa^en, caux jienv ziepc laanh mienh mingh taux Mitv^baa lorz Aa^hi^kam nyei dorn, Ge^ndaa^li^yaa. Ninh mbuo yiem Mitv^baa lomh nzoih nyanc hnaangx wuov zanc,

²Ne^taa^ni^yaa nyei dorn, I^saa^maa^en, caux jienv ninh daaih nyei ziepc laanh mienh jiez sin longc nzuqc ndaauv daix Saafaan nyei fun, Aa^hi^kam nyei dorn, Ge^ndaa^li^yaa, dongh Mbaa^mbi^lon hungh liepc daaih zoux wuov norm deic-bung nyei saengv-ziouv.

³I^saa^maa^en aengx daix caux Ge^ndaa^li^yaa yiem Mitv^baa wuov nyei yietc zungv Yiutai Mienh caux buangh zuqc yiem wuov nyei Ken^ndie baeng.

⁴Ge^ndaa^li^yaa zuqc daix daic, nqa'haav wuov hnoi, corc maiv gaengh maaih haaix dauh hiuv,

⁵maaih betv ziepc laanh mienh yiem Sekem caux Silo caux Saa^maa^lie daaih. Ninh mbuo teix nqoi siaam, zuqv betv huv nyei lui-houx, sin zaangc guetv taatv, dorh jienv fongc horc nyei laangh ziqc caux hung, oix mingh zaangc ZIOUV nyei biauv fongc horc.

⁶Ne^taa^ni^yaa nyei dorn, I^saa^maa^en, cuotv Mitv^baa mingh zipv ninh mbuo, yietc binc mingh yietc binc nyiemv. Buangh ninh mbuo wuov zanc ninh gorngv, “Gunv bieqc daaih lorz Aa^hi^kam nyei dorn, Ge^ndaa^li^yaa.”

⁷Bieqc zingh daaih wuov zanc, Ne^taa^ni^yaa nyei dorn, I^saa^maa^en, caux jienv ninh yiem nyei mienh, daix ninh mbuo aengx zorqv ninh mbuo zoi njiec norm siou wuom nyei kuotv.

⁸Mv baac yiem ninh mbuo mbu'ndongx maaih ziepc laanh gorngv mbuox I^saa^maa^en, “Maiv dungx daix yie mbuo, weic zuqc yie mbuo maaih mbiauh witv caux mbiauh mbaali caux ga'lanv youh caux mueiz-dorngh bingx jienv wuov lomc-huaang.” I^saa^maa^en ziouc dingh njiec, maiv caux ninh mbuo nyei doic daix.

⁹I^saa^maa^en zorqv ninh daix daic nyei yietc zungv mienh nyei sei dapv jienv wuov norm siou wuom nyei kuotv. Naaiv norm wuom-kuotv se zinh ndaangc Aasaax Hungh weic mbungh I^saa^laa^en nyei hungh, Mbaa^aa^saa, zoux daaih. Ne^taa^ni^yaa nyei dorn, I^saa^maa^en, zorqv wuov deix zuqc daix nyei mienh nyei sei dapv buangv wuov norm kuotv.

¹⁰I^saa^maa^en aengx zorqv yiem Mitv^baa zengc njiec nyei mienh, se hungh sieqv caux yiem Mitv^baa zengc njiec nyei baeqc fingx, dongh goux hungh diex nyei baeng-bieiv, Ne^mbu^saa^laa^ndaan, jiu bun Aa^hi^kam nyei dorn, Ge^ndaa^li^yaa. Ne^taa^ni^yaa nyei dorn, I^saa^maa^en ziouc guaatv ninh mbuo cuotv jauv jiex wuov ngaanc Ammon Mienh wuov.

¹¹Mv baac Kaa^le^aa nyei dorn, Yo^haa^nan, aengx caux ninh yiem wuov deix jun-baeng nyei zuangx baeng-bieiv, muangx haiz Ne^taa^ni^yaa nyei dorn, I^saa^maa^en, zoux nyei yietc zungv orqv sic,

¹²ninh mbuo ziouc dorh jienv ninh mbuo nyei zuangx mienh cuotv mingh caux Ne^taa^ni^yaa nyei dorn, I^saa^maa^en, mborqv jaax. Ninh mbuo zunc zaaic yiem Gi^mbe^on nyei domh wuom-njaangh.

¹³Caux I^saa^maa^en yiem wuov nyei zuangx mienh buatc Kaa^le^aa nyei dorn, Yo^haa^nan caux jienv ninh nyei zuangx baeng-bieiv, ninh mbuo a'hneiv haic aqv.

¹⁴Hnangv naaic yiem Mitv^baa zuqc I^saa^maa^en guaatv mingh nyei zuangx mienh daaux sin nzuonx daaih mingh Kaa^le^aa nyei dorn, Yo^haa^nan wuov.

¹⁵Mv baac Ne^taa^ni^yaa nyei dorn, I^saa^maa^en caux hietc laanh mienh biaux ndutv Yo^haa^nan nyei buoz-ndiev mingh lorz Ammon Mienh.

¹⁶Kaa^le^aa nyei dorn, Yo^haa^nan, caux ninh yiem wuov deix jun-baeng nyei zuangx baeng-bieiv, ziouc dorh wuov deix zengc njiec nyei mienh nzuonx, se Ne^taa^ni^yaa nyei dorn, I^saa^maa^en, daix liuz Aa^hi^kam nyei dorn, Ge^ndaa^li^yaa, aengx guaatv mingh yiem Mitv^baa wuov deix baeng, m'sieqv dorn, fu'jueiv caux im dov nyei mienh.

¹⁷Ninh mbuo aengx mingh taux nitv fatv Mbetc^le^hem nyei Gelutv Kim^ham, jiez hnyouv oix mingh I^yipv Deic-Bung

¹⁸weic zuqc ninh mbuo gamh nziex Ken^ndie Mienh, laaix Ne^taa^ni^yaa nyei dorn, I^saa^maa^en, daix Aa^hi^kam nyei dorn, Ge^ndaa^li^yaa, dongh Mbaa^mbi^lon hungh liepc zoux deic-bung nyei saengv-ziouv.